د ازادۍ جبهې په کابل کې د طالبانو د استخباراتو د دریو غړو د وژل کېدو خبر ورکړی
د ازادۍ جبهه وايي، چې د جمعې په ماښام د کابل ښار په دوهمه حوزه کې یې د طالبانو پر یوه کاروان د برید په ترڅ کې د دغې ډلې د استخباراتو درې غړي وژلي او دوه نور ټپیان شوي دي.
د ازادۍ جبهه وايي، چې د جمعې په ماښام د کابل ښار په دوهمه حوزه کې یې د طالبانو پر یوه کاروان د برید په ترڅ کې د دغې ډلې د استخباراتو درې غړي وژلي او دوه نور ټپیان شوي دي.
دغې جبهې ویلي، چې حربي فابریکې ته څېرمه یې د طالبانو کاروان په نښه کړی دی.
طالب چارواکو تر اوسه په دې اړه څه نه دي ویلي.
د ازادۍ جبهې د جمعې په ورځپه یوه خبرپاڼه کې لیکلي، چې د طالبانو استخباراتي کارکوونکي یې هغه مهال په نښه کړي، چې د کابل په لوېدیځ کې له حربي فابریکې څخه د امید سبز ښارګوټي په لور روان وو.
دغه جبهه وايي، چې طالبانو غوښتل په دې سیمه کې د ملکي خلکو کورونه تالاشي کړي.
د طالبانو ضد دغې جبهې د برید یوه ویډیو هم خپره کړې، چې په کې د چاودنې غږ اورېدل کېږي.
د افغانستان د ولایتي شوراګانو هماهنګۍ شورا د جمعې په ورځ د یوې اعلامیې په خپرولو سره د طلبانو له لوريد د لغمان د ولایتي شورا د پخواني مرستیال اجمل وفا په نیونې خواشیني څرګنده کړې او ژر تر ژره یې د هغې د خوشې کولو غوښتنه کړې ده.
دغې شورا ویلي، چې طالبان له یوې خوا له هېواده بهر افغان شخصیتونو د راستنولو له پاره هغوی ته بلنې ورکوي او له بلې خوا په کور دننه مېشت د جمهوري دولت پخواني چارواکو پر کورونو عملیات کوي او له کوم جرم پرته یې بندي کوي.
په دغه اعلامیه کې راغلي، چې د طالبانو د مشر د بښنې فرمان سربېره دا ډول نیونې به د افغانانو د کډوالۍ بهیر لا ګړندۍ کړي او خلک به د دغې ډلې پر ژمنو بې باوره کړي.
دغه اعلامیه زیاتوي:“موږ د افغانستان ولایتي شوراګانو د هماهنګۍ شورا پر طالبانو غږ کوو، چې په خپلو کړنو دې له سره فکر وکړي او د لغمان د ولایتي شورا مرستیال اجمل وفا دې ژر تر ژره خوشی کړي.”
د تېر حکومت د لغمان ولایتي شورا مرستیال اجمل وفا کورنۍ افغانستان انټرنشنل ـ پښتو ته وویل، د طالبانو ځواکونو ښاغلی وفا پرون د مرکز مهترلام ښار په لومړی حوزه کې د کور له مخې وړی دی.
د اجمل وفا کورنۍ زیاتوي چې نوموړي د ټولبښنې یا عمومي عفوې له مخې په خپل ولایت کې عادي ژوند کاوه.
د امریکا د ملي امنیت پخواني سلاکار جان بولټن له افغانستان انټرنشنل سره په مرکه کې ویلي، چې له بهرنیو مرستو باید طالبانو ته ګټه ونه رسېږي او نه هم پرې دوی مشروعیت ترلاسه کړي. د ښاغلي بولټن په وینا د طالبانو په انزوا کولو سره له دې ډلې واک بیرته اخیستل کیدلی شي.
د پخواني ولسمشر ډونلډ ټرمپ د ملي امنیت سلاکار ویلي، روسیه د ترهګرو ډلو له لېست د طالبانو د ایستلو پلان لري، چې دا یوه ښه پرېکړه نه ده، ځکه طالبان یوه ترهګره ډله ده او په هېڅ صورت باید له دې ډلې سره بشردوستانه مرستې ونه شي.
دغه پخواني امریکايي چارواکي ټینګار وکړ چې طالبانو د افغانستان ښځې او خلک په سختو ځپلو سره له خپلو ټولو بنسټیزو حقونو بې برخې کړي دي، له همدې امله امریکا او نور هېوادونه باید د طالبانو د واک د واک د لا پیاوړتیا لپاره هېڅ کار ونه کړي او په مستقیم ډول د دغې ډلې ملاتړ هم ونه کړي.
جان بولټن همداشان د غزې د کړکیچ او د اسراییل او ایران ترمینځ د شخړې په هکله هم وویل چې د سیمې په هکله د ایران دریځ به بدل نه شي او ایران به په لبنان کې د حزب الله او په یمن کې د حوثیانو په څیر د نیابتي ډلو په کارولو سره خپلې پخوانۍ پالیسۍ ته دوام ورکړي.
هغه زیاته کړه چې اسراییل د ایران بریدونو ته سخت ځواب نه دی ورکړی او دا کار د امریکا د ولسمشرۍ د انتخاباتو په رانږدې کېدو او د تېلو د بیې د نه لوړېدو او د نورو نړیوالو مسایلو په ساتلو سره د جوبایډن د ادارې له نظره د ده په ګټه دي.
په هرصورت، ښاغلي بولټن ټینګار وکړ چې د "کوچني شیطان" د له منځه وړلو لپاره د ایران اراده او د حماس د له منځه وړلو لپاره د اسراییل هڅې به په سیمه کې د جګړو د دوام لامل شي.
د طالبانو له پېښو سره د مبارزې د چارو د وزارت ویاند ویلي، چې په افغانستان کې د بارانونو او سېلابونو له امله ۹۶زره جریبه کرنیزه ځمکه ویجاړه شوې ده.
جانان سایق د طالبانو تر کنټرول لاندې ملي راډیو ټلویزیون ته وویل، چې د سېلاب له امله تر دوه زره ډېر کورني څاروي هم له منځه تللي دي.
د طالبانو له پېښو سره د مبارزې وزارت د چهارشنبې په ورځ وویل، چې په وروستیو ورځو کې د ورښتونو او سیلابونو له امله په ۲۳ ولایتونو کې دوه زره او ۶۲۷ کورونه ویجاړ شوي دي.
د طالبانو د طبیعي پېښو پر وړاندې د مبارزې وزارت په خبرپاڼه کې ویلي، چې د کندهار د طبیعي پېښو پر وړاندې د مبارزې ریاست د مرستندویه موسسو په همکارۍ له ۵۰سیلاب ځپلو کورنیو سره د ۹۲۰۰ افغانیو نغدي مرسته وکړه.
طالبانو ویلي چې مرستندویه موسسو ژمنه کړې چې د هغو کورنیو لپاره به دایمي کورونه جوړوي چې کورونه یې وران شوي دي.
د ملګرو ملتونو د راپور له مخې، په داسې حال کې چې افغانستان د اقلیم د بدلون له اړخه د نړۍ شپږم زیان منونکی هېواد دی، خو د اقلیم د بدلون له امله د رامنځته کېدونکو ګواښونو پر وړاندې تر ټولو لږ چمتووالی لري.
په وروستیو کلونو کې پرله پسې طبیعي افتونه لکه وچکالي، زلزله او سیلابونه د افغانستان په زیانمنونکو سیمو کې د خلکو د ژوند ژواک، کورونو او زیربناوو د ویجاړیدو لامل شوي دي.
محمد عمرجان اخوندزاده چې د طالبانو د مشر هبت الله اخنودزاده سلاکار او په کندهار کې د جهادي مدرسې مشر و، پرون د پاکستان د کوټې ښار د پښتون اباد په نوي کلي کې ووژل شو. محمد عمرجان د غبرګي اخوندزاده زوی اوپه ۱۳۴۴ لمریز کال کې د زابل د شاجوی ولسوالۍ په غبرګي کلي کې زېږېدلی و.
نوموړی په وروستیو کلونو کې په پاکستان کې د دیني مدرسې پر جوړولو سربېره د طالبانو د کوټې د رهبرۍ شورا غړی هم و.
د ۱۴۰۰ کال د اسد په میاشت کې د افغانستان د بیا واک تر لاسه کولو وروسته، طالبانو د کندهار ولایت میخانیکي عالي لېسه په یوه جهادي مدرسه بدله کړه او مولوي محمد عمرجان اخوندزاده یې مشر شو.
دا مدرسه منډیګک ماڼۍ ته څېرمه موقعیت لري، چې ویل کیږي د طالبانو مشر یې د خپل دفتر په توګه کاروي.
د افغانستان انټرنشنل سرچینې وایی چی هبت الله اخوندزاده به خپل مجلسونه د دغه شیخ الحدیث په واسطه د قرانکریم د څو ایتونو په تلاوت سره پیلول او غونډې به یې هم د دغه په دوعا پای ته رسولې.
د سرچینو په وینا، ښاغلی اخوندزاده په اختر کې له خپلې کورنۍ او ملګرو سره د لیدو لپاره کوټې ته تللی و.
تر اوسه کوم کس یا ډلې د هبت الله اخوندزاده د باوري کس د وژنې پړه پر غاړه نه ده اخیستې.
د طالبانو ویاند ذبیح الله مجاهد د جمعې په ورځ د وري په ۳۱مه د محمد عمرجان اخوندزاده د وژل کېدو په اړه د طالبانو له ادرسه رسمي اعلامیه خپره کړه.
په دې اعلاميه کې په دې اړه ډېر جزيات او معلومات نه دي په ډاګه شوي چې دغه لوړپوړی طالب چارواکي څنګه، کله، چېرته او د چا لخوا وژل شوی دی.
د هبت الله اخوندزاده باوري کس چا وژلی؟
طالبان په خپل جوړښت کې تر ټولو سخت اختلافات لري او له تنظیمي جوړښت څخه بهر هم ډېر دښمنان لري.
سرچینو افغانستان انټرنیشنل ته ویلي چې ممکنه ده هبت الله اخوندزاده ته نږدې دغه کس د طالبانو په ډله کې د ناراضو ځواکونو له خوا وژل شوی وي.
له بلې خوا دغه ډله د تحریک طالبان پاکستان په ګډون له بهرنیو جهادي ډلو سره هم له نږدې کار کوي، چې په استخباراتي لوبو کې یې لاس لري.
د سرچينې په وينا، "د استخباراتو او جهاديانو سره کار کول هم ډېر خطرونه لري."
که څه هم د طالبانو د مشر د باوري کس د وژلو تر شا د چا د لاس لرلو په اړه باوري سرچينې نشته، خو د محمد عمرجان اخوندزاده وژنه د طالبانو له مشرتابه یا هغه کس سره چې ځان هبت الله اخوندزاده معرفي کوي، بې تړاوه نه ده.
ځکه دا پوښتنه هم شته چې وسلوال د محمد عمرجان اخوندزاده په وژلو سره د طالبانو مشر هبت الله اخندزاده ته کوم پیغام رسوي که څنګه؟
د تېر حکومت د لغمان ولایتي شورا مرستیال اجمل وفا کورنۍ افغانستان انټرنشنل ـ پښتو ته وویل، د طالبانو ځواکونو ښاغلی وفا پرون د مرکز مهترلام ښار په لومړی حوزه کې د کور له مخې وړی دی. د اجمل وفا کورنۍ زیاتوي چې نوموړي د ټولبښنې یا عمومي عفوې له مخې په خپل ولایت کې عادي ژوند کاوه.
د اجمل وفا کورنۍ نن جمعې ورځ د وري ۳۱ مه افغانستان انټرنشنل ـ پښتو ته وویل، چې اجمل وفا د پخواني اردو رنجر موټرو کې سپرو وسلوالو طالبانو وړی دی.
دوی وايی د معلوماتو له مخې اجمل وفا طالبانو د لغمان لېوا ته وړی دی.
د نوموړي کورنۍ وايي طالبانو ورته تر اوسه د هغه د ځای او د نیولو علت نه دی روښانه کړی.
د اجمل وفا د کورنۍ غړی: « د مهترلام په لومړۍ حوزه کې د پشه يي کلي کې د کور مخې ته له خپلې وړې لور سره ولاړ و، چې د اردو رنجر له ځان سره وېوړو، هیڅ جرم نه لري او نه هم چا ورباندې عریضه کړې ده، بلکې دا یې دوهم ځل دی، چې بې ګناه زنداني کیږي»
د اجمل وفا کورنۍ وايي، طالبانو نوموړی اته میاشتې مخکې هم د یوې شپې لپاره زنداني کړی و او له سختو شګنجو وروسته خوشی کړی و.
دوی زیاتوي له هغه وروسته اجمل وفا له لغمان څخه کابل ته کډه وکړه، خو څلور میاشتې وړاندې یې بیا خپل ولایت ته کډه راوړې وه او عادي ژوند یې کاوه.
که څه هم دطالبانو داک ته رسېدو سره د دغې ډلې مشر ملا هبت الله اخوندزاده ټولبښنه وکړه، خو په یو شمیر ولایتونو کې طالب وسلوال په خپلسرې توګه د پخواني حکومت یو شمیر نظامیان او کارمنان زنداني، شګنجه او په مرموز ډول وژني.
د طالبانو ځیني مشرانو په خپلو څرګندونو کې له خپلو وسلوالو بیا بیا غواړي، چې ټولبښنې ته احترام وکړي او د تېر حکومت کارمنان دې نه ځوروي.
په کندهار کې ناست د طالبانو مشر څو وارې تکراري فرمانونه ورکړل او د ټولبښنې د عملي کېدو غوښتنه یې وکړه.
دا په داسې حال کې ده، چې د ملا هبت الله د ټولبښنې سرغړونې په جرم تر اوسه طالبانو خپل غړي نه دي مجازات
کړي.