په ملګرو ملتونو کې د افغانستان استازي د امنیت شورا په غونډه کې وویل، له طالبانو سره د نړۍ جوړجاړی باید له ترهګرۍ سره د مبارزې، بشري حقونو په تېره بیا د ښځو د حقونو په برخه کې د دغې ډلې پر کړنو مشروط وي.
هغه وويل، خلک د دې ډلې په چلند کې له بدلون پرته د هېوادونو او طالبانو ترمنځ د اړيکو د عادي کېدو په اړه اندېښمن دي.
نصیر فایق د چهارشنبې په ورځ د (کب ۱۶مه) د امنیت شورا په غونډه کې د افغانستان په استازیتوب خبرې وکړې. هغه وویل چې په افغانستان کې د جنسیتي توپیر له امله باید طالبانو ته کوم امتیازات ورنه کړل شي.
هغه وویل، د افغانستان خلک اندېښمن دي چې له طالبانو سره به د اړیکو عادي کېدل او یا ډېرې اړیکې تر هغه مهاله نه جوړیږي چې دغه ډله خپلې تګلارې بدلې نه کړي او د خلکو غوښتنو ته ځواب ونه وايي.
ښاغلي فایق وویل، په افغانستان کې سوله او ټیکاؤ یوازې د یوه جامع او ټولګډونه سیاسي نظام له لارې له ملي خبرو اترو وروسته رامنځته کیدای شي چې د ټولو افغانانو هیلو ته درناوی وشي.
په ملګرو ملتونو کې د افغانستان استازی وايي، د افغانستان وضعیت د خرابېدو په حال کې دی، د امنیت شورا ته پکار ده چې د افغانستان په اړه متحد او بیړني ګامونه واخلي. هغه وویل، «اوس مهال، د نړیوالې ټولنې اجماع ته اړتیا ده چې په داسې لار نقشې هوکړه وکړي چې هدفونه او مهال وېش یې مشخص وي.»
ښاغلي فایق وویل چې د ملګرو ملتونو په راتلونکو ټولو غونډو کې باید بېلابېلې ډلې را وبلل شي او طالبان د افغانستان په کشاله کې یوازې یو اړخ دی.
په ملګرو ملتونو کې د افغانستان استازي د خپلو خبرو پر مهال له طالبانو سره د پخواني حکومت د مذاکراتو ډلې پر غړې فاطمه ګیلاني نیوکه وکړه. ښاغلي فایق وویل چې ګیلاني په خپلو خبرو کې د طالبانو د سیاستونو غندنه ونه کړه.
