د پاکستان پولیسو ادعا کړې هغه تورن کسان یې نیولي چې په اډیاله زندان یې د برید تکل لاره، هلته چې د دغه هېواد پخوانی لومړی وزیر عمران خان هم بندي دی. د راولپنډۍ پولیسو ویلي، نیول شویو کسانو هوډ لاره چې پر دغه زندان وسلهوال برید وکړي؛ خو دوی دغه برید شنډ کړی دی.
د ترهګرۍ پر ضد د پاکستان ادارې دغه نیول شوي کسان افغانان ښودلي او ادعا یې کړې، چې له هغوی سره یې وسلې او مهمات هم نیولي دي.
پولیسو د دغې نیونې پر مهال هغه انځور هم خپور کړي، چې په کې درې تنه مخ پټي کسان لیدل کېږي او د پولیسو لهخوا له یوه کوره رااېستل کېږي.
پولیس وایي، له نیول شویو کسانو سره یې د اډیاله زندان نقشه، لاسي بمونه او چاودېدونکي توکي هم نیولي دي.
که څه هم چې دوی نیول شوي کسان افغانان یادوي؛ خو داسې کره شواهد نه شته چې ایا دا به په رښتیا سره افغانان وي او که نه؟
تر دې وړاندې هم پاکستاني چارواکو په دغه هېواد کې د ترهګریزو بریدونو پړه پر افغانانو اچولې وه؛ خو هم افغان طالبانو او هم د پاکستان د طالبانو تحریک دغه ادعاوې ردې کړې وې او په دغسې پېښو کې یې د پاکستان د تحریک طالبانو لاس لرل منلي وو او ادعا یې کړې وه، چې په ټول پاکستان کې دغسې پېښې د دغه تحریک له لوري کېږي.
