د اکسیوس ویب پاڼې د دریو اسراییلي او امریکایي چارواکو په حواله راپور ورکړی چې تمه کیږي امریکا او اسراییل د دوشنبې په ورځ یو انلاین غونډه وکړي. راپور کاږي، چې په دغه غونډه کې به په رفح ښار باندې د اسراییل برید د بدیلو لارو په اړه د بایډن د وړاندیزونو په هکله خبرې اترې وشي.
یوه اسراییلي چارواکي ویلي دي چې راتلونکې اوونۍ به مخامخ غونډه هم جوړه شي.
الجزیرې خبر ورکړی، چې شاوخوا یو میلیون فلسطینیانو د غزې په سوېلي ښار رفح کې پناه اخیستې ده.
اسراییل ویلي چې غواړي پر دې سیمه برید وکړي، خو د امریکا د ولسمشر جوبایډن ادارې یې مخالفت کړی دی.
د اسراییل د لومړي وزیر دفتر د جمعې په ورځ، د ۱۴۰۲ کال د کب ۲۶مه اعلان وکړ چې بنیامین نتنیاهو د رفح ښار د برید پلان تصویب کړ.
ښاغلي نتانیاهو تر دې مخکې د ځمکنیو عملیاتو پر ترسره کولو ټینګار کړی او ویلي یې دي چې «اسراییل به په رفح کې کار پای ته ورسوي.»
