عبدالله عبدالله: پر اسراییل د ایران برید "دفاعي" اقدام و
د ملي مصالحې د عالي شورا پخوانی رییس وایي، چې اسراییلو ته د ایران ځواب د دغه هیواد د حاکمیت د نقضولو په وړاندې یو "دفاعي" اقدام و.
د ملي مصالحې د عالي شورا پخوانی رییس وایي، چې اسراییلو ته د ایران ځواب د دغه هیواد د حاکمیت د نقضولو په وړاندې یو "دفاعي" اقدام و.
عبدالله عبدالله پر اېکس ټولنیزې شبکې لیکلي، چې د اسراییلو له خوا په غزه کې د بې ګناه فلسطینیانو د وژلو دوام او د ماشومانو، ښځو، د نړۍوالو موسسو د کارکوونکو، ډاکټرانو او مرستندویه کارکوونکو په نښه کول په سیمه ایزه او نړیواله کچه د ناورین او ترینګلتیاوو اصلي لامل دی.
ښاغلی عبدالله همداراز زیاتوي: "اسراییلو په دمشق کې د ایران پر کونسلګرۍ په برید سره ټول نړۍوال قوانین نقض کړي دي."
د ملي مصالحې د عالي شورا پخوانی رییس عبدالله عبدالله وایي، چې افغانستان له ایران سره ګډ دیني، تاریخي او فرهنګي اړیکي لري او اوسمهال د میلیونونو افغانانو کوربهتوب کوي.
د نوموړي په وینا، د ایران پروړاندې د اسراییلو هر ډول اقدام کولی شي، چې د افغانستان، سیمې او نړۍ پر سولې او امنیت مستقیمې اغیزې ولري.
ایران تېره شپه په اسراییلو د څه باندې درې سوه بې پیلوټه الوتکو او توغندیو بریدونه وکړل.
که څه هم اسراییل وایي، چې ۹۹ سلنه بې پیلوټه الوتکې او توغندي یې په سوریه او ځينو نورو هېوادونو کې موخې ته له رسېدو مخکې شنډ کړي دي، خو د ایران دغو بریدونو نړۍ حیرانه کړې ده او له پراخو غبرګونو سره هم مخامخ شوي دي.
