پاکستانۍ رسنۍ وايي، د خیبر پښتونخوا په ډېره اسمعیل خان کې د دغه هيواد د پوځ په عملیاتو کې څلور وسله وال وژل شوي دي. رسنیو د پوځ د خبرپاڼې له مخې ویلي چې، دغه وسله وال یې د چاڼیزو عملیاتو پر مهال په جګړه کې وژلي دي.
د پاکستاني پوځ د معلوماتو له مخې په دغو عملیاتو کې یې د مصطفی، قسیم الله او اسلام الدین په نومونو او یو بل وسله وال تېره ورځ دوشنبه د (وري شپږمه) د پاکستان امنیتي ځواکونو سره په مخامخ جګړه کې وژل شوي.
ویل کیږي د چاڼیزو عملیاتو پر مهال سخته جګړه شوې چې د پوځ لوري ته د مرک ژوبلې په اړه معلومات لا نه دي ورکړل شوي.
پاکستاني رسنیو د پوځ د خبرپاڼې له مخې ویلي، چې په دغو عملیاتو کې یې له یادو وسله والو څخه یو شمېر وسلې او مهمات هم نیولي دي.
تر اوسه پورې د دغو عملیاتو او زیانونو په اړه پاکستاني طالبانو لا څه نه دي ويلي.
له تېرو دوو میاشتو راهیسې د پاکستان پوځ، د خېبر پښتونخوا په قبایلي سیمو کې په وسله والو پسې چاڼیز عملیات پیل کړي چې وخت پر وخت یې وسله والو ته د درانه زیان د اوښتو خبرونو ورکړي دي.
خو وسله والو ډلو په ځانګړي ډول تحریک طالبان پاکستان بیا پوځ ته د مرګ ژوبلې د اړولو دعوې کړې دي.
په خېبر پښتونخوا او بلوچستان ایالت کې د پاکستان په امنیتي ځواکونو بریدونو او چاودنو یو ځل بیا زور اخیستی او وخت نا وخت پر پاکستاني پوځ او پولیسو وسله وال بریدونه او چاودنې کیږي.
همدا تېره شپه د بلوچستان په تربت کې د بلوڅ بېلتون پالې ډلې جنګیالي د پاکستان د هوايي سمندري ځواکونو پر مرکز بریدونه کړي وو چې پاکستاني پوځ او سمندري ځواکونو ته د اوښتو زیانونو په اړه لا معلومات نه دي خپاره شوي، خو پاکستانی پوځ وايي چې په دغو بریدونو کې څلور تنه بریدګر وژل شوي؛ خو د دوی ځواکونو ته مرګ ژوبله نه ده اوښتې.
