د امریکا بهرنیو چارو پخوانی وزیر وايي، په مسکو کې د کنسرت په تالار کې د داعش «خونړی» برید د دې ښکارندوی دی چې داعش ډله لا هم ګواښ دی. مایک پمپیو ویلي، چې د افغانستان په اړه د بایډن ادارې چلند د داعش ډلې ګواښ لا زیات کړی.
په مسکو کې له وروستي خونړي برید وروسته چې مسوولیت یې داعش خراسان ډلې منلی، په سیمه کې د دغې ډلې د فعالیت د زیاتېدو په اړه اندېښنې راپورته شوې دي.
تر دې مخکې د امریکا جګپوړي سناتور لینسي ګراهام هم په افغانستان کې د داعش پر مرکزونو د برید غوښتنه کړې وه. ښاغلي ګراهام خبرداری ورکړ، مخکې له دې چې ډېر ناوخته شي، امریکا باید په افغانستان کې د داعش خراسان پر ضد ګامونه واخلي.
که څه هم طالبان د داعش د ځپلو ادعا کوي، خو داعش ډلې د طالبانو د حکومت پر مهال په ځلونو د ولسي وګړو او طالب ځواکونو پر ضد د ګڼو بریدونو مسوولیت پر غاړه اخیستی دی.
ځینې هیوادونه په ځانګړي ډول د منځنۍ اسیا هېوادونه له افغانستان څخه خپلو هېوادونو ته د داعش د فعالیتونو له پراخېدو اندېښمن دي.
د ملګرو ملتونو امنیت شورا هم په یوه خبرپاڼه کې ویلي، چې په افغانستان کې د داعش ګواښ لا هم پر ځای دی.
