د طالبانو د صنعت او سوداګرۍ وزارت وایي، تېر ۱۴۰۲ کال يې د ۴۹ مېليونو ډالرو په ارزښت ۶۷ ټنه زعفران نهو هېوادونو ته لېږلې دي. طالبان وايي د کوکنارو پر کښت له بنديزونو وروسته یې په ۲۶ ولایتونو کې د زعفرانو کر زيات کړی.
د طالبانو تر واک لاندي ملي ټلویزيون د سې شنبې په ورځ د طالبانو د صنعت او سوداګرۍ وزارت د ویاند عبدالسلام جواد له قوله ويلي، د زعفرانو زياته برخه هندوستان، عربستان، اسپانیا، متحده عربي امارت، المان، امريکا، اندونيزيا، ترکيې او انګلستان ته لېږلي دي.
د طالبانو همدې ټلویزيون د کرنې اوبو لګولو او مالدارۍ وزارت ویاند په حواله زياتوي، چې په ۲۶ ولایتونو کې يې پر ۸۳۰۴ هکټاره ځمکه زعفران کرلي دي.
طالب ویاند مصباح الدین مستعين وايي، چې د همدې کښتونو څخه یې شاوخوا ۲۳ زره ۲۴۹ ميټريک ټنه زعفران راټول کړي دي.
د طالبانو د کرنې وزارت وایي، چې کروندګرو ته د زعفرانو د ځوغلیو وېش، د پروسیس او بسته بندۍ وسایل او په تخنيکي لارښوونې او نورو برخو کې د خدماتو د وړاندې کولو هڅې کوي.
