د فرانسې ولسمشر ایمانویل مکرون پر مسکو د داعش د خراسان څانګې وروستي برید ته په اشارې سره وویل، دغې ډلې څو میاشتې مخکې هڅه کوله چې پر فرانسې برید وکړي، خو ناکامه شوه. د فرانسې حکومت په مسکو کې تر برید وروسته امنیتي تدابیر تر ټولو لوړې کچې ته رسولي.
د مسکو په څنډه کې د کروکس ښار په تالار کې د داعش خراسان جنګیالیو په برید کې لږ تر لږه ۱۳۷ کسان وژل شوي او ۱۸۲ نور ټپیان شوي دي.
دغه برید په سیمه او نړۍ کې د داعش د فعالیتونو د پراخیدو په اړه نړیوال غبرګونونه او اندیښنې را پارولي دي.
روسیه د مسکو د برید پړه پر اوکراین اچوي، مکرون هم د روسیې دغه ادعا «خواشینونکې» بللې ده.
د فرانسې ولسمشر د دوشنبې په ورځ د فرانسې د استخباراتو او نورو سازمانونو څخه د ترلاسه شویو معلوماتو په حواله وویل چې «اسلامي دولت (داعش) د دې برید مسوولیت په غاړه اخیستی دی، دغه معلومات ښيي چې داعش خپله دغه برید پلان کړی او ترسره کړی دی.»
مکرون په فرانسه کې د بریدونو لپاره د داعش د خراسان څانګې هڅو ته اشاره وکړه او ویې ویل: «دغې ډلې په تېرو میاشتو کې زموږ پر خاوره د څو بریدونو هڅه کړې ده.» په دې لړ کې د فرانسې په ختیځ کې د ستراسبورګ په ښار کې د برید پلان و، چې د فرانسوي امنیتي ځواکونو له خوا شنډ شو.
د فرانسې لومړي وزیر ګابریل اتل په هیواد کې د لوړو امنیتي تدابیرو د زیاتولو خبر ورکړی. هغه د اورګاډي په تمځایونو، عبادت ځایونو، ښوونځیو او سینماګانو کې د ۳۰۰۰ پوځیانو ګزمې ته اشاره وکړه او زیاته یې کړه چې ۴۰۰۰ نور سرتېري به په (تیارسۍ) حالت کې وي.
د فرانسې د لومړي وزیر په وینا، دغه هېواد د روان کال له پیل راهیسې د دوو احتمالي بریدونو مخه نیولې ده.
فرانسه تر دې وړاندې هم د داعش د خونړيو بریدونو هدف ګرځېدلې وه. د ۲۰۱۵ کال په نومبر میاشت کې د داعش غړو په پاریس کې په څو ځایونو کې په یو لړ همغږو بریدونو کې ۱۳۰ کسان وژلي وو.
