د طالبانو د بهرنیو چارو وزارت: صیهونیستي رژیم د سیمې او نړۍ امنیت ته پر جدي ګواښ بدل شوی
د طالبانو د بهرنیو چارو وزارت په دمشق کې د ایران پر کونسلګرۍ د برید غندنه کړې او وايي، اسراییلي رژیم د ډیپلوماټیکو نورمونو څخه سرغړونه کوي.
د طالبانو د بهرنیو چارو وزارت په دمشق کې د ایران پر کونسلګرۍ د برید غندنه کړې او وايي، اسراییلي رژیم د ډیپلوماټیکو نورمونو څخه سرغړونه کوي.
د طالبانو د بهرنیو چارو وزارت د سه شنبې په ورځ د (وري ۱۴مه) د یوې خبرپاڼې په خپرولو سره د سوريې په پلازمېنه دمشق کې د ایران د سفارت پر کونسلګرۍ برید غندلی او یاد برید د ډیپلوماټیکو نورمونو څخه سرغړونه بولي.
د دغې ډلې د بهرنیو چارو وزارت له لوري په خپره شوې خبرپاڼه کې د نړۍ او سیمي له اغېز لرونکو هېوادونو څخه غوښتنه کړې چې، د اسراییلي رژیم له لوري پر غزې تړانګه کې د جنایتونو مخنیوی وکړي.
په خبرپاڼه کې ویل شوي:« د سوریې په پلازمېنه دمشق کې د ایران اسلامي جمهوریت د سفارت پر کونسلګرۍ څانګه شوی بريد له ډيپلوماټيکو نورمونو ښکاره سرغړونه او په سيمه کې د ناامنۍ د پراختيا پاروونکی اقدام دی او په کلکه يې غندنه کوو.»
همدارنګه طالبانو ویلي چې، د اسراییلي رژیم له لوري پر غزې د بریدونو دوام د سیمې او نړۍ امنیت ته په یوه جدي ګواښ بدل شوی.
د سوریې په پلازمینه دمشق کې د ایران قونسلګري د دوشنبې په ورځ په یوه برید کې په بشپړه توګه ویجاړه شوې، چې د سوریې او ایران رسنۍ یې د اسراییل هوايي برید بولي.
