په هلمند کې د طالب استخباراتو له لوري د ۹ نيول شويو پخوانيو نظاميانو کورنۍ د عدالت غوښتنه کوي او وايي، دا کسان ګناه نیول شوي. ۳ ورځي مخکي طالبانو د لښکرګاه ښار په بېلابېلو سېمو کې د جمهوریت د وحت د ملي امينت ښاري مدير او دوو ولسوالانو په ګډون ۹ نظاميان ونیول او بنديان یې کړل.
د طالبانو له لوري د زنداني شويو نظاميانو او حکومتي مامورینو کورنيو د سې شنبې په ورځ د افغانستان انټرنشنل – پښتو سره په خبرو کې وويل، چې د خپلو نیول شویو غړو حالت ته اندېښمن دي او طالبان ورته هيڅ معلومات نه ورکوي.
دغو کورنيو د نوم نه ښودلو په شرط د طالبانو له مشرتابه څخه د عدالت او د عمومي بښنې د عملي کولو غوښتنه وکړه.
درې ورځي مخکي طالب استخباراتو په لښکرګاه ښار کې د پخواني نظام د ملي امنيت ښاري مدير اغالالی، د نادعلي ولسوال فتیح الله، د ناوې او ګرمسېر ولسوال سراج الدين سرحدي، د ملي امنيت د پارټيزاني ګروپونو قومندان داود، د ملي امنيت سمتي مدير عبدالتواب، انور خان باديزی او د دوی نور ملګري نيولي او بندي کړي دي.
د نيولو شویو کسانو کورنۍ اندېښنه لرې، چې نیول شوي کسان به د طالبانو په زندان کې تر سختو شکنجو لاندي وي.
د دې کورنيو به خبره، چې واک ته د طالبانو په رسېدو دوی نظامي فعاليت پرې اېښی او شخصي کارونه يې کول.
د طالبانو له لوري په نيول شويو کسانو د پخواني نظام د ملي امنيت ښاري مدير اغالالی دی چې اصلي د غزني ولایت اوسېدونکی دی؛ خو زده کړې او ژوند يې په هلمند کې کړی دی.
نوموړی د تېر حکومت له سقوط وروسته د لښکرګاه ښار په لومړۍ حوزه کې بست پوهنتون ته نژدې د خوراکي توکو یوه هټۍ درلوده.
د دوی کورنۍ د بشري حقونو د نړیوال سازمان څخه هم د پاملرنې غوښتنه کوي.
په هلمند کې د طالبانو استخبارات په دې اړه د معلوماتو ورکولو څخه ډډه کوی، د طالبانو ادارې د دې کسانو د نيولو لامل هم نه دی ویلی.
په افغانستان کې واک ته د طالبانو د رسېدو سره که څه هم دې ډلې د عمومي بښنې اعلان کړی؛ خو د تېر نظام ډېری نظامي چارواکي په دې فرمان باور نه لري.
دې ډلې په تېرو نږدې درېيو کلونو کې د تېر نظام ډېر سرتېري نيولي، بندي کړي، شکنجه کړي او ان وژلي یې دي.
