د طالبانو د کورنیو چارو وزارت په خبرپاڼه کې چې پرون سه شنبه د (کب په ۱۵ مه) خپره شوې ویلي، چې د هلمند په ګډون یې په څو نورو ولایتونو کې د کوکنارو ۲۰۰ جریبه کروندې له منځه وړې دي.
په خبرپاڼه کې ویل شوي، چې د کوکنارو پر ضد د دوی دغه عملیات په هلمند، ارزګان، کندهار، فراه او ننګرهار ولایتونه کې ترسره شوي دي.
طالبان وایي، چې یوازې د هلمند ولایت په کجکي، موسی کلا، باغران، واشېر او باباجي ولسوالیو کې یې په ۱۵۰ جریبه ځمکه کرل شوي کوکنار له منځه وړي او پاتې ۵۰ جریبه یې په نورو ولایتونو کې اړولي دي.
داسې ویل کېږي، د کوکنارو ډېره برخه په هلمند کې کرل کېږي چې لا له وړاندې د دغه ولایت ډېرې برخې د طالبانو په واک کې وې او دغې ډلې د همدغو کروندو له کښت او قاچاق څخه پرېمانه پیسې تر لاسه کولې.
طالبان داسې مهال د کوکنارو کروندې له منځه وړي، دغې ډلې تل ادعا کړې چې د دوی د مشر ملا هبت الله له فرمان وروسته د کوکنارو کر د صفر کچې ته راټیټ شوی دی.
د دغې ډلې مشر شاوخوا دوه کاله وړاندې د کوکنارو د کښت، تولید او قاچاقو د منعه کولو فرمان صادر کړی و؛ خو داسې ښکاري چې دغه فرمان نه دی پلې شوی او د کوکنارو د کښت تر څنګ لا هم د دغه هېواد په ډېرو سیمو کې د تریاکو د خرڅلاو ښکاره بازارونه شته او ګاونډیو هېوادونو ته په خلاص مټ قاچاقېږي.
همدغه تېره ورځ د ایران د نشهیي توکو سره د مبارزې مشر سکندر مومني ویلي و، چې په افغانستان کې د صنعتي شویو نشهیي توکو په تولید کې ۲۰ سلنه زیاتوالی راغلی.
دا رنګه د افغانستان بل ګاونډي تاجکستان هم په وار، وار د دغه هېواد سره په پوله د نشهیي توکو د قاچاقو په ډېرېدو اندېښنه ښودلې ده.
د علي ګل نومي وژل شوي کس د کورنۍ غړو افغانستان انټرنشنل پښتو څانګې ته ويلي چې د ننګرهار ولایت لپاره د طالبانو د استخباراتو ادارې کسانو علي ګل پرون له ځان سره یووړ او نن سهار یې وژلی دی.
د وژل شوي علي کل د مړینې په انځور کې د هغه پر غاړه د زور زیاتې نښې ښکاري.
د هغه کورنۍ وايي، د علي ګل له وژلو وروسته د هغه مړی د ننګرهار د طالبانو د استخباراتو په اداره کې و او دوی ته یې مړی نه ورکاوه، د وژل شوي کس د کورنۍ یوه غړي د نوم نه ښودلو په شرط افغانستان انټرنشنل پښتو ته وويل: «د خدای لپاره د ده ګناه څه وه؟ د طالبانو استخباراتو کسان راغلل علي ګل يې پرون له ځان سره بوتلو او اوس خبر شوو چې وژلی یې دی، چې ورته ومو ویل جسد یې راکړئ نو هغه یې هم نه راکاوه، آخر زموږ ګناه څه ده؟»
طالبانو لا په دې اړه څه نه دي ویلي، او نه یې په تېرو دوه نیمو کالو کې د داسې وژنو په اړه له رسنیو او یا د وژل شویو کسانو له کورنیو سره معلومات شریک کړي.
د وژل شوي علي ګل یوه ملګري هم افغانستان انټرنشنل پښتو سره د خبرو پر مهال ويلي چې علي ګل تېره ورځ سه شنبې د (کب ۱۵مه) د ننګرهار لپاره د طالبانو د استخباراتو ادارې کسانو له ځان سره وړی و او نن یې د وژلو خبر راغلی، هغه وايي: «موږ تر اوسه پورې په دې نه پوهیږو چې علي ګل څه ګناه کړې، هغه په مومندرې ولسوالۍ کې د خوراکي توکو دوکان لاره او عادي ژوند یې کاوه.»
د ننګرهار ولايت د مومندرې ولسوالۍ د باسول کلي اوسیدونکي او د وژل شوي علي ګل کورنۍ وايي، له دوی سره د طالبانو له لوري د شوي دغه ظلم پوښتنه دې وشي او په دې برخه کې یې د عدالت غوښتنه کړې ده.
له وژل شوي علي ګل څخه د کورنۍ د نورو غړو تر څنګ یوه ځوانه کونډه ښځه يو پنځه کلن زوی او یوه درې کلنه لور پاتې شول.
