د طالبانو د کډوالو وزارت: سلګونه افغان کډوال په جبري توګه له پاکستانه راستانه شول

د طالبانو د کډوالو او راستنېدونکو چارو وزارت وايي، په یوه ورځ له سلو ډېرې کورنۍ د سپین بولدک او تورخم له لارو په جبري توګه له پاکستانه راستنې شوې دي.

د طالبانو د کډوالو او راستنېدونکو چارو وزارت وايي، په یوه ورځ له سلو ډېرې کورنۍ د سپین بولدک او تورخم له لارو په جبري توګه له پاکستانه راستنې شوې دي.
د طالبانو د کډوالو او راستنېدونکو چارو زوارت پر خپلې اېکس پاڼه لیکلي چې، تېره ورځ د (وري ۲۹مه) ۵۵۵ تنه افغان کډوال د کندهار د سپین بولدک او ننګرهار د تورخم له لارو په جبري توګه له پاکستانه راستانه شول.د کډوالو او راستنېدونکو چارو وزارت د کندهار د سپین بولدک د سرحدي امریت د راپور په حواله وايي، ۵۳ کورنۍ چې د غړو شمېر یې ۲۸۶ تنه کېږي تېره ورځ په جبري توګه د سپین بولدک له لارې هېواد ته راستې شوې.همدارنګه یاد وزارت وايي، ۵۲ کورنۍ چې د غړو شمېر یې ۲۶۹ تنه کېږي د ننګرهار د تورخم له لارې په جبري توګه هېواد ته راستنې شوې دي.د کډوالو وزارت وايي، تازه راستانه شوي کډوال یې د مرستو تر لاسه کولو په موخه د ملګرو ملتونو د کډوالو عالي کمېشنرۍ او د کډوالۍ نړۍوال سازمان دفترونو ته ورپېژندلي دي.د پاکستان حکومت په داسې مهال کې د افغان کډوالو د اېستلو دویم پړاو پیل کړی چې، د کډوالو سازمانونو او ملاتړو ادارو له پاکستانه په جبري توګه د افغان کډوالو پر اېستلو نیوکې ډېرې کړې دي.

ترکي رسنیو راپور ورکړی، چې د دغه هېواد سمندري ځواکونو ۴۳ افغان کډوال د اېواجېک ښار په څنډو کې نیولي دي. داسې ویل شوي، چې دغه نیول شوي افغانان په یوې بېړۍ کې سپاره وو او له نیولو وروسته د اېواجېک ښار د ستنېدلو مرکز ته لېږدول شوي دي.
اناتولي خبري اژانس راپور ورکړی، چې د ترکيې یو اوسېدونکی هم د «ناقانونه» کډوالو د نیولو په عملیاتو کې نیول شوی دی.
د راپورونو له مخې، ډېری هغه کډوال چې د ترکیې په سمندر کې نیول کېږي هڅه کوي چې ځانونه یونان ته ورسوي.
په وروستیو کلونو کې د بشري حقونو سازمانونو په وار، وار پر یونان نیوکې کړې، چې کډوالو ته یې د اوسېدو زمینه نه ده برابره کړې او هغوی یې له خپلې خاورې اېستې دي.
راپورونه ښيي، چې له بې اسناده کډوالو په تېره بیا له افغان کډوالو سره د ترکي چارواکو بد چلند، د هغوی نېونه او ځورونه په دې وروستیو کې زیاته شوې ده.
د ترکیې د کورنیو چارو وزارت اعلان کړی، چې د «ناقانونه» کډوالو د پېژندلو او نیولو لپاره یې د دغه هېواد په بېلابېلو برخو کې ګزمې زیاتې کړې دي او یوشمېر نوې پوستې یې هم جوړې کړې دي.

د افغانستان لپاره د ملګرو ملتونو سازمان د ځانګړې استازې مرستیال ښاغلي اندریکا راتوت ویلي، اوسمهال په افغانستان کې مېلیونونه هغه کسان چې د خوراکي توکو د پېرلو توان نهلري؛ د لوږې او خوارځواکۍ سره مخ دي.
د ملګرو ملتونو پر پاڼه د هغه په یوې لیکنه کې راغلي، په ۲۰۲۴کال کې اټکل شوی چې ۱۵.۸ مېلیونه خلک به د ناورین او د ناخوندي خوړو له بېړني حالت سره مخامخ شي.
ښاغلي راتوت ویلي:« په ۲۰۲۳کال کې موږ د اړمنو کسانو سره د مرستې لپاره له ننګونو سره مخ وو.»
هغه زیاته کړې، افغانان دا مهال خوراکي توکو ته لاسرسی تر ټولو جدي اړتیا بولي.
له بل پلوه د ګالپ یوې نظرپوښتنې هم موندلې، چې ۹۵ سلنه خلک ځانونه لالهانده او اندېښمن ګڼي.
ښاغلي راتوت همدارنګه ویلي، چې د هرات زلزلې او له ګاونډیو هېوادونو څخه د افغان کډوالو جبري ستنېدا ویجاړونکې اغېزې لرلې او د دوامداره نړۍوالې مرستې اړتیا یې په ګوته کړې.
هغه زیاته کړې:« په ۲۰۲۴کال کې دا اړینه ده، چې موږ د بشري حقونو، د جنډر مساوات او د ښځو پیاوړتیا اصولو ته په خپلو ژمنو کې ثابت پاتې شو.»
هغه وایي:« موږ به د افغانستان په ټولو برخو کې د افغانانو د غوښتنو سره سم زدهکړو ته د مساوي لاسرسي لپاره نه ستړي کېدونکی کار وکړو.»
تر دې وړاندې د روانې اپرېل میاشتې په ۶مه نېټه د خوړو نړۍوال پروګرام ویلي و، په افغانستان کې د خوارځواکۍ په کلینیکونو کې د تېر کال پرتله د ناروغانو په شمېر کې درې برابره زیاتوالی راغلی او دغه وضعیت ورځ تر بلې خرابېږي.
دغه پروګرام په اېکس پاڼه لیکلي، د مرستو کمېدل یو له هغو لاملونو څخه دی چې د دغو شمېرو په زیاتوالي کې یې مرسته کړې ده.

د خراسان ډایري په نوم یوې انلاین ویب پاڼې لیکلي چې دغو وژل شویو اووه کسانو د حافظ ګل بهادر د ډلې سره تړاو لاره او اووه واړه په پرونۍ پېښه کې وژل شوي دي.
دغې پاڼې دا رنګه ویلي، چې د دوی کسانو په پروني برید کې د پاکستان امنیتي ځواکونو ته هم مرګ ژوبله اړولې؛ خو د شمېر په اړه یې څه نه دي ویلي.
پرون د پاکستان سرحدي ځواکونو د خيبر پښتونخوا په شمالي وزيرستان کې د اوو تنو وسلهوالو د وژلو خبره کړې وه.
د پاکستان د پوځ د عامه اړیکو دفتر په یوه بیان کې ویلي و، چې دغه کسان د پوځ له ځواکونو سره په سخته نښته کې وژل شوي دي.
د دغې اعلاميې له مخې، دغه نښته د شمالي وزيرستان د غلام خان د "سپين کاى" په سيمه کې شوې وه او د هغوى سره یې د وسلو، مهماتو او چاودېدونکو توکو د نیولو خبره هم کړې وه.
د پاکستان پوځ په اعلاميه کې دا رنګه راغلي و، چې هېواد يې پرله پسې له طالبانو غوښتي چې د ډېورنډ کرښه په سمه توګه اداره کړي او پاکستان له طالبانو هيله کوي، پرې نه ږدي، چې اورپکې د افغانستان خاوره د پاکستان پر ضد وکاروي.
د پاکستان او طالبانو تر منځ د سرحدي تاوتریخوالي د هواري لپاره له تېرو درېیو کلونو راهیسې هڅې لا هم بې پایلې پاتې دي.
پاکستان تل په طالبانو تور لګوي، چې د تحریک طالبان پاکستان په ګډون ترهګرو ډلو ته یې پناه ځایونه ورکړي او پر وړاندې یې پرېکنده ګام نه اخلي؛ خو طالبانو دغه تورونه په وار، وار رد کړي او په پاکستان کې یې د نا امنۍ پړه په امنیتي ځواکونو اچولې، چې د دوی په وینا د خپل امنیت په ټینګښت کې پاتې راغلي.

د طالبانو د بهرنیو چارو وزارت وايي، د چین د بهرنیو چارو وزارت د سیاسي برخې په مشرۍ یې په بیجېنګ کې د بشري مرستو د تګلارې، د طبیعي پېښو، اجباري راستنو شویو کډوالو او د روغتیا په برخه کې د چین د مرستو په اړه دوه اړخیزې خبرې کړې دي.
د طالبانو د بهرنیو چارو وزارت ویاند عبدالقهار بلخي د پنجشنبې په ورځ د (وري ۳۰مه) پر خپلې اېکس پاڼه لیکلي، چې د طالبانو او چین بهرنیو چارو وزارتونو سیاسي څانګو په مشرۍ د بشري مرستو او اقتصادي بیارغونې پر سر د اړیکو او تګلارو درېیمه ناسته په بیجېنګ کې جوړه شوه.
ښاغلی بلخي وايي، په دغه ناسته کې د طالبانو د صنعت او سوداګرۍ، کانونو او پټرولیم، د کډوالو او بېرته راستنېدونکو چارو او د طبیعي پېښو پر وړاندې د مبارزې وزارتونو استازو هم ګډون کړی و.
د نوموړي په خبره، د چین له لوري د هغه هېواد د سوداګرۍ، طبیعي سرچینو، د چین نړۍوالې پرمختیايي ادارې او نړۍوالې همکارۍ ادارو استازو برخه اخیستې وه.
بلخي زیاتوي، چې په یاده ناسته کې د طبیعي پېښو، د اجباري راستنو شویو کډوالو د ځای پر ځای کولو او روغتیا په برخه کې د چین پر مرستو خبرې اترې وشوې.
د طالبانو د بهرنیو چارو وزارت وايي، چینايي چارواکو په دغه لیدنه کې د جبري راستنو شویو کډوالو د مېشتېدو په برخه کې د سل مېلیونه یوانو مرسته، په چین کې د افغان ماشومانو د زړه د ناروغیو د درملنې د بیا پیل لپاره د زمینې برابرول، د دواړو هېوادونو تر منځ د سوداګرۍ زیاتوالی، د ظرفیت لوړونې او په افغانستان کې د کانونو د سوداګرۍ په برخه کې د چین د پانګونې د فرصتونو په اړه خبرې شوې دي.
عبدالقهار بلخي وايي، د چینايي چارواکو سره په دغه لیدنه کې د واخان کوریډور د پرانیستو پر امکاناتو هم بحثونه وشول.
چین هغه هېواد دی، چې په افغانستان کې یې د طالبانو له بیا واکمنېدو وروسته له دغې ډلې سره نږدې اړیکې پاللي او غواړي د دغه هېواد د کانونو د راسپړلو به برخه کې پانګونه وکړي؛ خو ګڼ افغانان د چین دغې لېوالتیا ته د شک په سترګه ګوري او داسې انګېري، چې له طالبانو سره د دغه هېواد تودې اړیکې د دوی د خپلو ګټو په موخه ترسره کېږي.
خو د دغو تودو اړیکو د پاللو سره، سره بیا هم چین د طالبانو حکومت تر اوسه په رسمیت نه دی پېژندلی.

د سمنګان په مرکز ایبک ښار کې ناپېژاندو وسلهوالو یو ځوان وژلی دی. په سمنګان ولایت کې د طالبانو د اطلاعاتو او کلتور مشر فېروز الدین منیب سیمهییزو رسنیو ته د دغه خبر پخلی کړی او ویلي یې دي، چې پېښه تېره شپه په دره زندان سیمه کې شوې ده.
دغه طالب چارواکي د وژل شوي ځوان او د دغې پېښې د څرنګوالي په اړه نور مالومات نه دي ورکړي؛ خو ویلي یې دي، چې په دې اړه یې پوښتنې ګروېږنې روانې دي.
د طالبانو له بیا واکمنېدو راهیسې د افغانستان په بېلابېلو ولایتونو کې هدفي او مرموزې وژنې د تېر پرتله زیاتې شوې دي، چې وروسته د پېښې د عاملینو د نیونې او سزا ورکولو په تړاو بیا راپورونه هم نه خپرېږي.
