حبیب الرحمن حکمتیار له دولتي کور څخه د ګلبدین حکمتیار د ویستلو په غبرګون کې د طالبانو د حکومت پر خپلسرۍ نیوکه کړې او له دولتي کوره د خپل پلار ویستل یې "بې احترامي او نامناسب عمل" بللی. هغه ویلي: "د طالبانو په حکومت کې نږدې هرڅوک ځان ته امیرالمؤمنین دی."
د حکمتیار زوی د دوشنبې په ورځ په ایکس ټولنیزې شبکې یو پیغام کې لیکي، چې طالبان ځان د حزب اسلامي له مشر سره د پخواني حکومت د هوکړې پابند نه بولي او له طالبانو سره له میاشتو خبرو وروسته یې خپل د اوسیدو ځای بدل کړی دی.
د اشرف غني حکومت د ۱۳۹۵ کال په تلې میاشت کې له حزب اسلامي سره یو هوکړه لیک لاسلیک کړ چې له مخې یې دغه ګوند د امتیازاتو او قضايي مصونیت په بدل کې له افغان حکومت سره خپله جګړه پای ته ورسوله.
حبیب الرحمن حکمتیار پر طالبانو نیوکه کړې او ویلي یې دي: «دوی په خپل منځ کې پر لویو او وړو مسایلو کې په شورا او رای ورکولو باور نه لري» او په خپله اداره کې د وګړو وړتیا او پوهې ته پام نه کوي.
د طالبانو د عدلیې وزارت په دې وروستیو کې اعلان کړی و، چې په افغانستان کې یې شاوخوا دوه میلیونه جریبه غصب شوې ځمکه بیرته نیولې ده. طالبانو ویلي، چې د حکمتیار کور د افغانستان د دفاع وزارت په ځمکه کې جوړ شوی دی.
د حزب اسلامي د مشر زوی وویل، چې د دوی ګوند نه دغه ځمکه په زور اخیستی او نه یې کوم غیر قانوني کار کړی دی. هغه له طالبانو څخه پوښتنه کړې، چې ولې د هغو کورنو په اړه ځواب نه وايي، چې خپلو ټولو چارواکو ته یې ورکړي دي؟
هغه وویل چې د طالبانو حکومت شفاف نه دی او په کې خپلسري روانه ده. حبيب الرحمن ليکلي: "تقريباً هر څوک په خپل ځای کې اميرالمومنين دى، نه وزير په خپل وزارت کنټرول لري، نه د رییس الوزرا تر لاس لاندې کابینه خپل کارونه پر مخ وړي او نه هم لکه دفاع او داخلې مهم وزارتونه د وزیرانو تر کنټرول لاندې خپلې چارې پر مخ وړي. دوی حتا په ولایتونو او نورو ریاستونو کې د کسانو له ګمارلو عاجز او بې خبره دي."
