د امریکا د بهرنیو چارو وزارت ویاند متیو مېلر د پاکستان د نوي لومړي وزیر له لوړې یوه ورځ وروسته ویلي، چې واشنګټن به د پاکستان د نوي لومړي وزیر شهباز شریف له حکومت سره د دواړو هېوادونو د "ګډو ګټو" د پرمختګ لپاره تعامل وکړي.
۷۲ کلن شهباز شریف د دوشنبې په ورځ د دویم ځل لپاره د پاکستان د لومړي وزیر په توګه لوړه وکړه.
متیو مېلر د یوې خبري غونډې پر مهال وویل:« موږ مخکې ویلي و، چې له پاکستان سره د خپل اتحاد، اوږدمهاله ملګرتیا ته ارزښت ورکوو او تل مو یو پیاوړی، سوکاله او ډیموکراټیک پاکستان د امریکا او پاکستان د ګټو لپاره مهم ګڼلی دی.»
مېلر وویل، د مریم نواز ټاکنه د پاکستان په سیاست کې یو "ښه ګام" و.
هغه وويل:« موږ له پاکستان سره په سياسي، اقتصادي، د امريکا-پاکستان د ښځو د شورا لهخوا، په مدني ټولنو او نورو پرېکړه نيونکو ځايونو کې په بشپړه توګه د ښځو د ادغام په برخه کې په پراخه کچه همکارۍ ته سترګې په لار يو.»
