سیویک یو ایس مانیټور نړۍوالې څېړنیزې ادارې پاکستان د نړۍ د هغو هېوادنو د څار په نوملړ کې شامل کړ، چې پر مدني ازادیو بندیز، د سیاسي مخالفینو ځپل، له بشري حقونو سرغړونه او پر خبریالو فشارونه پکې زیات شوي دي.
دغې ادارې د پاکستان وروستیو ټاکنو ته په اشارې نن سې شنبه یو راپور خپور کړی او ویلي یې دي، چې په پاکستان کې د اپوزسیون ځپل، پر مدني ازادیو بندیز، له بشري حقونو سرغړونه او جبري ورکېدل زیات شوي او دغې ادارې لسګونه داسې اسناد یې تر لاسه کړي، چې ښيي په لوی لاس یو شمېر سیاستوالو ته په ټاکنو کې د ګډون اجازه نه ده ورکړل شوې.
یاده اداره په خپل راپور کې زیاتوي، چې د ټاکنو پر مهال یو شمېر ټاکنیز ګروپونه ځپل شوي او د ټاکنیزو کمپاینونو مخه یې په لوی لاس نیول شوې ده.
په راپور کې راغلي، چې له ټاکنو وړاندې او وروسته یو شمېر سیاستوال، مدني فعالان او خبریالان نیول شوي او شکنجه شوي دي.
یاده اداره زیاتوي، چې په پاکستان کې پر سوله ییزو لاریونونو هم په بېلابېلو بڼو فشارونه زیات شوي او ځینو لاریونونو ته اجازه هم نه ده ورکړل شوې.
راپور زیاتوي، چې په یو شمېر سیاستوالو پوځي مقدمې ثبت شوي او دا چاره د ټولو نړۍوالو قوانینو خلاف کار دی، چې له امله یې مدني او سیاسي چارې شدیدې ځپل شوي دي.
سیویک یو ایس په خپل راپور کې ویلي، چې د یو شمېر اداراتو له خوا پر رسنیو بندیزونه لګېدلي، چې له امله یې د عمران خان او د هغه د ګوند د غړو د ویناو پر خپرېدو بندیز لګېدلی دی.
دغې ادارې زیاته کړه، چې په پاکستان کې د پښتنو او بلوڅانو خپلسرې نیونې او د دغو قومونو پر وړاندې د بشري حقونو ضد عملیات ترسره کېدل د دې ګواهي ورکوي، چې په پاکستان کې مدني ازادۍ کمزورې شوي، د بشري حقونو سرغړونې زیاتې شوي او دغه هېواد د نړۍوالو قوانین سره په ټکر کې واقع شوی دی.
سیویک یو ایس مانیټور د نړۍ په مختلفو هېوادونو کې د مدني ازاديو، بشري حقونو او بیان ازادۍ په اړه یوه څېړونکې اداره ده، چې سلګونه مدني او څېړنیز بنسټونه یې غړیتوب لري.
تر اوسه د پاکستان حکومت په رسمي ډول د دغې نړۍوالې ادارې د پرېکړې او راپور په باب څه نه دي ویلي.
د پښتونخوا ملي عوامي ګوند د بلوچستان صوبې مشر عبدالقهار ودان نن سې شنبه د افغانستان انټرنشنل – پښتو سره په خبرو کې وويل، چې له تېرو درېيو ورځو راپه دې خوا د پاکستان امنيتي ادارو د ګوند د زده کړو پر يوه مرکز، د محمود خان اڅکزي پر کور او د دوی اړوند پر درېيو سوداګريزو مرکزونو عمليات کړي دي.
د نوموړي په خبره، چې د پاکستان امنيتي کسانو د محمود خان اڅکزي يو ساتونکی هم له ځان سره وړی دی.
ودان زياتوي، چې دا عمليات تر هغه وروسته وشول، کله چې د ګوند مشر محمود خان اڅکزي په پارلمان کې د قانون د پلي کولو، د خپلواک پارلمان او په ټاکنو کې مداخله کوونکو پوځي کسانو ته د سزا ورکولو غوښتنه وکړه.
نوموړی زياتوي: « حکومت ځکه عملیات وکړل، چې مشر په پارلمان کې دوې ورځې وړاندې په خبرو کې د ازاد پارلمان، رايو ته د درناوي، د درغليو د اصلاح، د پوځ له لوري په ټاکنو کې د رشوت اخيستو او دخيلو کسانو ته د سزا ورکولو او د قانون د پلي کولو غوښتنه وکړه.»
د پښتونخوا ملي عوامي ګوند دغه غړی عبدالقهار ودان وايي، چې تر لاریونو وروسته نن په ټوله کوېټه کې کاربنديز روان دی.
د هغه په خبره: « نن په ټوله کوېټه کې سوداګريز مارکېټونه او دوکانونه بند وو او خلکو په خپله خوښه دا کار تر سره کړ.»
د نوموړي په خبره؛ تر هغې چې د پاکستان امنیتي ادارو دوی ته مثبت ځواب نه وي ویلی؛ تر هغې به د حق غوښتلو لپاره غږ پورته کوي.
د کوېټې انتظامي دفتر رسنيو ته په لېږلې خبرپاڼه کې ويلي، چې د مارچ په درېیمه پوليسو پر کواري سړک د محمود خان اڅکزي کورته څېرمه پر خالي ځمکه چاپه وهلې او هلته یې د ځمکې پر سر يو ساتونکی د پوليسو سره د مداخلې له امله نیولی دی.
ودان وايي، چې د پيپلز ګوند مشر بلاول بوټو زرداري، د بلوچستان نشنل پارټۍ مشر سردار اختر جان مینګل او د تحریک انصاف مشر ګوهر علي خان د محمود خان اڅکزي پر کور او ځمکه عمليات غندلي دي.
د مارچ مياشتي پر دویمه نېټه سني اتحاد کونسل (شورا) چې زیاتره غړي یې د تحریک انصاف ګوند پلویان دي؛ محمود خان اڅکزی د ولسمشرۍ څوکۍ ته نوماند کړ.
محمود خان اڅکزی په پاکستان کې یو پښتون ملتپال سیاستوال دی او له بلوچستان صوبې قامي اسمبلۍ ته کامیاب شوی دی.
د پاکستان ټولټاکنې د تېرې میاشتې پر اتمه وشوې، چې د شفافیت په اړه یې د اکثریت ګوندونو، سیاسي او مدني فعالانو اندېښنې راپورته شوې دي.
