د طالبانو د بهرنیو چارو وزارت وايي، د چین د بهرنیو چارو وزارت د سیاسي برخې په مشرۍ یې په بیجېنګ کې د بشري مرستو د تګلارې، د طبیعي پېښو، اجباري راستنو شویو کډوالو او د روغتیا په برخه کې د چین د مرستو په اړه دوه اړخیزې خبرې کړې دي.
د طالبانو د بهرنیو چارو وزارت ویاند عبدالقهار بلخي د پنجشنبې په ورځ د (وري ۳۰مه) پر خپلې اېکس پاڼه لیکلي، چې د طالبانو او چین بهرنیو چارو وزارتونو سیاسي څانګو په مشرۍ د بشري مرستو او اقتصادي بیارغونې پر سر د اړیکو او تګلارو درېیمه ناسته په بیجېنګ کې جوړه شوه.
ښاغلی بلخي وايي، په دغه ناسته کې د طالبانو د صنعت او سوداګرۍ، کانونو او پټرولیم، د کډوالو او بېرته راستنېدونکو چارو او د طبیعي پېښو پر وړاندې د مبارزې وزارتونو استازو هم ګډون کړی و.
د نوموړي په خبره، د چین له لوري د هغه هېواد د سوداګرۍ، طبیعي سرچینو، د چین نړۍوالې پرمختیايي ادارې او نړۍوالې همکارۍ ادارو استازو برخه اخیستې وه.
بلخي زیاتوي، چې په یاده ناسته کې د طبیعي پېښو، د اجباري راستنو شویو کډوالو د ځای پر ځای کولو او روغتیا په برخه کې د چین پر مرستو خبرې اترې وشوې.
د طالبانو د بهرنیو چارو وزارت وايي، چینايي چارواکو په دغه لیدنه کې د جبري راستنو شویو کډوالو د مېشتېدو په برخه کې د سل مېلیونه یوانو مرسته، په چین کې د افغان ماشومانو د زړه د ناروغیو د درملنې د بیا پیل لپاره د زمینې برابرول، د دواړو هېوادونو تر منځ د سوداګرۍ زیاتوالی، د ظرفیت لوړونې او په افغانستان کې د کانونو د سوداګرۍ په برخه کې د چین د پانګونې د فرصتونو په اړه خبرې شوې دي.
عبدالقهار بلخي وايي، د چینايي چارواکو سره په دغه لیدنه کې د واخان کوریډور د پرانیستو پر امکاناتو هم بحثونه وشول.
چین هغه هېواد دی، چې په افغانستان کې یې د طالبانو له بیا واکمنېدو وروسته له دغې ډلې سره نږدې اړیکې پاللي او غواړي د دغه هېواد د کانونو د راسپړلو به برخه کې پانګونه وکړي؛ خو ګڼ افغانان د چین دغې لېوالتیا ته د شک په سترګه ګوري او داسې انګېري، چې له طالبانو سره د دغه هېواد تودې اړیکې د دوی د خپلو ګټو په موخه ترسره کېږي.
خو د دغو تودو اړیکو د پاللو سره، سره بیا هم چین د طالبانو حکومت تر اوسه په رسمیت نه دی پېژندلی.
