ټرمپ په میشېګان کې د خپلې وینا پرمهال، په امریکا کې «ناقانونه» کډوالو ته د «څارويو» په نوم خطاب وکړ. هغه د یوه پناه غوښتونکي لهخوا د یو زدهکړیال وژنې ته په اشارې سره وویل:« ډیموکراټان وایي، چې هغوی ته حیوان مه وایه. هغوی انسانان دي. ما وویل، نه هغوی انسانان نه دي. حیوانات دي.»
ډونالډ ټرمپ چې تر دې وړاندې یې هم د «ناقانونه» کډوالو په تړاو ورته څرګندونې کړې وې، د ۲۲ کلن ګرجستاني زدهکړیال لېکن رایلي په اړه یې خبرې وکړې، چې ویل کېږي د یوه وینزویلایي «ناقانونه» کډوال لهخوا وژل شوی دی.
د امریکا پخواني ولسمشر ادعا کړې، هغه پناه غوښتونکي چې د مکسیکو له سرحده امریکا ته په ناقانونه توګه اوړي، د خپلو هېوادونو له زندانونو تښتي او په امریکا کې بیا له تاوتریخوالو ډک جنایتونه ترسره کوي.
که څه هم امریکا د ترهګرو د کډوالۍ په اړه ډېر کم مالومات په لاس کې لري؛ خو څېړنې ښیي، هغه کسان چې په ناقانونه توګه په امریکا کې ژوند کوي، د هغوی د جنایتونو کچه د امریکا د اصلي اوسېدونکو څخه لوړه نه ده.
ټرمپ په خپله دغه وینا کې یو وار بیا خبرداری ورکړ، که د امریکا په راتلونکو ټاکنو کې بریالي نه شي، ګډوډي او تاوتریخوالی به په امریکا کې ډېر شي.
