د ترکيې د کورنيو چارو وزارت د کوچني اختر په ورځو کې شاوخوا ۱۲۰۰ کډوال نيولي دي
د ترکیې د کورنیو چارو وزیر علي یرلي کایا اعلان کړی، چې د دغه هېواد پولیسو د کوچني اختر په ورځو کې شاوخوا ۱۲۰۰ "ناقانونه" کډوال نیولي دي.
د ترکیې د کورنیو چارو وزیر علي یرلي کایا اعلان کړی، چې د دغه هېواد پولیسو د کوچني اختر په ورځو کې شاوخوا ۱۲۰۰ "ناقانونه" کډوال نیولي دي.
ښاغلي کایا وویل، چې د اپریل له ۶ مې څخه تر ۱۰مې پورې په ټول هېواد کې د «کالکان ۱۹» په نوم عملیاتو کې یو زرو ۱۱۷ کسان نیول شوي دي.
د ترکیې د اناتولې خبري اژانس د دغه هېواد د کورنیو چارو د وزیر په حواله راپور ورکړی چې ټول بندیان به د اداري پړاونو له ترسره کیدو وروسته سمدستي خپل هېواد ته واستول شي.
یرلي کایا د ترکیې خلکو ته په خطاب کې وویل، چې د هېواد امنیتي ځواکونه د "ناقانونه کډوالو" په وړاندې خپلو عملیاتو ته دوام ورکوي.
د نیول شویو کسانو هویت تر اوسه نه دی په ډاګه شوی.
په ترکيه کې د کډوالو ډیری غړي سورياييان، ايرانيان او افغانان دي. ترکیه اروپا ته د ایراني او افغان کډوالو د تګ یوه له مهمو لارو څخه ده.
د پاکستان لومړی وزیر شهباز شریف د بلوچستان نوشکۍ کې د نهو کسانو وژل کېدو ته په غبرګون کې وویل، په پاکستان کې به د ترهګرۍ تر ختمېدو د دوی مبارزه روانه وي. تېره ورځ نوشکۍ کې مسافر له موټره ښکته شوي او وروسته په ډزو وژل شوي دي.
پاکستان لومړي وزیر دا پېښه غندلو ترڅنګ د ترسره شوې پېښې راپور غوښتی دی.
هغه ژمنه وکړه، چې ددې ترهکریزې پېښې عاملینو ته به سزا ورکړل شي.
په همدې حال کې د پاکستان د خلکو ګوند یا پیپلز پارټۍ مشر بلاول بهټو زرداري په خپله ټولنیز رسنۍ اېکس کې دا پېښه غندلي ده او د بلوچستان اعلی وزیر ته سپارښتنه کړې ده، چې ددې بې ګناه خلکو قاتلین دې قانون منګولو ته وسپاري.
نوموړي ټینکار کړی، څوک چې په بلوچستان کې د بې ګناه خلکو وېنه تویوي هغوي د بلوچستان پرمختګ دوښمنان دي.
په ورته وخت کې د پاکستان د بلوچستان ایالت اعلی وزیر په خپلې ټولنیز رسنۍ اېکس کې لیکلي، چې اته تنه بې ګناه مزدوران په داسې حال کې چې تفتان ته روان وو، د بلوچستان په نوشکي کې ووژل شول.
د راپورونو له مخې، په وژل شویو کسانو کې ۹ یې د پنجاب اوسېدونکي دي.
ویل کېږي، دغه کسان په یو بس موټر کې د بلوچستان له مرکز کوېټې څخه د ایران تفتان په لور روان وو چې ناپېژاندو کسانو له ګاډي ښکته کړي او بیا یې پرې ډزې کړې دي.
ورته مهال پاکستاني پولیسو ویلي، چې د پېښې په اړه یې پلټنې پیل کړې دي.
لاتراوسه د دغې پېښې پړه کومې ډلې پر غاړه نه ده اخیستې.
د پاکستان پوځ وايي، د پښتونخوا بونېر کې یې د پاکستاني طالبانو یو قومندان وژلی او ۲ وسلوال یې ټپي کړي. په مقابل کې ۲ پوځیان هم وژل شوي پاکستاني طالبانو هم منلې چې په رباني مشهور قومندان سلیم وژل شوی. دغه قومندان د پاکستان مطلوبو کسانو کې و او پر سر یې ۵۰ لکه روپۍ انعام اېښی و.
د پاکستان پوځ د عامه اړیکو دفتر په یوه خبرپاڼه کې لیکلي، چې دغه عملیات نن د اسخباراتي معلوماتو پر بسنټ کړي دي.
په خبرپاڼه کې راغلي د عملیاتو پرمهال قومندان سلیم رباني ووژل شو او دوه نور وسلوال ټپیان شول.
د پاکستان د پوځ پر وینا سلیم رباني په یو شمیر بریدونو کې لاس درلود او د دوی امینتي ادارو ته خطرناکو کسانو په نوملړ کې و، چې د نیولو په بدل کې یې پنځوس لکه کلدارې انعام ټاکل شوی و.
د پاکستان پوځ ویلي، چې تر هغې به جګړه کوي، ترڅو په ټول هېواد کې د ترهګرو ځالي له منځه یوسي.
بلخوا د پاکستان د تحریک طالبان پاکستان خپرباڼه کې تایید کړې ده، چې د عملیاتو پرمهال د دوی یو قومندان سلیم رباني وژل شوی او په مقابل کې یې دوه پاکستاني پوځیان هم وژلي دي.
په دې وروستیو کې د پاکستاني طالبانو بریدونو زور اخیستی، خو د نامعلو دلایلو له امله پاکستاني طالبان د تېر څېر د بریدونو خبرونه له رسنیو نه شریکوي.
د تحریک طالبان پاکستان مشر مفتي نور ولي په تېر اختریز پېغام کې د پاکستان پر پوځ غږ کړی و، چې خپلې وسلې پر ځمکه کېږدي او دوی ته دې تسلیم شي.
مفتي نور ولي ادعا کړې وه، چې په تېر یو کال کې ۴۰۰۰ نوي جنګیالي ورسره یوځای شوي دي.
د عوامي نشنل ګوند د خیبر پښتونخوا ایالتي مشر او د پاکستان په مشرانو جرګه کې تازه ټاکل شوي سناتور ایمل ولي خان پرون په چارسده کې خبریالانو ته وویل، چې د پاکستان پوځ دفاعي بودېجه دې کمه شي. ایمل ولی خان وايي د هېواد ۸۰ فیصده بودیجه په دفاع کې مصرفیږي؛ خو د هیچا دفاع نه کیږي.
عوامي نشنل ګوند په ټولنیزه رسنۍ اېکس کې د سناتور ایمل ولي خان د څرګندونو جزیات خپاره کړي دي.
ایمل ولي خان وايي د پاکستان په لومړیتوبونو کې دې بدلون راشي.
دی وايي په پاکستان کې بې روزګاري هغه وخت ختمېدلی شي، چې د اټم بم د ساتلو پرځای کارخونې جوړولو ته لومړیتوب ورکړل شي.
نوموړی زیاتوي: «که د امریکا د غلامۍ پر ځای د هېواد لپاره فکر وکړو؛ نو زموږ اقتصادي بحران به ختم شي.»
دی وايي، د پاکستان پراختیايي بودېجې ۸۰ څخه ۹۰ فیصده دې په پر ولسي پراختايي پروژو ولګول شي.
نوموړی ټینکار سره وايي، په پاکستان کې ټولې ستونزې حل کېدای شي، خو یوازې په لومړیتوبونو پورې اړه لري.
په وروستیو کالونو کې په پاکستان کې د توکو قیمتونو لوړېدل، د دغه هېواد د وګړو ژوند سخت کړی دی، چې په دې اړه یې شکایتونه ورځ تربلې په زیاتېدو دي.
د راپورونو پر بنسټ د شهباز شریف په مشرۍ حکومت د مالیه وزارت راروانه بودېجه کې د پاکستان د پوځ کلنۍ دفاعي بودېجه ۱۶ فیصده لوړه کړې ده.
یو شمیر پاکستاني کارپوهان وايي د پاکستان پوځ د جګړې سره لاس او ګرېوان دی نو په دې وخت کې دغه هېواد اړ دی، چې دفاعي بودېجه لوړه کړي.
دوو جګپوړو امریکایي چارواکو د جمعې په ورځ امریکايي رسنیو ته ویلي، چې هېواد یې منځني ختیځ ته نور سرتیري لیږي ترڅو په اسراییل یا لویدیځ باندې د ایران د احتمالي برید لپاره چمتووالی ونیسي.
دغو چارواکو ویلي دي، چې امریکا په عراق او سوریه کې د دې هېواد په اډو د ایران د برید د احتمال په اړه اندیښمنه ده.
د امریکايي رسنیو د راپور له مخې، یوه امریکايي چارواکي د جمعې په ورځ (د وري ۲۴مه) وویل، چې په سیمه کې د دغه هېواد د ځواکونو او ګټو د خوندیتوب لپاره دغه اقدامات ترسره کېږي.
په سوریه کې د ایران پر کونسلګرۍ د اسراییل له برید او د ایران د اوو پوځي سلاکارانو له وژل کېدو وروسته، ایراني چارواکو پرله پسې توګه اسراییل ته د غچ اخیستنې ګواښونه کړي دي.
ایران اسراییل د دغه برید مسوول ګڼي، که څه هم تر اوسه اسراییل د دغه برید مسوولیت نه دی منلی، خو اسراییلي مشرانو خبرداری ورکړی، چې د ایران له لوري هر ډول پوځي اقدام ته به ځواب ورکړي.
د اسراییل لومړي وزیر بنیامین نتانیاهو د پنجشنبې په شپه خبرداری ورکړ چې « هر هغه چا ته به سزا ورکو چې موږ ته زیان ورسوي او یا هم موږ ته د زیان رسولو اراده ولري.»
نتانیاهو خپلې امنیتي کابینې ته وویل: «ایران له کلونو راهیسې زموږ پر ضد هم په مستقیم او هم د خپلو نیابتي ډلو له لارې فعالیت کوي؛ له همدې امله اسراييل د ايران او د هغه د نیابتي ډلو په وړاندې دفاعي او يرغليز فعالیت کوي.»
زلمي خلیلزاد ویلي، چې د ایران د مخنیوي لپاره د ایران پر نیابتي ځواکونو یوازې د امریکا بریدونه بسنه نه کوي.
د نشنل انټرسټ ورځپاڼې په یوه مقاله کې په افغانستان کې د امریکا پخواني استازي سپارښتنه کړې چې امریکا دې پر سیاسي فشارونو تمرکز وکړي او پر تهران دې ګران بندیزونه ولګوي.
ښاغلي خلیلزاد په غزه کې د شخړو او په سوریه کې د ایران پر کونسلګرۍ د اسراییل د برید په اړه لیکلي چې امریکا او اسراییل په سوریه کې د دغه هېواد پر کونسلګرۍ د برید په اړه د ایران ځواب ته په تمه دي، خو دا یوازې د یوې لویې ننګونې یوه برخه ده.
هغه لیکلي چې په سیمه کې د جګړې په اوږدولو سره ایران د سیمه ییزې واکمنۍ لپاره د فشار راوړلو لپاره خپل اوږدمهاله هدف ګړندی کوي.
دغه پخواني امریکايي دیپلومات زیاته کړې، چې ایران د خپلو نیابتي ملېشو له مشرانو او د اسلام پلوه ګوندونو په کارولو سره غواړي د عراق لومړی وزیر محمد شیعه السوداني دې ته اړ کړي چې له عراق څخه د امریکايي ځواکونو د بشپړ وتلو لپاره د مهال ویش لپاره پر واشنګټن فشار راوړي.
ښاغلي خلیلزاد په خپله لیکنه کې استدلال کړی چې ایران چې غواړي مدیترانې ته د سیمه ییزې واکمنۍ او د جګړې په پراخولو سره ځمکني دهلیز پرانیزي او یوازې د خپلو نیابتي ځواکونو په نښه کولو باندې بسنه نه کوي. خلیلزاد ویلي، د تهران لپاره د عراقي، سوریې، لبناني او یمني ملېشو ژوند بې ارزښته او کم مصرفه دی.
د دغه پخواني امریکايي ډیپلوماټ په وینا، "ایران باید پوه شي چې په سیمه کې د سمندري اډو او کښتیو په ګډون د امریکا پر ضد د نیابتي ځواکونو د بریدونو بیا پیلول به په سیمه او د دغه هېواد دننه د تهران د ارزښتناکو اهدافو د خنثی کولو لامل شي."
نوموړي هغو بندیزونو ته په اشارې سره چې د امریکا د پخواني ولسمشر ډونالډ ټرمپ په وخت کې پر ایران لګول شوي وو، لیکلي چې دغه مهم بندیزونه د تېلو او غیر نفتي سکتورونو په ګډون له ۷۰۰ډېر اشخاص او بنسټونه اغېزمن کړي وو او تهران یې د بیرته راګرځیدو څخه ویره لري.
زلمي خلیلزاد د تهران له اهدافو سره د مقابلې لپاره د سیمې د هېوادونو هڅونه او د اسراییل او سعودي عربستان ترمنځ د اړیکو د عادي کولو هڅې د نورو مسایلو په توګه چې کولای شي د ایران پر وړاندې خنډونه رامنځته کړي، یاد کړي دي.
ښاغلي خلیلزاد په خپله لیکنه کې د امریکايي ځواکونو د حضور دوام د ایراني رژیم د سیمه ییزو ستراتیژیکو موخو او پر سیمه د تسلط لپاره یو ستر خنډ ګڼلی دی.