د بشري حقونو په برخه کې د افغانستان لپاره د ملګرو ملتونو ځانګړی راپورتر ریچارډ بېنېټ وايي، زدهکړې د هر انسان بنسټیز حق دی او د نړۍ په هر ګوټ کې یې باید ساتنه او پالنه وشي.
ریچارډ بېنېټ پر اېکس پاڼه له هغه هشتګ سره چې (د تعلیم خپلواکي او تعلیم د ټولو لپاره) تر سرلیک لاندې پیل شوی، د ګډون له کبله خوښي څرګنده کړې او ویلي یې دي چې د زدهکړو د سیسټم له منځه وړل او یا پر هغه بندیزونه لګول نور د منلو وړ نهدي.
دا څرګندونې داسې مهال کېږي، چې طالبانو پر افغانستان له واکمنېدو وروسته په تېرو څه باندې دوه نیمو کلونو کې د نجونو لپاره د منځنیو ښوونځیو، لېسو او پوهنتونونو دروازې تړلې او پر مېرمنو یې د کار بندیز لګولی دی.
د افغانستان د بشري حقونو لپاره د ملګرو ملتونو ځانګړی راپورتر وايي، تعلیم ته لاسرسی هغه بنسټیز حق دی چې باید د نړۍ هر وګړی ترېنه برخمن وي.
