د مارچ په میاشت کې، د درې کیلومترو په اوږدوالي د لاریو یو قطار غزې سره د اسراییل سرحدي دروازې ته څېرمه په یوې صحرا کې ولاړ و. په همدې ورځ، د لاریو یوه بله کرښه چې شاوخوا یو نیم کیلومتره اوږده وه، د غزې او مصر په سرحدي سیمه کې درېدلی پاتې وه.
دغه لارۍ په جګړه ځپلې غزه کې د ۲ میلیونو څخه د ډېرو فلسطینیانو لپاره د مرستو څخه ډکې وې، چې اولیه برخه یې خوراکي توکي جوړوي.
د مصر د سرې میاشتې د یوه چارواکي په وینا؛ له غزې څخه شاوخوا ۵۰ کیلومتره لېرې د مصر په العریش ښار کې په دې میاشت کې د مرستو نورې لارۍ چې شمېر یې ۲ زره ۴۰۰ ته رسي، هم ولاړې دي.
دغه بې حرکته د خوراکي توکو ډکې لارۍ، چې د غزې د خلکو لپاره د ژوندي پاتې کېدو اصلي هیله ده، په داسې حال کې د دغې تړانګې په دروازو کې ولاړې دي، چې هلته مخ پر زیاتېدونکی بشري بحران روان دی.
د اسراییل او حماس له جګړې د پنځې میاشتو په تېرېدو سره، د خوړو د نه خوندیتوب په اړه د نړۍوالې ادارې یو راپور خبرداری ورکړی، چې د غزې په ځینو برخو کې قحطي نږدې رامنځته شوې ده.
د غزې د نفوس ۷۵٪ د جګړو له امله بې ځایه شوې او نږدې ټوله سیمه په کنډوالو بدله شوې ده.
د لوږې له امله د ځپل شویو ماشومانو په اړه د راپورونو او انځورونو له خپرېدو وروسته، د متحده ایالاتو په مشرۍ نړۍوالې ټولنې په اسراییل فشار راوړی، چې غزې ته د لا زیاتو مرستو د انتقال لپاره اسانتیاوې برابرې کړي.
واشنګټن د هوا له لارې هم غزې ته ځینې مرستې غورځولي دي او په دې وروستیو کې یې اعلان کړی، چې د غزې په سواحلو د مرستو د رسولو لپاره یو سمندریځ دهلیز رامنځ ته کړي.
د ملګرو ملتونو چارواکو اسراییل تورن کړی، چې غزې ته د بشري مرستو د رسولو مخه نیسي.
د اروپايي ټولنې د بهرنۍ تګلارې مشر پر اسراییل تور پورې کړ چې له لوږې څخه د یوې وسلې په توګه کار اخلي. د مرستندویه ادارو چارواکي وايي، چې د اسراییلو محدودیتونو پر خوراکي توکو د بار لاریو حرکت خورا ډېر ځڼډولی دی.
