د یحیی حافظ ګل بهادر په مشرۍ د ټي ټي پي یوه تازه ویډیو خپره شوې او جیو نیوز په یوه راپور کې ادعا کړې، چې یاده ډله د افغانستان او پاکستان تر منځ پر ډېورنډ کرښه د پاکستان پر امنیتي ځواکونو د برید پلان جوړوي.
جیو نیوز د یکشنبې په ورځ (د وري ۵مه) د دغې ویډیو په خپرولو سره ویلي؛ په ویډیو کې لیدل کیږي چې حافظ ګل بهادر د افغانستان اړوند سرحدي سیمه کې په پاکستان کې د برید لارښوونه کوي.
د راپور له مخې؛ په ویډیو کې دا هم لیدل کیږي چې د طالبانو یو قوماندان وایي:"موږ له پاکستانه د غچ اخیستلو ته چمتو یو."
په ویډیو کې د طالبانو مشر وايي، چې د پلان له مخې شپږ راکټونه د برید لپاره چمتو دي او دوی د خپل مشر ملا عبادالله حکم ته انتظار باسي.
دغه راز؛ په ویډيو کې یو شمېر جنګیالي هم لیدلي کیږي، چې د پاکستان پر ضد جنګېدو ته تیاری ښيي.
د افغانستان طالبانو بیا تر اوسه ددې ویډیو په تړاو کوم غبرګون نه دی ښودلی.
په دغه ویډیو کې چې دقیق وخت او سیمه یې نه ده معلومه ښودل کیږي، چې د ټي ټي پي قوماندان او غړي یې د افغانستان په خاوره کې دي.
پاکستاني چارواکو په ځلونو طالب چارواکو ته خبرداری ورکړی، چې پاکستاني طالبان د افغانستان له خاورې په استفادې سره پر پاکستان برید کوي.
طالبان بیا دا ادعاوې ردوي او وایي چې هیچا ته اجازه نه ورکوي، چې د افغانستان له خاورې امنیتي ګواښونه رامنځته کړي.
دا ویډیو تر هغه وروسته خپریږي، چې پاکستاني ځواکونو تېره اونۍ پر پکتیکا او خوست ولایتونو هوایي بریدونه وکړل، چې په پایله کې یې د دریو ماشومانو په ګډون اته ښځې ووژل شوې.
دا پېښه له پراخو غبرګونونو سره هم مخ شوه.
د طالبانو ویاند ذبیح الله مجاهد ویلي؛ که دا ډول بریدونه دوام وکړي پایلې به یې د دواړو هېوادونو لپاره ښې نه وي.
د دې معلوماتو له مخې؛ اسدبیک چې په ۱۹۹۹ کال کې زېږېدلی، له داعش سره تر یو ځای کېدو مخکې په روسیه کې زده کوونکی و.
مادیاروف اسدبیک په ټولنیزو شبکو کې د خپلو کاروونکو حسابونو کې د خپل شخصي ژوند په اړه معلومات خپاره کړي.
افغانستان انټرنشنل په فیسبوک او لینکین کې د دغه ځوان د کاروونکي اکاونټ کتلی، چې ښيي دغه ځوان په ۱۹۹۹ کال کې زېږېدلی او د ازبکستان د خوارزم ښار د اورنج سیمې له اصلي اوسېدونکو څخه و.
تر دې مخکې د طالبانو استخباراتو ته نږدې یوې ویب پاڼې المرصاد ویلي وو، چې د کندهار د وروستي برید عامل د منځنۍ اسیا د یوه هېواد تبعه و.
خو المرصاد څرګنده نه کړه، چې دغه ځانمرګی بریدګر د منځنۍ اسیا د کوم هېواد تبعه و.
په ټولنیزو شبکو کې د مادیاروف اسدبیک د کاروونکو حسابونه ښیي، چې هغه د داعش خراسان سره د یوځای کېدو دمخه د روسیې د سن پترزبورگ پولي تخنیک پوهنتون کې زده کړې کولې.
د دې معلوماتو له مخې؛ هغه د ۲۰۲۱ کال تر نومبر پورې په روسیه کې پاتې شوی.
پاکستاني امنیتي سرچینو افغانستان انټرنشنل ته ویلي، چې نوموړی په خراسان کې له داعش سره له یو ځای کېدو وروسته افغانستان ته تللی او له ۲۰۲۲ تر ۲۰۲۴ کال پورې په کندهار کې تر ځانمرګي برید پورې په افغانستان کې پاتې شوی دی.
د طالبانو استخباراتو ته نږدې یوې رسنۍ المرصاد مخکې لیکلي وو، چې د کندهار د برید عامل له پېښې څو ورځې وړاندې د پاکستان له بلوچستان ایالت څخه افغانستان ته راغلی و.
د پنجشنبې په ورځ (د وري د دویمه) په خونړي برید کې چې د کندهار ښار په لومړی امنیتي حوزه کې ترسره شو لږ تر لږه ۴۳ تنه ووژل شول او ۴۵ نور ټپیان شول. د داعش خراسان څانګې د دغه برید پړه پر غاړه اخیستې ده.
المرصاد د طالبانو د یوې امنیتي سرچینې له خولې ویلي، چې دغه ځانمرګی دوه میاشتې وړاندې د پاکستان په بلوچستان ایالت کې د داعش له خراسان څانګې سره یوځای شوی و او په دغه صوبه کې یې "نظریاتي او ایډیالوژیکه" روزنه تر لاسه کړې وه.
خو په ټولنيزو شبکو کې د مادیاروف اسدبیک خپاره شوي انځورنه ښيي، چې هغه تر دې وخته مخکې بنسټپالو افکارو ته لېوال و.
مادیاروف اسدبیک دوه کاله مخکې په لیکین کې یو انځور خپور کړی، چې هغه یې د خپل لاس ګوتې نیولې وې، لکه څنګه چې د داعش غړي معمولا په عکسونو کې کوي.
شاوخوا دوه کاله وړاندې یې په ټولنیزو شبکو کې یو بل عکس خپور کړی، چې پکې هغه په یوه کتابتون کې ناست دی او تر شا یې له دیني کتابونو ډکه المارۍ لیدل کیږي.
