د برېټانیا په پارلمان کې سرچینو ګارډین ورځپاڼې ته ویلي چې د برېټانیا حکومت روانډا ته د برېټانیې د ځینو پخوانیو افغان همکارانو د ایستلو له پلان څخه د معافیت په اړه غور کوي. په دغو کسانو کې په افغانستان کې د پخواني حکومت پوځيان او پخواني ژباړونکي شامل دي.
د برېټانیا پارلمان د سه شنبې په ورځ د دریم ځل لپاره روانډا ته د «ناقانونه» پناه غوښتونکو د ایستلو پلان رد کړ او په دې پلان کې یې د څلورو تعدیلاتو غوښتنه وکړه. په افغانستان کې د پخوانیو برېټانوي همکارانو معافیت یو له هغو تعدیلاتو څخه دی چې برېټانوي استازي یې پلي کول غواړي.
روانډا ته د برېټانیې د افغان همکارانو د ایستلو څخه د معافیت وړاندیز د برېټانیې د پخواني دفاع وزیر دیس براون له خوا د میز پر سر ایښودل شوی دی.
د برېټانیې پارلمان د دغه تعدیل تصویب په ۲۷۵ موافقو او ۲۸ مخالفو رایو سره تصویب کړ.
د برېټانيا د مخالف ګوند ځينو استازو د دغه تعدیل د عملي کېدو غوښتنه وکړه.
ګارډین ورځپاڼه لیکي چې د برېټانیا حکومت دا مهال په «انتخابونو» غور کوي چې روانډا ته د خپل افغان همکاران د ایستلو له پلان څخه معاف کړي.
دغه تعدیل به هغه افغانان خوندي کړي چې په تېرو وختونو کې یې په افغانستان کې د برېټانوي ځواکونو تر څنګ دنده ترسره کړې او د طالبانو له واکمنۍ وروسته په ناقانونه توګه برېټانیا ته دننه شوي دي.
