د طالبانو تر واک لاندې د هوا پوهنې ادارې ویلي چې په بدخشان، تخار، کندز، بغلان، پنجشیر، پروان، نورستان، کاپیسا، کابل، کونړ، ننګرهار، لغمان، لوګر، پکتیا او خوست ولایتونو کې به د باران کچه لوړه وي او دغه راز په ځینو سیمو کې به واوره هم ورېږي.
دغه راز د افغانستان په لویدیځ، سویل لویدیځ، سویلي برخو او سالنګونو کې د تېزو بادونو او توپانونو اټکل هم شوی دی چې سرعت یې په یو ساعت کې له ۲۰ تر ۷۵ کیلو متره ښودل شوی دی.
په دې وروستیو کې د افغانستان په زیاتو سیمو کې درنې واورې او شړکنده بارانونو ګڼو خلکو ته ځاني او مالي تاوانونه اړولي دي.
که څه هم چې یو شمېر خلک او کارپوهان د دغو واورو بارانونو ورېدل د روانې وچکالۍ د له منځه تلو لپاره ګټور بولي؛ خو د واورې بارانونو دغې څپې د ډېرو مالدارانو څاروي له منځه وړي او درانه زیانونه یې ور اړولي دي.
همدغه وړمه ورځ د هرات ولایت په یو شمېر ولسوالیو کې د (کب په ۲۱مه) د کورونو د ویجاړېدو له امله اووه تنه مړه شوي دي.
