د فنلنډ ولسمشر الکساندر اشتوپ د اوکراین له ولسمشر ولادیمیر زېلنسکي سره د چهارشنبې په ورځ په لیدنه کې لس کلن امنیتي هوکړه لیک لاسلیک کړ. ددې هوکړې له مخې؛ فنلنډ اوکراین ته ۱۸۸ میلیونه یورو ورکوي.
د فنلنډ د ولسمشرۍ ماڼۍ مطبوعاتي دفتر اعلان وکړ، چې په دې هوکړه کې امنیتي همکاري او د روسیې د برید پر وړاندې د اوږدمهاله ملاتړ لکه د اوکراین دفاع شامل دي.
ښاغلي اشتوپ ویلي: «مونږ دا ملاتړ یوازې د اوکراین د دفاع لپاره نه کوو، مونږ دا پوځي ملاتړ په جګړه کې د اوکراین د بریا په موخه کوو.»
فنلنډ له اوکراین سره یو زرو ۳۴۰ کیلومتره ګډه پوله لري.
د ۲۰۲۲ کال راهیسې د اوکراین لپاره د فنلنډ د ټولو مرستو ارزښت شاوخوا ۲ میلیاردو یورو ته رسیدلی دی.
اوکراین د روسیې د تیریو پر وړاندې د خپلې خاورې د دفاع لپاره په پراخه کچه د لویدیځ په مرستو پورې تړلې دي.
ټاکل شوې چې په بروکسل کې د چهارشنبې او پنجشنبې په ورځو د ناټو د غړو هېوادونو د وزیرانو په غونډه کې هم له اوکراین سره د پوځي مرستو پر څرنګوالي خبرې وشي.
د اوکراین د بهرنیو چارو وزارت د چهارشنبې په ورځ اعلان وکړ، چې د کییف ملګري د توغندیزو بریدونو په وړاندې په کافي اندازه وسلې او د هوايي دفاع تجهیزات نه ورکوي.
د اوکراین د ولسمشر ولادیمیر زېلنسکي دفتر په یوې بیانیه کې لیکلي، چې فنلنډ د ۲۹۰ میلیونه یورو په ارزښت د پراختیايي او بیارغونې بودیجې سره د اوکراین د ملاتړ لپاره څلور کلن پروګرام هم چمتو کوي.
