د پاکستان د سوداګرۍ وزارت معین خرم اغا په مشرۍ د دغه هېواد یو څلور کسیز پلاوی چې پرون د دوشنبې په ورځ کابل ته رسېدلی، تمه کېږي چې نن به د دوه اړخیزې سوداګرۍ او د پاکستان له لارې د افغان دهلیز پر سوداګرۍ له طالب چارواکو سره خبرې اترې وکړي.
په دې غونډه کې د افغان پلاوي مشري د طآلبانو د صنعت او سوداګرۍ وزیر نورالدین عزیزي کوي.
پاکستانۍ رسنیو د دغه هېواد او افغانستان تر منځ د ترینګلتیاوو سربېره، د سوداګرۍ په برخه کې په کابل کې روانې خبرې یو مثبت پرمختګ ګڼلی.
که څه هم پاکستاني او افغان سوداګرو تل دا غوښتنه کړې، چې سوداګري باید له سیاسي چارو لرې وساتل شي؛ خو تېر ته په کتو هره وړه لانجه د دې لامل شوې، چې د دواړو هېوادونو پر سوداګرۍ خپل سیوری وغوړوي.
دا د مارچ په ۱۸مه په پکتیکا او خوست ولایتونو کې د پاکستان له هوايي بریدونو وروسته افغانستان ته د پاکستاني پلاوي لومړنی سفر دی.
پاکستان د مارچ په ۱۸مه په پکتیکا او خوست ولایتونو کې ځینې ځایونه په نښه کړل او په وینا یې، دوی په دغو بریدونو کې د حافظ ګل بهادر ډلې او د کالعدم تحریک طالبان مرکزونه په نښه کړي دي؛ خو طالبانو بیا ویلي و، چې په دغو بریدونو کې ولسي وګړي وژل شوي وو.
له بل پلوه په پاکستاني پلاوي کې د دغه هېواد د کورنیو چارو وزارت یو استازی خوشحال خان هم شامل دی، چې په وینا یې د سوداګرۍ ترڅنګ به د قاچاقو په مخنیوي کې هم له طالب چارواکو سره خبرې وکړي.
هغه پاکستانۍ رسنیو ته په خبرو کې ویلي:« د قاچاقو مسله د پاکستان لپاره حساسه ده؛ ځکه چې دا د پاکستان محصولاتو ته زیان رسوي. که څه هم پاکستان د قاچاقو د مخنیوي لپاره افغانستان ته سترګې په لاره دی؛ خو د قاچاقو مخنیوی هم د پاکستان مسوولیت دی، ځکه باید د پولو د څارنې سیسټم سخت کړي او د هغو عناصرو پر ضد چې په قاچاقو کې لاس لري، کوټلي ګامونه واخلي.»
ورته مهال د افغانستان د سوداګرۍ وزارت ویاند عبدالسلام جواد پاکستانۍ ورځپاڼې ته ویلي، د پاکستان د پرېکړو له امله د پاکستان له لارې د افغانستان ټرانزیټي سوداګري ۵۰ سلنه کمه شوې او افغان سوداګرو ایران ته مخه کړې او اوس د بندرونو له لارې مالونه واردوي.
د خیبر پښتونخوا د پاکستان او افغانستان د سوداګرۍ او صنایعو د ګډې همغږۍ مشر ضیاءالحق سرحدي وايي، افغانستان د خپلې سوداګرۍ ۷۰ سلنه برخه د ایران بندرونو ته لېږدولې، چې له امله یې په پاکستان کې زرګونه کسان بېکاره شوي دي.
هغه ویلي، چې پاکستان او افغانستان هوکړه کړې وه، چې دوه اړخیزه سوداګري پنځه مېلیارده ډالرو ته ورسوي؛ خو اوس د سوداګرۍ کچه له یو مېلیارد ډالرو څخه کمه شوې ده.
