په استانبول کې د برید پلانولو په شک د داعش ډلې دوه غړي ونیول شول
ترکي رسنیو ویلي، د دغه هېواد امنیتي ځواکونو د داعش دوه غړي نیولي چې غوښتل یې په استانبول کې برید وکړي. ویل کېږي، چې دغه دوه کسان د تاجکستان او قرغزستان وګړي دي.
ترکي رسنیو ویلي، د دغه هېواد امنیتي ځواکونو د داعش دوه غړي نیولي چې غوښتل یې په استانبول کې برید وکړي. ویل کېږي، چې دغه دوه کسان د تاجکستان او قرغزستان وګړي دي.
د ترکیې استخباراتو او د ترهګرۍ ضد ځواکونو د دوشنبې په ورځ د (وري لومړۍ نېټه) د دغو دوو شکمنو کسانو له کور څخه د عملیاتو پر مهال د پولیسو واسکټونه او خولۍ، وسلې او د جنډرمیري یونیفورمونه کشف او ضبط کړل.
د ترکي رسنیو په وینا، یو مشکوک کس چې د تاجکستان تبعه دی په استانبول کې د دغه برید د پلان اصلي طرحه کوونکی و او بل مشکوک کس یوه قرغزۍ ښځه ده، چې ورسره همکاري یې کوله.
په مسکو کې د کنسرت پر تالار د داعش له برید وروسته، یو شمېر هېوادونو د داعش د احتمالي ترهګریزو بریدونو د مخنیوي لپاره امنیتي تدابیر کلک کړي دي. ترکیې په تېرو لسو ورځو کې د عملیاتو په ترڅ کې یو شمېر نور کسان هم د داعش سره د غړیتوب په تور نیولي دي.
روسي رسنیو د راپورونو له مخې، چې د کراکس کنسرت پر تالار د ترهګریز برید مشکوک کسان د تاجکستان او قرغزستان وګړي دي او یوه تورن کس له ترکیې څخه روسیې ته تللی و.
