دغه ادارې په تېرو درېیو ورځو کې ۴۴ ټانکره بې کیفیته تېل د شیخ ابونصر فراهي بندر له لارې بېرته ایران ته ورګرځولي دي. د طالبانو د سټنډرډ ادارې د سه شنبې په ورځ د (وري ۱۴مه) پر خپلې اېکس پاڼه لیکلي چې، د شیخ ابو نصر فراهي بندر له لارې ۱۰ ټانکره بې کیفیته تېل بېرته وګرځول شول.
دغه تېل له ایرانه د فراه له لارې افغانستان ته واردېدل.
طالبانو ویلي، د یادو تېلو کیفیت د دوی د سټنډرډونو سره سم نه و او افغانستان ته یې د راتللو مخه نیول شوې ده.طالبانو له سوداګرو څخه غوښتنه کړې، چې افغانستان ته د بې کیفیته تېلو له واردولو ډډه وکړي.دا په داسې حال کې ده، چې طالبانو د تېرو دریېو ورځو راهیسې د فراه له لارې له ایران څخه د بې کیفیته تېلو بار ۴۴ ټانکرونه بېرته ایران ته ور ګرځولي دي.
د ډان ورځپاڼې په تازه خپور شوي راپور کې راغلي، د سند حکومت پرېکړه کړې چې له ۶۷زره څخه د زیاتو راجستر شویو افغان کډوالو یا د (اېسيسي) لرونکو کارټونو کسان به له کوچني اختر وروسته خپل هېواد ته ستانه کړي.
باخبرو سرچینو ډان ورځپاڼې ته ویلي، چې د لوړې کچې په غونډه کې د فدرالي حکومت د پرېکړې له مخې د هغو افغانانو د بېرته ستنېدو پر چمتووالي خبرې وشوې چې د اېسيسي کارتونه لري.
د سند د کورنیو چارو وزیر ضیا لنجار په مشرۍ دغې غونډه کې پرېکړه شوې، د اېسيسي کارټونه چې په ۲۰۱۷کال کې وېشل شوي حکومت ته اعتبار نه لري.
له بل پلوه د دغه وزارت معین محمد اقبال ميمن د غونډې ګډونوالو ته ویلي، د كورنيو چارو وزارت پرېكړه كړې چې د بې اسناده بهرنیانو د ستنولو د پلان دویمه لړۍ به له اختر وروسته پېل شي.
هغه وویل، چې د بې اسناده بهرنیانو پر ضد به اقدام وشي او په دې کې به د (اېسيسي) او (پي او ار) کارتونو لرونکي کسان هم شامل وي.
د دغې صوبې د کورنیو چارو وزیر لارښوونه وکړه، چې د پولیسو سره په همغږۍ دې د بېرته ستنېدو لړۍ پیل کړي.
د مالوماتو له مخې، په لومړي پړاو کې به څه باندې ۴۰ زره افغانان خپل هېواد ته ستانه کړای شي.
بل پلو د طالبانو د کډوالو او بېرته راستنېدونکو چارو وزارت هم په اېکس پاڼه خبر ورکړی، چې په پاکستان کې د کډوالو د اتشې مرستیال له یوشمېر کډوالو سره په راولپنډۍ او چکوال کې لیدلي دي.
د دغه وزارت په وینا، په دغې لیدنه کې افغان کډوالو د (اېسيسي) او (پي او ار) کارټونو په اړه چې موده یې مخ په ختمېدو ده، خپلې ستونزې شریکې کړې.
د کډوالو د اتشې مرستیال دغو کډوالو ته ویلي، چې د (اېسيسي) او (پي او ار) کارټونو درلودونکي به د هیڅ ډول فشار له مخې ونه شړل شي؛ بلکې د درې اړخیزې ګډې هوکړې له مخې به د ستنېدو لړۍ په خپله خوښه، عزت او درناوي بې له کوم فشاره ترسره شي.
د طالبانو کډوالو او راستنېدونکو چارو وزارت وايي، له ایران او پاکستانه ۱۱۰۳ افغان کډوال په زور او خپله خوښه راستانه کړل شوي. په دغو کډوالو کې ۹۸۳ کډوال له ایران څخه او ۱۲۰ کډوال له پاکستانه راستانه شوي دي.
د طالبانو کډوالو او راستېدونکو چارو وزارت د سه شنبې ورځ د (وري ۱۴مه) نېټه په اېکس پاڼه لیکلي چې د افغان کډوالو ۲۴ کورنۍ چې د غړو شمېر یې ۱۲۰ تنه کیږي د ننګرهار تورخم له لارې د وري ۱۳مه نېټه هېواد ته په زور راستنې کړل شوې دي.
کډوالو وزارت وړاندې وايي، راستانه شوي کډوال یې تر ثبتېدو وروسته د کډوالو عالي کمیشنرۍ او د کډوالو نړېوال سازمان ته د مرستو ترلاسه کولو په موخه ور پیژندلي دي.
بلخوا د طالبانو کډوالو وزارت ويلي له ګاونډي هیواد ايران څخه هم ۹۸۳ افغان کډوال چې په دوی کې کورنۍ او مجرد کسان شامل و د وري میاشتې په ۱۳مه نېټه د هرات ولایت اسلام کلا له پولې په خپله خوښه او زور را اړول شوي دي.
دغه وزارت وايي، په دغو راستنو شويو افغان کډوالو کې ۳۰ تنه بې سرپرسته ماشومان هم دي چې په هرات کې د وارچایلډ موسسې ته د دوی د کورنیو تر موندولو پورې ورسپارل شوي دي.
ويل کیږي، په دغو کډوالو کې یو شمېر چې وړ پیژندل شوي ورسره ځینې نغدي او روغتیايي مرستې هم شوې دي.
د طالبانو حکومت په سر کې ژمنې کړې وې چې له ګاونډیو هیوادونو ورتلوونکو کډوالو سره د مرستو تر څنګ به دوی ته د اوسېدو لپاره ځمکې ویشي خو اوس ډیری هغه کډوال چې افغانستان ته تللي وايي، چې لا یې برخلیک نه دی معلوم او ځمکې یې نه دي ترلاسه کړې.
د طالبانو د کډوالو او راستنېدونکو چارو وزارت وايي، په ۱۴۰۲ کال کې له ګاونډیو هیوادونو څخه افغانستان ته یونیم ميلیون کډوال راستانه شوي دي.
په دې وروستیو کې پاکستاني رسنیو راپور ورکړی، چې د ۲۰۲۴ کال د مارچ تر ۱۲مې نېټې له پاکستانه د ټولو ستنو شویو بې اسناده افغانانو شمېر تر ۵۱۳ زرو او ۵۰۶ ته لوړ شو او په وینا یې د ستنېدو دغه لړۍ لاهم روانه ده.
د افغانستان لپاره د ملګرو ملتونو سازمان د ځانګړې استازې مرستیال ښاغلي اندریکا راتوت وایي، چې د ګاونډیو هېوادونو لهخوا د افغان کډوالو جبري اېستل د کډوالۍ د نړۍوالو قوانینو خلاف کړنه ده.
د طالبانو د ریاست الوزرا اداري مرستیال عبدالسلام حنفي د افغانستان لپاره د ملګرو ملتونو سازمان د ځانګړې استازې مرستیال ښاغلي اندریکا راتوت سره وکتل.
د طالبانو د رسنیو مرکز لهخوا په خپرې شوې خبرپاڼه کې راغلي، چې په دې کتنه کې لومړی اندریکا راتوت له افغانانو په ځانګړي ډول د هرات زلزله ځپلو او له بېلابېلو هېوادونو څخه راستنو شویو کډوالو ته د بشري مرستو د وېش په برخه کې د طالبانو د همکاریو د مننې ترڅنګ د سراسري امنیت، د نشهیي توکو د قاچاق، سوداګرۍ او د اداري فساد د مخنیوي هرکلی وکړ.
د ملګرو ملتونو د ځانګړې استازې مرستیال وویل، له افغانانو سره د نړۍوالې ټولنې مرستې به دوام ولري او د طالبانو مسوولینو څخه یې غوښتي، چې مستحقو افغانانو ته دې د مرستو په رسولو کې همکاري وکړي.
له بل پلوه د طالبانو د ریاست الوزرا اداري مرستیال عبدالسلام حنفي هم په دغې لیدنه کې ویلي، چې له ګاونډیو هېوادونو څخه په زور د افغان کډوالو را اېستلو پروسه د ټولو نورمونو خلاف ترسره کېږي او د طالبانو مسوولین مستحقینو ته د بشري مرستو رسولو په پروسه کې له نړۍوالو او مرسته کوونکو سازمانونو سره همکار دي.
تر دې وړاندې د بښنې نړۍوال سازمان ویلي و، چې له پاکستانه د افغان کډوالو شړل به ښځې او نجونې له ځانګړي ګواښ سره مخامخې کړي.
دغه سازمان په اېکس پاڼه لیکلي و، چې د پاکستان حکومت باید ټولې جبري ستنونې ودروي او د کډوالو ښځو او نجونو د خوندیتوب لپاره دې مثبت ګامونه واخلي.
تر دې وړاندې پاکستانۍ رسنۍ اکسپرېس ټربیون هم راپور ورکړی و، چې د رسمي سرچینو په وینا د پاکستان حکومت لهخوا د افغان کډوالو په اړه معلومات راټول شوي او په دې کې هغه کسان هم شامل دي چې په دغه هېواد کې په قانوني توګه مېشت دي.
ټربیون د دوو چارواکو له قوله لیکلي و، چې په راتلونکو اونیو کې به د افغان کډوالو د اېستلو دویمه لړۍ پیل شي.
په خیبر پښتونخوا کې یوه لوړ پوړي دولتي چارواکي ویلي و، چې دا ځل د قانوني کډوالو په اړه هم د معلوماتو راټولولو او اېستلو د نقشې لپاره لارښوونې ورکړل شوې دي.
ورته مهال وړمه ورځ د ایران د کرمانشاه د کډوالو او بهرنیو وګړو د چارو عمومي مشر هم ویلي و، چې د "ناقانونه" کډوالو د پېژندلو، نیولو او شړلو د پلان په پلې کېدو سره به دغه کډوال په بشپړه توګه و اېستل شي.
حمزه سلیماني ویلي، چې تېر کال د دغه پلان په پلې کېدو سره ډېر شمېر افغانان له دغه هېواده شړل شوي دي.
د طالبانو د بهرنیو چارو وزارت په دمشق کې د ایران پر کونسلګرۍ د برید غندنه کړې او وايي، اسراییلي رژیم د ډیپلوماټیکو نورمونو څخه سرغړونه کوي.
د طالبانو د بهرنیو چارو وزارت د سه شنبې په ورځ د (وري ۱۴مه) د یوې خبرپاڼې په خپرولو سره د سوريې په پلازمېنه دمشق کې د ایران د سفارت پر کونسلګرۍ برید غندلی او یاد برید د ډیپلوماټیکو نورمونو څخه سرغړونه بولي.
د دغې ډلې د بهرنیو چارو وزارت له لوري په خپره شوې خبرپاڼه کې د نړۍ او سیمي له اغېز لرونکو هېوادونو څخه غوښتنه کړې چې، د اسراییلي رژیم له لوري پر غزې تړانګه کې د جنایتونو مخنیوی وکړي.
په خبرپاڼه کې ویل شوي:« د سوریې په پلازمېنه دمشق کې د ایران اسلامي جمهوریت د سفارت پر کونسلګرۍ څانګه شوی بريد له ډيپلوماټيکو نورمونو ښکاره سرغړونه او په سيمه کې د ناامنۍ د پراختيا پاروونکی اقدام دی او په کلکه يې غندنه کوو.»
همدارنګه طالبانو ویلي چې، د اسراییلي رژیم له لوري پر غزې د بریدونو دوام د سیمې او نړۍ امنیت ته په یوه جدي ګواښ بدل شوی.
د سوریې په پلازمینه دمشق کې د ایران قونسلګري د دوشنبې په ورځ په یوه برید کې په بشپړه توګه ویجاړه شوې، چې د سوریې او ایران رسنۍ یې د اسراییل هوايي برید بولي.
د طالبانو د ریاست الوزا اداري مرستیال عبدالسلام حنفي په بهرنیو چارو وزارت کې د روژه ماتې په جوړې شوې مېلمستیا کې د خپلې وینا پرمهال ویلي، چې دوی له ټولو هېوادونو سره د متقابل تعامل او درناوي پر بنسټ د ښو اړیکو غوښتونکي دي.
د طالبانو ترکنټرول لاندې ارګ په اېکس پاڼه خبر ورکړی، دغه مېلمستیا چې تېر ماښام جوړه شوې وه پکې د بېلابېلو هېوادونو د سفارتونو مسوولینو، استازو، ډیپلوماتانو او د یوناما مسوولینو ګډون کړی و.
ښاغلي حنفي ویلي، د دوی له واکمنۍ وروسته په افغانستان کې بشپړ امنیت ټینګ شوی، د نشهیي توکو کښت، قاچاق، سوداګري او کارول منع شوي، اداري فساد له منځه تللی او د مطبوعاتو فعالیت دوام لري. په نشهیي توکو روږدي کسان راټول شوي او په دې وروستیو کې له یو مېلیونه زیات افغان کډوال چې له ګاونډیو هېوادونو څخه په زور را اېستل شوي وو، په ښه توګه مدیریت شوي دي.
د ښاغلي حنفي په وینا، دوی د سیمې او له سیمې ور اخوا ټولو هېوادونو څخه غواړي چې نورو هېوادونو ته د ځوانانو د کډوالۍ د مخنیوي، د نشهیي توکو د ختمېدو او په افغانستان کې د ټیکاو د تضمین لپاره د افغان ټرانس، هرات - بولدک، چاه بهار بندر، لاجورد لارې، واخان کوریډور او ټاپي لویو پراختیایي پروژو د تطبیق لپاره پانګونه وکړي.
هغه زیاته کړې، چې په افغانستان کې امنیت نه یوازې د دغه هېواد د اوسېدونکو لپاره اړین دی؛ بلکې د سیمې او نورو هېوادونو په ګټه هم دی، له همدې امله په افغانستان کې د ټیکاو د پایېښت لپاره په بېلابېلو برخو کې پانګونه اړینه ده.
هغه د کاسا زر پروژې د عملي کېدو په برخه کې د نړۍوال بانک له اخیستل شوي ګامه مننه وکړه.
ښاغلي حنفي له ګاونډیو هېوادونو څخه د افغانانو د جبري اېستنې منفي اغېزو ته په اشارې سره ویلي، په دې برخه کې باید جدي پاملرنه وشي. دا کار دوه اړخیزه اړیکو او د ګاونډیتوب موضوع کې مرسته نه کوي.
هغه زیاته کړه:« موږ د نړۍ له ټولو هېوادونو سره د ښو اړیکو غوښتونکي یو او غواړو، چې افغانستان یو اقتصاد محوره هېواد وي او د هیڅ هېواد په کورنیو چارو کې لاسوهنه نه کوي او غواړو، چې نور هېوادونه هم د افغانستان په کورنیو چارو کې لاسوهنه ونه کړي.»
ښاغلي حنفي د خپلې وینا پرمهال د غزې په اړه ویلي، چې دوی په غزه کې د «صهیونیستانو» بې رحمانه بریدونه او د فلسطین ملت عام وژنه په ټوله مانا غندي او په غزه کې د ټولو بشري او نړۍوالو اصولو خلاف دغه ترسره کېدونکي بریدونه ټول نړۍوال نظم او قوانین تر پوښتنې لاندې راولي.
ښاغلي حنفي په ایران، روسیې او پاکستان کې وروستي ترسره شوي بریدونه غندلي او ویلي یې دي:« موږ دغه بریدونه چې د عامو خلکو د وژنې لامل کېږي غندو.»
که څه هم چې طالبانو تل په بېلابېلو ناستو کې له نړۍوالو غوښتي، چې د دوی غوښتنو ته دې پاملرنه وکړي؛ خو دوی د دوه نیم کاله واکمنۍ په ترڅ کې د هیڅ یوه هېواد غوښتنه نهده منلې او نه یې د هغو غوښتنو ته پاملرنه کړې، نړۍوالو هره پلا په افغانستان کې بشري حقونو ته د پاملرنې او په دغه هېواد کې د ټولګډونه حکومت د جوړېدو په پار له طالبانو بیا، بیا غوښتنې کړې؛ خو دغې ډلې نه یوازې دا چې د نړۍوالو غوښتنې یې نه دي منلي، بلکې هغوی ته یې په خپلو کورنیو چارو کې د لاسوهنې نوم هم ورکړی دی.