ریاست الوزراء د یوې خبرپاڼې په خپرولو سره د کابل ښار د ۲۲ ناحیو له یو شمېر مشرانو، وکیلانو، د شیعه ګانو او سېکانو له استازو د مولوي عبدالکبیر د ناستې خبر ورکړ. اهل هنود او سېکانو په دې کتنه کې د دوی د ستونزو د حل غوښتنه کړې ده.
د اهل هنود او سېک استازو د طالبانو د رییس الوزراء له سیاسي مرستیال مولوي عبدالکبیر سره په لیدنه کې وویل، چې په کابل ښار کې د دوی ملکیتونه غصب شوي دي.
دوی د خپلو ځمکو د بېرته راګرځولو غوښتنه کوي او ټینګار کوي، چې د دوی حقوقي ستونزو ته دې د حل لاره وموندل شي.
ریاست الوزراء په یوې خبرپاڼه کې همداراز لیکلي، چې مولوي عبدالکبیر د کابل ښار د ۲۲ ناحیو له یو شمېر مشرانو، وکیلانو، د شیعه نو او سېکانو له استازو سره کتلي دي.
ددې خبرپاڼې له مخې، مولوي عبدالکبیر په دې لیدنه کې ژمنه کړې چې، د شیعه ګانو او اهل هنود وګړو د ستونزو د حل په موخه به لازم اقدامات وشي.
پر افغانستان د طالبانو له واکمنۍ وروسته ډیری اهل هنود او سیکان د افغانستان پرېښودو ته اړ شوې دي.
پر دغو لږکیو د طالبانو له واکمنۍ وروسته په افغانستان کې څو ځلې بریدونه شوي دي او د یو شمیر بریدونو مسوولیت هم داعش ډلې په غاړه اخیستی وه.
د ۱۴۰۰ لمریز کال د تلې په میاشت کې د کابل په کارته پروان سیمه کې وسله والو کسانو چې ځانونه طالب چارواکي معرفي کړي ول، چې د سېکانو عبادت ځای ته ننوتل او د هغوی وسایل یې له منځه یوړل.
