د افغانستان له پاره د امریکا سفارت په خپله اېکس پاڼه لیکلي، چې لوړو زدهکړو ته د افغانانو د لاسرسي د ملاتړ د پروګرام له لارې په سوداګرۍ، معلوماتي ټېکنالوژۍ، ساینس، روغتیا او حقوقو برخو کې روزنیزې دورې پیلوي.
د سفارت د بیان له مخې، د دغه پروګرام له لارې افغانستان کې مېشت وړو پېغلو او ځوانانو ته په وړیا توګه د انلاین روزنو زمینه برابرېږي چې مهارتونه یې لا پیاوړي شي او د نړۍ له نویو پرمختګونو سره د اړیکو پر مټ یو ځای شي.
دغه سفارت د دغو کورسونو د نوملیکنې انلاین پته په خپله اېکس پاڼه خپره کړې ده.
له هغه مهاله چې طالبانو پر افغانستان واکمني ټینګه کړې، له یوې خوا له شپږم ټولګي پورته د نجونو لپاره د ښوونځیو او پوهنځیو دروازې تړلې پاتې دي، له بله پلوه د هلکانو لپاره هم د زدهکړو هغسې چاپېریال نه دی پاتې چې دوی د وخت د غوښتنو سره سمې زدهکړې وکړي.
د ښوونځیو او پوهنتونونو ډېر استادان له هېواده کډه شوي او هغه چې پاتې هم دي په نصاب کې د ادلون بدلون او د طالبانو د خوښې سره سم نه شي کولای زدهکوونکي هغه شان وروزي څنګه یې چې تمه کېږي.
