د غزې جګړه؛ د وژل شویو فلسطینیانو شمېر ۳۳ زره ۳۰۱ کسانو ته ورسېد
د غزې د روغتیا وزارت وايي، چې د اکټوبر له اوومې راهیسې پر غزې د اسراییل په بریدونو کې لږ تر لږه ۳۳ زره ۳۰۱ فلسطینیان وژل شوي، ۷۵ زره ۳۹۲ کسان ټپیان شوي او له ۸ زرو ډېر ورک دي.
د غزې د روغتیا وزارت وايي، چې د اکټوبر له اوومې راهیسې پر غزې د اسراییل په بریدونو کې لږ تر لږه ۳۳ زره ۳۰۱ فلسطینیان وژل شوي، ۷۵ زره ۳۹۲ کسان ټپیان شوي او له ۸ زرو ډېر ورک دي.
د غزې د روغتیا وزارت د معلوماتو له مخې، په وژل شویو کې له ۱۳ زرو زیات ماشومان او نږدې ۸۰۰ زره ۴ سوه یې مېرمنې دي.
دغه وزارت وايي، چې په ټپیانو کې ۸ زره ۶۳۳ ماشومان او ۶ زره ۳۲۷ یې مېرمنې دي.
پر غزه دغه بریدونه وروسته له هغه پیل شول چې حماس پر اسراییل د اکټوبر په اوومه نېټه برید کې ۱۱۳۹ کسان ووژل، لسګونه نور کسان په دغه برید کې د حماس له خوا یرغمل شوي چې یو شمېر یې لا هم د دغې ډلې په بند کې دي.
اسراییل په ځوابي برید کې د غزې مختلفو برخو کې روغتیايي بنسټونه او روغتونونه هم په نښه کوي.
په همدې حال کې، د روغتیا نړیوال سازمان په خپل تازه راپور کې ویلي، چې نږدې لس زره ناروغان باید د ژغورنې په موخه له غزې بېرون ولېږدول شي.
همدا راز الجزیرې خبري شبکې په خپل یوه راپور کې ویلي، چې تر دا مهال په غزه کې ۳۶۰ زره د اوسېدو، عامه خدماتو، سوداګریزې او دولتي ودانۍ په بشپړ ډول ویجاړې شوې دي.
په راپور کې ویل شوي، چې په دغو ویجاړو شویو ودانیو کې ۲۶۷ جوماتونه او ۳۹۶ زده کړه ییز مراکز شامل دي.
الجزیره په خپل راپور کې زیاتوي، چې د جګړې له پیله په اوسط ډول په هر ساعت کې ۱۵ کسان وژل شوي او ۳۵ نور ټپیان شوي دي.
بل خوا د بشري حقونو نړۍوال سازمان راپور ورکړی، چې په غزه کې نېږدې ۸۵ سلنه وګړي بې کوره شوي دي او بې ځایه شوي فلسطینان د خوړو له کمښت سره مخ دي.
د یادونې وړ ده، چې تر دې مهاله په روانه جګړه کې ۱۱۳۹ اسراییلیان وژل شوي او ۸ زره ۷۳۰ ټپیان شوي دي.
