د طالبانو د کانونو او پټرولیم وزارت وايي، دوی له قراردادي شرکته غوښتي چې د دغه کان د سپړلو عملي چارې دې ژر پیل کړي. له دغه وزارته په خپره شوې خبرباڼه کې ویل شوي، چې شهاب الدین دلاور د مس عینک کان د قراردادي شرکت له مشر «سانګ» سره په لیدنه کې د دغې پروژې د ژر پیلېدا غوښتنه کړې.
که څه هم چې په خبرپاڼه کې ډېر جزییات نه دي خپاره شوي او دا هم نه ده روښانه شوې، چې د دغه پروژې د پیلیدا په مخکې خنډونه څه دي؛ خو تر دې وړاندې داسې ګونګوسې وې، چې د دغې پروژې په تړون کې د دواړو خواوو تر منځ ځینې ستونزې راولاړې شوې دي.
په افغانستان کې د طالبانو له بیا واکمنېدو شاوخوا دوه نیم کاله تېر شوي او په دغې موده کې طالبانو په وار، وار د یادې پروژې د ژر پیلېدا خبره کړې؛ خو لا هم د دغه خنډ او ځنډ په اړه خلکو ته څه نه دی ویل شوي.
د مس عینک د کان تړون د یوې چینايي کمپنۍ سره د ۲۰۰۸ کال د اپرېل په ۲۵ لاسلیک شوی، له هماغه مهاله تر اوسه د دغې پروژې کار د ناڅرګنده لاملونو له امله ځنډېدلی دی.
د تېر جمهوري نظام پر مهال انګېرنې دا وې، چې په سیمه کې طالبان په واک کې وو او قراردادي شرکت د امنیتي لاملونو له امله د پروژې پیلېدا ته زړه نه ښه کاوه؛ خو اوس یې ښايي د خنډ لامل دا وي، چې د طالبانو واکمني تر اوسه د نړۍ هیڅ یوه هېواد هم په رسمیت نه ده پېژندلې.
