د ایران د بهرنیو چارو وزیر په سوریه کې د دغه هېواد پر قونسلګرۍ له برید وروسته ویلي، چې نتنیاهو په غزه کې له پرلپسې ماتو وروسته خپل ذهني توازن له لاسه ورکړی دی او دغه برید د نړۍوالو اصولو خلاف عمل دی.
د لومړنیو راپورونو له مخې، په دې پېښه کې د ایران د سپاه پاسداران د لوړپوړي قومندان محمد رضا زاهدي په ګډون شپږ کسان وژل شوي دي.
تر برید وروسته د ایران د بهرنیو چارو وزیر حسین امیرعبداللهیان د سوریې د بهرنیو چارو له وزیر فیصل مقداد سره په خبرو کې دغه برید په کلکو ټکو غندلی دی.
حسین امیرعبداللهیان ویلي دي: "نتنیاهو په غزه کې د پر له پسې ماتو او موخې ته د نه رسېدو له امله خپل رواني تعادل له لاسه ورکړی."
له دې سره د سوریې د بهرنیو چارو وزیر بیا په دمشق کې د ایران په سفارت د اسراییل برید د نړۍوالو مقرراتو نقض بللی دی.
د ایران د بهرنیو چارو وزیر دغه راز ویلي، چې د دې برید د مسوولیت پایلې صهیونیستي رژیم ته متوجې دي.
نوموړي په دې تړاو د نړۍوالې ټولنې پر جدي غبرګون ټینګار وکړ.
له دغه روغتونه د اسراییلي ځواکونو تر وتلو وروسته په سلګونو خلکو چې له عملیاتو مخکې یې هلته پناه اخیستې وه؛ روغتون ته مخه کړه چې هلته اوښتی زیان وګوري او خپل وسایل تر لاسه کړي.
د اسراییل پوځ ویلي، چې د روغتون په سیمه کې یې د حماس سلګونه وسله وال وژلي او یا یې نیولي دي، وسلې او استخباراتي اسناد یې ترلاسه کړي، دوه سرتېري یې هلته په جګړه کې له لاسه ورکړي؛ خو هڅه یې کړې چې ملکي وګړو، ناروغانو او ډاکټرانو ته د زیان مخه ونیسي.
حماس او ډاکټران په روغتونونو کې د وسله والو شتون رد کړی دی.
په غزه کې د حماس د رسنیو دفتر ویلي؛ اسراییلي ځواکونو د الشفا روغتون شاوخوا سیمو کې نږدې ۴۰۰ فلسطینیان وژلي، چې په کې یوه ډاکټره مېرمن او د هغې زوی هم شامل دي او دغه طبي مرکز یې له فعالیته غورځولی دی.
اسراییل لا په دې اړه کوم غبرګون نه دی ښودلی.
د حماس د رسنیو د دفتر مشر اسماعیل الثوبته وویل: «اشغالګرو د الشفا طبي کمپلکس دننه ټولې ودانۍ ویجاړې کړې او سوځولي یې دي. هغوی انګړ پر بلډوزر ړنګ کړی، د لسګونو شهیدانو جسدونه یې په خټو کې ښخ کړي او دغه ځای یې په یوه ډله ییز قبر بدل کړ.»
د غزې د ملکي بېړنیو خدماتو یوه ویاند ویلي، چې اسراییلي ځواکونو دوه کسان په روغتون کې وژلي، چې جنازې یې هلته په داسې حال کې موندل شوي چې په لاسونو کې یې ولچکونه پراته وو.
په همدې حال کې اسراییلي ځواکونو د مړو د ښخولو لپاره په روغتون کې ځمکه په بیلدوزر کندلې او بیا یې مړي په ډله ییزه توګه وراچولي دي.
اسراییلي پوځ د دغو تورونو په اړه له څرګندونو ډډه کړې ده.
