د اسراییلي ځواکونو په برید کې ۸۵ تنه فلسطینیان وژل شوي او د مړو شمېر له ۳۱ زرو واوښت
د غزې روغتیا يي چارواکو اعلان وکړ، چې په غزه کې د اسراییل د روانو بریدونو په پایله کې په تېرو ۲۴ ساعتونو کې ۸۵ تنه فلسطینیان وژل شوي او ۱۳۰ تنه ټپیان شوي دي.
د غزې روغتیا يي چارواکو اعلان وکړ، چې په غزه کې د اسراییل د روانو بریدونو په پایله کې په تېرو ۲۴ ساعتونو کې ۸۵ تنه فلسطینیان وژل شوي او ۱۳۰ تنه ټپیان شوي دي.
د غزې د روغتیا وزارت د معلوماتو له مخې؛ د ۲۰۲۳ کال د اکتوبر له ۷مې نېټې راهیسې پر غزې د اسراییلي یرغل په پایله کې ۳۱ زره ۴۵ فلسطینیان وژل شوي او ۷۲ زره ۶۵۴ نور ټپیان شوي دي.
دغه اداره زیاتوي، چې د اسراییلي ځواکونو د بریدونو ۷۲ سلنه قربانیان ښځې او ماشومان دي.
په دې وروستیو ورځو کې د ملګرو ملتونو اړوند یوې ادارې ویلي، چې د غزې په محاصره شوې سیمه کې د اسراییل په روانو بریدونو کې هره ورځ په اوسط ډول ۶۳ ښځې وژل کېږي.
د انروا په وینا؛ هغه مېرمنې چې هره ورځ مړې کیږي په ډله کې یې ۳۷ مېندې شاملې دي.
وسله وال کسان د نایجریا په شمال لویدیځ کې یوه ښوونځي ته ننوتلي او ۱۵ ماشومان یې وتښتول. پولیسو ویلي دي، چې دا پېښه د شنبې په سهار شاوخوا ۴۸ ساعته وروسته هغه مهال رامنځته شوه، چې ۲۸۷ تنه نور محصلین یرغمل شوي.
د رویټرز خبري اژانس د یکشنبې په ورځ راپور ورکړ، چې د ښوونځي مالک لیمان ابوبکر باکوسو وویل، چې وسله وال د ګیدان باکوسو په سوکوتو کلي کې ښوونځي ته ننوتل او په پرله پسې ډول یې ډزې پیل کړې، چې د پولیسو له رسېدو دمخه یې ۱۵ ماشومان وتښتول.
د دغه رپوټ له مخې؛ د سوکوتو د پولیسو ویاند احمد روفاعي تایید کړې ده، چې وسله والو په سیمه ییز وخت د سهار په یوه بجه د ګیدان باکوسو په کلي کې په یوه اسلامي ښوونځي حمله وکړه او ۱۵ تنه زده کوونکي یې وتښتول.
تر اوسه کومې ډلې د دې پېښې پړه پر غاړه نه ده اخيستې.
روفاعي وويل، چې په سيمه کې د لارو بندېدل او د ژغورنې عمليات له ننګونو سره مخ کړي دي.
هغه زیاته کړه: "دا یو لېرې پروت کلی دی، چې موټر نه شي تلای، پولیس باید په موټرسایکل کلي ته ولاړ شي."
پولیسو وویل، په نایجیریا کې د ښوونځي تښتونه معمول دي، په ځانګړې توګه له هغه وخته چې اسلامپالو اورپکو په ۲۰۱۴ کال کې په بورنو ایالت کې د ښوونځي له ۲۰۰ زیاتې نجونې وتښتولې، چې نړۍ ټکان وخوړه.
د پولیسو په وینا؛ وسله والو ډلو له هغه وخت راهیسې د ښوونځي زده کونکي د باجګیرۍ لپاره تښتولي او تر اوسه یې لږ تر لږه ۱۴۰۰ تنه تښتولي دي.
دوه ورځې وړاندې د نایجریا په شمال لویدیځ کې د کادونا په ایالت کې د ښوونځي ۲۸۷ زده کوونکي په موټرسایکل سپاره وسله والو وتښتول. په تښتول شویو کسانو کې لږ تر لږه ۱۰۰ ماشومان هم شامل دي، چې عمرونه یې تر ۱۲ کلونو پورې دي.
په اندونیزیا کې چارواکو وویل، چې په سوماترا ټاپو کې د سختو بارانونو او ځمکې ښویېدو له امله لږ تر لږه ۱۹ کسان وژل شوي او اووه لادرکه دي. د راپورونو له مخې، د سې شنبې په ورځ د ( کپ ۱۹مه) د باران له امله ۲۰ زره کورونه وېجاړ شوي او ۴۶ زره کسان بې کوره شوي دي.
اندونيزيا د طبيعي پېښو پر وړاندې د مبارزې ادارې مشر دوني يوسريزال وويل: "تر اوسه پورې د ژغورنې ډلې د کوتو تاروسن په کلي کې اوه مړي موندلي او په ګاونډي کلي کې یې دوه مړي موندلي، لس نور لا هم تر خاورو لاندې دي."
هغه وويل، چې تر ٤٦٠٠٠ زيات کسان چې کورونه يې سېلابونو لاندې کړي وو، موقتي دولتي سرپناوو ته کډه شوي دي.
یوزریزال زیاته کړه، چې د برښنا بندیدو، بندو لارو او د خټو له امله د قربانیانو او ورکو کسانو د را ایستلو هڅې له خنډ سره مخ شوې دي.
هغه وویل، چې د جمعې په ورځ ناوخته له غره راپرېوتلې ونې او لویې ډبرې د لویدیځ سوماترا ټاپو په پاسیر سیلتان ولسوالۍ کې د غره کلیو ته را غورځېدلې دي.
دا لومړی ځل نه دی، چې په اندونیزیا کې د ځمکې ښویدنې او سیلابونو پیښې رامنځ ته کیږي، چې میلیونونه خلک په غرنیو سیمو یا نږدې میدانونو کې ژوند کوي.
د اندونیزیا د طبیعي پېښو پر وړاندې د مبارزې ادارې چارواکو ویلي، چې په ۲۰۲۳ کال کې په دغه هېواد کې د سختو بارانونو له امله د ځمکې ښویېدو له امله لږ تر لږه ۱۱ کسان وژل شوي او لسګونه نور لادرکه دي.
وال سټریټ ژورنال د قطري چارواکو له قوله لیکلي، چې که د حماس ډلې مشران د یرغمل شویو کسانو د خوشې کېدو او په غزه کې د اوربند له هوکړې سره مخالفت وکړي، له دې هېواده به و اېستل شي.
که څه هم اسراییل وایي، د اوربند په خبرو اترو کې د یرغمل شویو کسانو خوشې کېدل دوی ته لومړیتوب لري، خو د حماس یوه لوړپوړي چارواکي حسام بردان د دغه راپور په ردولو سره ویلي، د اوربند له هوکړې پرته به د روژې په میاشت کې تاوتریخوالی زیات شي.
منځګړي عربي هېوادونه هڅه کوي، چې د ۴۰ یرغمل شویو د خلاصون په بدل کې د ۴۰ ورځني اوربند وړاندیز یوې پایلې ته ورسوي.
د منځګړو عربي هېوادونو په خبره، حماس د اسراییلو له خوا د ژونديو یرغمل شویو کسانو د نوملړ وړاندې کول رد کړی.
بردان وال سټریټ ژورنال ته ویلي، چې ۶۰ تنه یرغمل شوي کسان وژل شوي او یو شمېر نور یرغمل شوي کسان چې د اسلامي جهاد او نورو ډلو تر ولکې لاندې دي، د هغوی د ځای مشخص کول ستونزمن دي.
د نوموړي په وینا، د حماس سیاسي مشران به د اوربند د وړاندیزونو په اړه د یکشنبې په ورځ په دوحه کې سره وګوري.
حماس د پنجشنبې په ورځ د کب په ۱۷مه اعلان وکړ، چې د اوربند په اړه یې خبرې درولې دي.
تېره اوونۍ د امریکا، مصر او قطر په منځګړیتوب د څلور ورځو لپاره د اوربند خبرې روانې وې او تمه ده چې دا خبرې نن په قاهره کې بیا پیل شي.
اخوا، جو بایډن د جمعې په ورځ ، د کب په ۱۸مه خبریالانو ته وویل، چې له روژې مخکې د جګړو ودرول "سخت بریښي."
وال سټریټ ژورنال د جمعې په ورځ د کب په ۱۸مه د باخبرو چارواکو په حواله راپور ورکړ، چې د حماس مشران یحیی سنوار او اسماعیل هنیه د اوربند د هوکړې د شرایطو په اړه اختلاف لري.
هنیه د شپږو اونیو لپاره د اوربند له وړاندیز سره موافق دی، خو سنوار بیا د جګړو د پای ته رسولو لپاره د اسراییلو د ژمنې غوښتونکی دی.
وال سټریټ ژورنال د مصري چارواکو له قوله لیکلي؛ سنوار په دې باور دی، اوس چې د اسراییل او امریکا ترمنځ د اختلافونو نښې لیدل کیږي، په مذاکراتو کې حماس مخکې دی.
دغه مخالفتونه په وروستیو ورځو کې د امریکا د ولسمشر د مرستیالې کامالا هریس د وینا په شمول څرګند شو.
نوموړې وويل: "په غزه کې د کړاوونو د زياتې کچې په پام کې نيولو سره بايد سملاسي اوربند وشي."
وال سټریټ ژورنال د مصري چارواکو له قوله همداراز لیکلي؛ یحیی سنوار هیله من دی چې د امریکا او اسرایلو ترمنځ د کړکېچ له امله به وکولی شي چې هوکړه د حماس په ګټه مخکې یوسي.
نوموړی د دايمي اوربند او له غزې څخه د اسرايلي ځواکونو د بشپړ وتلو لپاره هڅه کوي.
له دې سره، اسراییل ویلي چې د خبرو اترو ماتې به د دې لامل شي چې په رفح ښار کې پوځي عملیات دوام وکړي.
اسراییل په غزه کې رفح د حماس وروستۍ لویه اډه ګڼي، چې تر یو میلیون زیاتو فلسطینیانو پکې پناه اخیستې ده.
پېښور کې د پولیسو مشر ویلي، د پېښور په بورډ بازار کې په یوه موټرسايکل کې چاودېدونکو توکو چاودنه کړې چې له امله لږ تر لږه دوه کسان وژل شوي او یو ټپي دي. ويل کیږي د مرګ ژوبلې شمېرې لومړنۍ دي ښايي بدلون وکړي.
په پېښور کې پولیسو نن یکشنبه د (کب ۲۰مه) افغانستان انټرنشنل پښتو څانګې ته منلې چې د پېښور په بورډ بازار کې د ریکشاوو په تمځای کې په موټر سایکل کې د چاودېدونکو توکو د چاودنې له امله دوه تنه وژل شوي او یو تن ټپي دی.
پولیس وايي، دغه برید د پېښور پر وخت د سهار په اووه بجې شوی، چې په دغه سیمه کې ګڼې ګوڼه لږه وي.
پولیس وايي، کیدای شي دا یو ځانمرګی برید وي خو وايي اوس لا څیړنې روانې دي چې معلومه کړي دا پېښه څنګه شوې او هدف یې څه و.
پېښور کې پولیس وايي، په سیمه کې یې چانیز عملیات هم پیل کړي او هڅه کوي چې په دې اړه نور معلومات راټول کړي.
د دغه برید مسوولیت لا چا نه دی منلی.
ويل کیږي، چې نن له غرمې وروسته په پېښور کې د پاکستان تحریک انصاف عمران خان ګوند له لوري په ترسره شویو ټاکنو کې د شویو درغلیو په غبرګون کې یوه لویه غونډه جوړه کړي چې د عمران خان د ګوند ایالتي مشر او د خیبرپښتونخوا لپاره نوی ټاکل شوی اعلی وزیر علي امین ګنډاپور به هم پکې ګډون وکړي.
دا په تېرو وروستیو میاشتو کې په پېښور کې د خپل ډول لومړنۍ چاودنه ده چې کیږي.
تېر کال پر پاکستاني پولیسو د ځانمرګو او سړک غاړې بمي چاودنو څو پېښې شوې چې پولیسو ته یې مرګ ژوبله اړولې وه.
د پاکستان پوځ وايي، د خېبر پښتونخوا قبایلي سیمه شمالي وزيرستان کې یې د عملیاتو په مهال ۱۰ وسله وال وژلي او درې نور یې ټپيان کړي. د پوځ رسنیزې څانګې ويلي، دغه عملیات یې تېره ورځ شنبه د یو لړ استخباراتي معلوماتو پر بنسټ کړي او له وژل شویو یې یو شمېر وسلې هم نېولې.
د پاکستان پوځ په یوه خپره کړې خبرپاڼه کې ويلي چې د عملیاتو پر مهال د امنیتي ځواکونو او وسله والو تر منځ جګړه هم شوې، چې په پایله کې یې ۱۰ وسله وال وژل شوي.
ټي ټي پي په دې اړه لا څه نه دي ويلي.
د پوځ په خبرپاڼه کې راغلي چې دغو وسله والو په سیمه کې د دولتي کارکوونکو او پولیسو په وژنو کې لاس درلود او په سیمه کې یې امنیتي خنډونه رامنځته کړي وو.
په شمالي وزیرستان کې په ټي ټي پي پورې تړلې د حافظ ګل بهادر ډله فعاله ده او ډیر کله د پاکستان پر پوځ او پولیسو بریدونه کوي.
پوځ وايي، اوس هم په دغې سیمه کې په ترهګرو پسې د پلټنې عملیات روان دي.
په سیمه کې خبریال او د حالاتو څارونکي لال وزیر افغانستان انټرنشنل پښتو څانګې ته ویلي چې په پاکستان کې تر سیاسي بدلون وروسته، د دغه هيواد پوځ په خیبرپښتونخوا ایالت کې پوځي عملیات ډیر کړي او وسله وال په نښه کوي.
په خېبر پښتونخوا او بلوچستان ایالت کې د پاکستان په امنیتي ځواکونو بریدونو او چاودنو یو ځل بیا زور اخیستی او وخت نا وخت په پاکستاني پوځ او پولیسو وسله وال بریدونه او چاودنې کیږي.
