د خوړو نړېوال پرواګرام وايي، په هرات ولایت کې یې له ۳۰۰۰ زرو زیاتو زلزله ځپلو کورنیو سره د خوراکي توکو بیړنۍ مرستې کړې دي. د دغه پروګرام چارواکي وايي، د هرات زلزله ځپلي لا هم د افغانستان په ساړه ژمي او واورو کې نورو مرستو ته اړتیا لري.
د خوړو نړېوال پروګرام نن چهارشنبه د (کب ۱۶مه) نېټه په اېکس پاڼه یوه لنډه ويډیو خپره کړې چې په کې د هرات ولايت زلزله ځپلي په واوره او سړه سیلۍ کې د خیمو څنګ ته د دغه پروګرام له لوري مرسته شوي خوراکي توکي تر خپلو مېنو رسوي.
د نړېوالو سازمانونو د ګډو موندنو له مخې، په هرات کې د روان لمریز کال د تلې ۱۵مې نیټې په پرله پسې زلزلو کې ۱۵۰۰ کسان مړه او ۲۶۰۰ نور ټپیان شوي.
طالبانو تر هغه وړاندې اعلان کړی و، چې د هرات په زلزلو کې د مړو شمېر تر دوه زره اوښتی او تر نهه زرو ډېر ټپیان شوي.
د خوړو نړېوال سازمان ويلي، د دغو زلزله ځپلو یوه برخه لاهم په خیمو کې ژوند کوي، او اوس یې د واورې او توپان سړې سیلۍ ځپي.
د ملګرو ملتونو پراختیايي پروګرام، نړېوال بانک، اروپايي ټولنې او د اسیا پراختیايي بانک د کب په دویمه د هرات د زلزله ځپلو د اړتیاو په اړه خپلې ګډې موندنې خپرې کړې او ويلي یې دي چې د هرات زلزله ځپلو سیمو د بیارغونې لپاره ۴۰۳ میلیونه ډالرو ته اړتیا ده.
د دغو سازمانونو ګډه ارزونه ښيي، چې د فزيکي زیانونو بيارغونې لپاره ۲۱۷ ميليونه او نورو زیانونه لپاره شاوخوا ۷۹ ميليونه ډالرو ته اړتيا ده.
دغو سازمانونو په راپور کې ویلي، چې د هرات زلزلو ۲۷۵ زره کسان اغېزمن کړي چې په هغو کې میندواره ښځې، ماشومان، معلولان، بوډاګان، ماشومان او په لاعلاجه ناروغیو اخته کسان شامل دي.
د علي ګل نومي وژل شوي کس د کورنۍ غړو افغانستان انټرنشنل پښتو څانګې ته ويلي چې د ننګرهار ولایت لپاره د طالبانو د استخباراتو ادارې کسانو علي ګل پرون له ځان سره یووړ او نن سهار یې وژلی دی.
د وژل شوي علي کل د مړینې په انځور کې د هغه پر غاړه د زور زیاتې نښې ښکاري.
د هغه کورنۍ وايي، د علي ګل له وژلو وروسته د هغه مړی د ننګرهار د طالبانو د استخباراتو په اداره کې و او دوی ته یې مړی نه ورکاوه، د وژل شوي کس د کورنۍ یوه غړي د نوم نه ښودلو په شرط افغانستان انټرنشنل پښتو ته وويل: «د خدای لپاره د ده ګناه څه وه؟ د طالبانو استخباراتو کسان راغلل علي ګل يې پرون له ځان سره بوتلو او اوس خبر شوو چې وژلی یې دی، چې ورته ومو ویل جسد یې راکړئ نو هغه یې هم نه راکاوه، آخر زموږ ګناه څه ده؟»
طالبانو لا په دې اړه څه نه دي ویلي، او نه یې په تېرو دوه نیمو کالو کې د داسې وژنو په اړه له رسنیو او یا د وژل شویو کسانو له کورنیو سره معلومات شریک کړي.
د وژل شوي علي ګل یوه ملګري هم افغانستان انټرنشنل پښتو سره د خبرو پر مهال ويلي چې علي ګل تېره ورځ سه شنبې د (کب ۱۵مه) د ننګرهار لپاره د طالبانو د استخباراتو ادارې کسانو له ځان سره وړی و او نن یې د وژلو خبر راغلی، هغه وايي: «موږ تر اوسه پورې په دې نه پوهیږو چې علي ګل څه ګناه کړې، هغه په مومندرې ولسوالۍ کې د خوراکي توکو دوکان لاره او عادي ژوند یې کاوه.»
د ننګرهار ولايت د مومندرې ولسوالۍ د باسول کلي اوسیدونکي او د وژل شوي علي ګل کورنۍ وايي، له دوی سره د طالبانو له لوري د شوي دغه ظلم پوښتنه دې وشي او په دې برخه کې یې د عدالت غوښتنه کړې ده.
له وژل شوي علي ګل څخه د کورنۍ د نورو غړو تر څنګ یوه ځوانه کونډه ښځه يو پنځه کلن زوی او یوه درې کلنه لور پاتې شول.
