د طالبانو د هوا پېژندنې اداره: په افغانستان کې د اورښتونو او سیلابونو د راوتلو اټکل شوی
د طالبانو د اوبو او انرژۍ وزارت د هوا پېژندنې ادارې په امو، شمال، هریرود، هلمند او د کابل په سينديزو حوزو کې د سختو اورښتونو او سیلابونو د راوتلو اټکل کړی دی.
د طالبانو د اوبو او انرژۍ وزارت د هوا پېژندنې ادارې په امو، شمال، هریرود، هلمند او د کابل په سينديزو حوزو کې د سختو اورښتونو او سیلابونو د راوتلو اټکل کړی دی.
دغې ادارې د دوشنبې په ورځ (د وري ۶مه) د یوې خبرپاڼې په خپرولو سره ویلي، چې د وري مياشتې له ۷ څخه تر ۹ نېټې پورې د هېواد د سیندیزو حوزو په ځینو برخو کې د تېزو بارانونو، د اوبو د کچې د لوړوالي او د سېلابونو د راوتلو احتمال شته.
په خبرپاڼه کې زیاته شوې ده، چې د کوکچې، تالقان، بغلان، سمنگان، بلخ، سرپل، میمنې، کوشک و کاشان، بادغیس، هرات، فراه، خاشرود، هلمند، ارغنداب، ترنک، غزني، پکتیکا، پکتیا، خوست، پنجشیر، غوربند، کابل، میدان وردک، کونړ او لغمان کې د سېلابونو او اوبو د کچې د لوړوالي اټکل شوی دی.
له څو اونیو راهیسې د هېواد په بېلابېلو سیمو کې د شدیدو اورښتونو او د سیلابونو د راوتلو له امله لسګونو کسانو ژوند له لاسه ورکړی، سلګونه کورونه ویجاړ شوي او زرګونه جریبه کرنېزې زیانمنې شوې دي.
د راپورونو له مخې؛ په فاریاب ولایت کې د وروستیو اوښتونو او سیلابونو له امله درېیو کسانو ژوند له لاسه ورکړی او ۳۵۰ کورونه ویجاړ شوي دي.
د یادولو ده، چې د طالبانو د اوبو او انرژۍ وزارت د هوا پېژندنې ادارې په خپره شوې خبرپاڼه کې له ټولو هېوادوالو غوښتي، چې د خپل ځان او ماشومانو د ساتنې لپاره د سیندونو په غاړو کې له هر ډول تګ او راتګ څخه ډډه وکړي، ترڅو د انساني او مالي زیانونو مخنیوی وشي.
