په فراه کې سرچینو افغانستان انټرنشنل پښتو ته ویلي، چې نن طالبانو له ایران سره پر پوله د دغه هېواد شپږ سرحدي سرتېري نیولي دي. سرچینې وايي، د دې کسانو د نیولو پر سر د طالبانو او ایران د سرحدي ځواکونو ترمنځ د جګړې امکان هم شته او دواړه لوري په دې برخه کې تیارسي دي.
افغانستان انټرنشنل پښتو ته رسېدلي لیک کې طالبان وايي، چې دا شپږ ایراني سرتېري د افغانستان خاورې ته د ننوتلو له امله ونیول شول.
افغانستان انټرنشنل پښتو ته داسې لیک هم رسېدلی چې پکې د کندهار نظامي چارو کمېسون د امنیت امر حافظ الیاس ته لیکل شوی او د دې ایراني ځواکونو د نیولو خبر ور کړل شوی دی.
په مکتوب کې ویل شوي چې دا سرحدي سرتېري لومړنیو څېړنو کې وايي، چې په تېروتنه افغان خاورې ته ننوتلي دی.
طالبان وايي، چې د دې شپږو سرتېرو د خلاصون لپاره د ايران د سرحدي ځواکو د عمومي قومندان د دوی د دفاع وزارت د سرحدي چارو عمومي کمېسون سره په تماس کې دی.
طالبان په مکتوب کې وايي، داسي معلومات یې ترلاسه کړي چې ايران په دې ورستيو کي د افغانستان په خاوره کي «د بلوڅ مجاهدينو پر ضد د ناهمغږي شويو عملياتو ترسره کېدو پلان درلود چې دغه معلومات د ملي دفاع وزارت د ستراتیژيک استخباراتي معاونيت لخوا هم تاييد شوي و.»
د سرچینو په خبره، د دې سرتېرو د نیولو له امله په پوله کې د طالبانو او ایراني سرتېرو ترمنځ د تاوتریخوالي پیدا کېدو وېره شته.
په یوه غږیز پیغام کې هم ځايي طالب چارواکي وايي، چې دوی هر ډول حالت ته تیار دي.
ایراني سرتېري تر نیول کېدو وروسته په فراه کې د طالبانو استخباراتو ته سپارل شوي دي.
افغانستان انټرنشنل پښتو ته رسېدلو انځورونو کې هم د ایران شپږ سرحدي سرتېري یوه کوټه کې لیدل کېږي.
لا هم طالبانو او د ایران حکومت د دې پېښې په هکله رسمي څه نه دي ویلي.
په افغانستان کې د «ترهګرو د شتون» په هکله د ایران او پاکستان له ګډې اعلامیې یوه ورځ وروسته د طالبانو بهرنیو چارو وزیر وايي، «د داعش په فعالیت کې زموږ ۳ ګاونډی هېوادونه لاس لري.» امیرخان متقي زیاتوي، «که دا ۳ هېوادونه خپل مسوولیت ادا کړي، افغانستان او سیمه کې به هیڅ مشکل نه وي.»
د طالبانو بهرنیو چارو وزیر دا خبره د افغان – قزاق نندارتون د پرانېستي په مراسمو کې وکړه.
د امیرخان متقي په خبره، «په افغانستان کې د داعش ځالې نشته، خو متاسفانه زموږ درې ګاونډي هېوادونه په نوبت سره، په یوه هېواد کې د داعش لپاره بشري قوه او افراد تیارېږي چې موږ ولیدل پېښې یې تر سره کړې، بل د هغې لارې پر سر پروت دی چې امن خرابوونکي افراد ترې را تېرېږي او بل هېواد پخپله خاوره کې داعش ته د تمویل، پلان جوړونې مراکز ور کړي دي.»
نوموړی وايي، که دا درې هېوادونه خپل مسوولیت ادا کړي په افغانستان کې او ان سیمه کې به هیڅ مشکل نه وي.
که څه هم امیر خان متقي د کوم هېواد نوم نه اخلي، خو ځینې شنونکي وايي، له عراق او سوریې د داعش غړي د ایران له لارې پاکستان او افغانستان ته تللي.
دا رنګه د نیویارک ټایمز وروستی راپور هم وايي، چې په خراسان داعش کې له نیمايي ډېر وسلوال د تاجکستان وګړي دي.
په روسیه کې پر کنسرټ وروستي برید کې نیول شوي کسان هم ټول د تاجکستان وګړي بلل کېږي.
دا ډول طالبان بیا بیا پر پاکستان تور پورې کوي چې د افغانستان د ناامنولو لپاره یې خپله خاوره کې داعش ته ځای ور کړی دی.
د امیر خان متقي دا خبرې په داسې مهال دي چې پرون د پاکستان او ایران په ګډه اعلامیه کې ویل شوي و، په افغانستان کې «ترهګرې ډلې سیمې او نړۍ ته ګواښ دي.»
که څه هم امیر خان متقي دې اعلامیې ته اشاره ونه کړه، خو ویې ویل د اوبو خړولو پر ځای ښه دا ده چې هر هېواد په امن ټینګولو کې خپل مسوولیت ادا کړي.
نوموړي دا هم وویل چې په تېرو دوو کلونو کې په افغانستان کې څومره امنیتي پېښې شوې، په لسو کې اته داسې دي چې عاملان یې له بهر دغه هېواد ته تللي دي.
د طالبانو د ریاست الوزرا اقتصادي معاونیت وايي، ملا عبدالغني برادر او یوشمېر طالب چارواکو د ایران د ولسمشر د ځانګړي استازي او په افغانستان کې د ایران د سفیر حسن کاظمي قمي سره په لیدنه کې د سیاسي، اقتصادي، سوداګریزو او ټرانزیټي اړیکو پر پیاوړتیا او دوه اړخیزو همکاریو خبرې کړې دي.
د طالبانو د ریاست الوزرا اقتصادي معاونیت د پنجشنبې په ورځ پر خپلې اېکس پاڼه لیکلي چې، د طالبانو د ریاست الوزرا اقتصادي مرستیال ملا عبدالغني برادر او د طالبانو د کابینې یو شمېر وزیرانو د افغانستان لپاره د ایران د ولسمشر د ځانګړي استازي او سفیر حسن کاظمي قمي سره په لیدنه کې د سیاسي، اقتصادي، سوداګریزو او ټرانزیټي اړیکو پر پیاوړتیا او دوه اړخیزو همکاریو خبرې کړې دي.
طالبان وايي، دغه لیدنه د ملا عبدالغني برادر په دفتر کې شوې او هغه د دواړو هېوادونو د اړیکو پر پیاوړتیا او ګډ کار ټینګار کړی دی.
په یاده لیدنه کې ښاغلي برادر له حسن کاظمي قمي څخه غوښتنه کړې، چې ایران دې اروپايي هېوادونو ته د افغاني توکو د ټرانزیټ په برخه کې اسانتیاوې برابرې کړي.
همدارنګه ملا عبدالغني برادر د ایران له استازي څخه غوښتنه کړې؛ تر څو په جبري ډول په ایران کې د مېشتو افغان کډوالو د اېستلو لړۍ ودروي.
طالبانو په دغه لیدنه کې د افغانستان لپاره د ایران د ځانګړي استازي حسن کاظمي قمي له قوله لیکلي، ایران چمتو دی چې له افغانستان سره د سوداګرو د بانکي ستونزو له منځه وړلو، د چاپېریال ساتنې پر وړاندې د ګډې مبارزې، د کرنې سکټور عصري کولو او د ایران له لارې د افغانستان د سوداګرۍ او ټرانزیټ کچې زیاتولو په برخو کې همکاري وکړي.
له هغه مهاله چې طالبان په افغانستان کې واک ته رسېدلي، ایران له دغې ډلې سره نږدې اړیکې پالي؛ خو لا یې هم د دغې ډلې حکومت په رسمیت نه دی پېژندلی او په نړۍوالو دریځونو کې یې هم له طالبانو غوښتي، چې ټول ګډونه حکومت دې جوړ کړي او ټولو قومي او مذهبي ډلو ته دې په کې برخه ورکړي.د طالبانو د ریاست الوزرا اقتصادي معاونیت د پنجشنبې په ورځ پر خپلې اېکس پاڼه لیکلي چې، د طالبانو د ریاست الوزرا اقتصادي مرستیال ملا عبدالغني برادر او د طالبانو د کابینې یو شمېر وزیرانو د افغانستان لپاره د ایران د ولسمشر د ځانګړي استازي او سفیر حسن کاظمي قمي سره په لیدنه کې د سیاسي، اقتصادي، سوداګریزو او ټرانزیټي اړیکو پر پیاوړتیا او دوه اړخیزو همکاریو خبرې کړې دي.
طالبان وايي، دغه لیدنه د ملا عبدالغني برادر په دفتر کې شوې او هغه د دواړو هېوادونو د اړیکو پر پیاوړتیا او ګډ کار ټینګار کړی دی.
په یاده لیدنه کې ښاغلي برادر له حسن کاظمي قمي څخه غوښتنه کړې، چې ایران دې اروپايي هېوادونو ته د افغاني توکو د ټرانزیټ په برخه کې اسانتیاوې برابرې کړي.
همدارنګه ملا عبدالغني برادر د ایران له استازي څخه غوښتنه کړې؛ تر څو په جبري ډول په ایران کې د مېشتو افغان کډوالو د اېستلو لړۍ ودروي.
طالبانو په دغه لیدنه کې د افغانستان لپاره د ایران د ځانګړي استازي حسن کاظمي قمي له قوله لیکلي، ایران چمتو دی چې له افغانستان سره د سوداګرو د بانکي ستونزو له منځه وړلو، د چاپېریال ساتنې پر وړاندې د ګډې مبارزې، د کرنې سکټور عصري کولو او د ایران له لارې د افغانستان د سوداګرۍ او ټرانزیټ کچې زیاتولو په برخو کې همکاري وکړي.
له هغه مهاله چې طالبان په افغانستان کې واک ته رسېدلي، ایران له دغې ډلې سره نږدې اړیکې پالي؛ خو لا یې هم د دغې ډلې حکومت په رسمیت نه دی پېژندلی او په نړۍوالو دریځونو کې یې هم له طالبانو غوښتي، چې ټول ګډونه حکومت دې جوړ کړي او ټولو قومي او مذهبي ډلو ته دې په کې برخه ورکړي.
په اسلام اباد کې د افتاب په نامه د یوه ښوونځي او ښوونیز مرکز چلوونکي وايي، چې د «مالي ستونزو» له امله یې دغه ښوونځی وتاړه. د دغه ښوونځي مشر سید قاسم هاشمي افغانستان انټرنشنل ته وویل، چې د ښوونځي په تړلو سره ګڼ افغان ماشومان په تېره بیا کډوالې نجونې له زدهکړو بې برخې پاتې شوې.
ښاغلي هاشمي زیاته کړه: دغه ښوونځی چې یو نیم کال وړاندې د اسلام اباد په (بي ۱۷) سیمه کې د افغان کډوالو ماشومانو لپاره جوړ شوی و، دمګړۍ یې ۴۰۰ زدهکوونکي لرل چې د شاوخوا ۳۰ ښوونکو لهخوا ورته زدهکړې ورکول کېدې.
ښاغلی هاشمي وایي، دوی د افغانستان د تعلیمي نصاب له مخې ماشومانو ته درس ورکاوه او هغوی ته یې د انګلیسي ژبه هم ور زده کوله، چې په دغه ښوونځي کې ټولې زدهکړې وړیا وې.
ښاغلي هاشمي دا هم وویل، تر دې مهاله د دوی مالي لګښت په بهر کې د یو شمېر افغانانو لهخوا تمویلېده چې دا مهال دغه مرستې بندې شوې او تر راتلونکې یوې میاشتې دوی کولای شي د ښوونځي کرایه پرې کړي.
پاکستان ته ډېر کډه شوي افغانان د خپلو ماشومانو د زدهکړو له امله اندېښمن دي.
دوی وايي، په پاکستاني ښوونځیو کې د فیس د پرې کولو وس نه لري او تر دې مهاله نړۍوالې ټولنې هم دې برخې ته لازمه پاملرنه نه ده کړې.
د طالبانو ویاند کابل ته د يو شمېر هېوادو د استازو پرله پسې تګ ته په اشارې سره وايي، چې د «افغانستان د منزوي کولو او اقتصاد خرابېدو» په اړه د ډېرو خلکو او کړيو فکر او تصور ناسم ثابت شوی.
د ذبيح الله مجاهد په خبره، چې په دې برخه کې دغه ډله قوي او ټينګ ګامونه اخلي.
د طالبانو ویاند ذبیح الله مجاهد د چهارشنبې په ورځ پر خپله اېکس پاڼه کابل ته د یو شمېر هېوادونو د ډېپلوماټانو او استازو تګ ته په اشارې ليکي، چې د طالبانو اړيکې د ډېرو هېوادونو سره جوړې شوې دي.
مجاهد زياتوي، چې کابل ته د اسلامي همکاريو د سازمان د مرستيال د راتګ تر څنګ د روسيې، ماليزيا، قرغزستان، ترکمنستان، اروپايي اتحاديې او د ګڼو بهرنيو هېوادونو د ډېپلوماټیکو او سياسي استازو راتګ او د ازبکستان په مهمه غونډه کې د طالبانو ګډون د طالبانو د اړيکو پر زياتوالي دلالت کوي.
نوموړي زياتوي، چې دغه اړيکې د افغانستان د اقتصاد لپاره مثبتي پايلې لري.
مجاهد یو شمېر کسانو ته، چې ده یې نوم او ادرس نه دی په ډاګه کړی د پېغور په ډول وويل: «ځينو فکر کاوه افغانستان به نور منزوي او ګوښه وي، اقتصاد به خرابیږي او له هېوادونو سره به اړیکې نه شي تامین، نور دا ډول تصور ناسم ثابت شوی.»
مجاهد وايي، چې حکومت يې دا مهال په سياسي او اقتصادي برخه کې ټينګ او قوي ګامونه اخلي.
طالب ویاند مجاهد خپلو لاسته راوړنو ته په اشارې ليکلي، چې دا مهال دوی په پراخه کچه منل شوي دي.
خو د طالبانو تر واک لاندې کابل ته د ډېرو هېوادونو د استازو د تګ او په ځينو هېوادونو کې د افغانستان سفارتونه او کونسلګرۍ طالبانو ته د سپارلو سره – سره هېڅ يوه هېواد هم تر اوسه طالبان په رسميت نه دي پېژندلي.
نړۍوالو د افغانستان او طالبانو اړوند په ډېرو ناستو او غونډو کې پر دې ډلې غږ کړی، چې بشري حقونو ته غاړه کښېږدي، نجونو او مېرمنو ته دې د کار او زده کړو زمينه برابره کړي او د «حدودو» له پلي کولو څخه دې لاس واخلي.
خو دغه ډله د خپل مشر د امر له مخې د «شریعت» پر عملي کولو ټينګار کوي.
طالبان پر داسې مهال د اقتصادي ودې خبره کوي، چې د ملګرو ملتونو د مرستندویه ادارو د معلوماتو له مخې د افغانستان خلک له بل هر وخت څخه د سخت فقر او لوږې سره مخ دي او همدا راز په افغانستان کې د ډېفلاسیون کچه تر منفي لس درجې رسېدلې ده.
په هر عصر او زمان کې نوې اصطلاحات رامنځته کیږي او هغه اصطلاحات بیا د متل او وجیزې په توګه په ولسونو کې عام کیږي.
همدا وجیزې په ورځینیو خبرو کې د استدلال راوړلو لپاره قوي دلیل هم ترې جوړېدې شي لکه؛ خیالي مدرسې، خیالي ملایان، خیالي مکاتب، خیالي پولیس، خیالي جنرالان، خیالي ښوونکي او داسې نور.
په دې شپو او ورځو کې د خیالي سیاسیونو بازار هم ګرم دی.
أفغانستان د معجزو وطن دی او ان د طالبانو د مشرتابه په هکله هم ضد او نقیض روایتونه شتون لري.
ایا دا هماغه پخوانی ملا هبت الله دی چې د کچلاغ له ځانمرګي برید څخه بچ شوی او که کوم بل کس د هغه په نوم شتون لري؟
څومره چې موجوده ملا هبت الله د خلکو له انظار څخه پټیږي په همغومره اندازه د خلکو په منځ کې د هغه د هویت په هکله شک او شبه هم زیاتیږي.
په هر حال که هماغه دی او که نوی؛ خو د افغانستان په خلکو حاکم دی.
همدې ته اروایي یا خیالي سیاست وايي، چې مشر څوک نه ګوري او نه یې پېژني؛ خو د حاجي پیر سید کرم شاه غوندې په پل خشتي جومات کې امامت کوي.
له دې سره د جمهوریت د وخت یوه کیسه رایاده شوه.
له حکومته یو چا غوښتنه درلوده، چې د سیمه ییزو ادارو د لوی ریاست عمومي رئيس مقرر شي.
د حکومت ځینو لوړ پوړو چارواکو ورته ویلي و، چې دا دنده په تا درنه ده او سرته یې نشې رسولی.
هغه کس ورته ویلې و، چې دا لس میاشتې کیږي چې دغه اداره ریيس نه لري خو بیا هم چلیږي.
اوس چې بې له ريیسه چلیږي، که دی مقرر شی نو یو څه خو به یې ښه وچلوي.
که د طالبانو مشر نامعلومه هم دی، خو د طالبانو حاکمیت چلیږي او دا چې ښه چلیږي او که خراب، هغه جلا خبره ده.
دلته یو څو نورو ارقامو او د خاطرو یادونه کوم.
په ۱۹۹۳زکال کې په پېښور کې د غیر دولتي موسسو د همغږۍ دفتر ACBAR کې مې د خپلې ولسوالۍ خاص کونړ په هکله ارقام یا دیټا کتله؛ لیکل شوي وو، چې په خاص کونړ کې ۲۱ لوی کلي موجود دي، خو په بل ځای کې یې لیکلي وو، چې په خاص کونړ کې ۲۸ ښوونځي د موسساتو لخوا تمویل کیږي.
دا په دې معنا چې د کلیو له شمېر څخه هم اوه ښوونځي زیات و، حال دا چې په هغه وخت کې یوازې درې ښوونځي په خاص کونړ کې و چې هغه هم ما په شخصي توګه تمویلول او د موسساتو په نوملړ کې نه و.
په همدغه راپور کې لیکلي و، چې د خاص کونړ د شالۍ او ولۍ په سیمو کې موسساتو ۲۸ کیلومتره ویالې ترمیم او جوړې کړې دي.
هغه دوستان چې د خاص کونړ له جغرافیې سره بلد دي، د شالۍ او ولۍ په کلیو کې ویالې نشته او غرنۍ سیمه ده.
له دې سره، د خاص کونړ ولسوالۍ طول له ۱۲ کیلومترو څخه زیات نه دی او عرض به یې هم درې یا څلور کیلومتره وي.
د دې شمېرو په اساس مې د هغه وخت د نبراسکا د موسسې له مشر څخه پوښتنه وکړه، چې تاسو هم وایی په افغانستان کې د دېرشو زرو ښوونځيو ملاتړ کوي، خو که دا شمېرې داسې وي نو فکر نه کوم چې دېرش زره ښوونکي دې هم په افغانستان کې وي.
هغه راته وویل؛ دوی هم پوهیږي چې دا ښوونځي او ښوونکي نه شته، خو که دوی دیرش زره کسانو ته تنخوا ورکړي، په حقیقت کې دوی دیرش زره مجاهدین او په هغوی پورې تړلي کسان به په افغانستان کې تمویل کړي وي، چې جګړه وکړي.
لکه چې اوس پوځي مدرسې او د مدرسو نصاب د جګړو د پیاوړي کولو او افراطیت د خپرولو لپاره استعمالیږي، هغه وخت هم ښوونځي او د ښوونځيو نصاب د افراطیت د ترویج او د جګړو لپار استعمالېدل.
د ثور له کودتا راپدېخوا همداسې خیالي اعداد او ارقام د هغه وخت د حکومتونو لخوا هم خپریدل.
کله به چې يه کومه سیمه کې جګړه وشوه، نو د کابل راډیو به اعلان وکړ چې په هغه سیمه کې د حکومت په ملاتړ مارش وشو.
په امنیتي او جنایي پېښو کې هم دا ډول خیالي ارقام زیات و او یا به یې پېښې د یو او بل د کنترول په ساحه تاوانولې.
چېرته به چې بمبارد وشو، ویل به یې لسګونه اشرار ووژل شول او که مجاهدینو به ډز وکړ، نو ویل به یې چې په لسګونو عسکر، توپونه او ټانګونه له منځه ولاړل.
خبریالانو ته د شمېرو تایید او ثقه کول سخت و، نو سمدستي به مو شمېرې لکه د مجاهدینو د وخت د افغانیو په څېر درې صفره سمدستي کمول او بیا به مو د کمو شمېرو راپور ورکاوه او یا به مو شمېرې په بشپړه توګه حذف کړې.
که د تېرو څلورو لسیزو د راپورونو شمېرې سره پرتله کړو، نو دا مجاهدین ملت باید ټول اوس ژوندي نه وای، ځکه مړه او وژل شوي و.
کله چې د کورنیو چارو په وزارت کې وم، د حوزې یو امر راته کیسه وکړه چې د ډاکتر نجیب الله په وخت کې د کابل په څلورمه حوزه کې مړی شوی و، نو د حوزې امر بیا هغه مړی د دویمې حوزې ساحه کې اچولی و.
د دویمې حوزې امر چې مړی لیدلې و، هغه یې بېرته د څلورمې حوزې په ساحه کې اچولی و.
په دې توګه دا مړی دوه درې ځلې له یوې حوزې څخه بلې حوزې ته وړل شوی و، ځکه هغوی نه غوښتل چې د جنایي پېښو راپور په خپلو حوزو کې ثبت کړي.
له دې ټولو سره سره د کوپونونو په جوړولو کې خو درواغ ویل روا و.
د جمهوریت په وخت کې هم ډېری هماغه پخوانيو لوبغاړو چې موسسات درلودل او یا یې په تنظیمونو کې کار کړی و او یا په پخوانیو رژیمونو کې یې وخت تېر کړې و، د تېرو تجربو په درلودو سره یې هماغه پخوانۍ لوبې کولې او له ځانه به یې شمېرې لیکلې او راپور یې ورکاوه.
دا پورته یو څو مثالونه مې د خیالي شمېرو په هکله د مشت نمونه خروار په توګه یادونه وکړه.
په افغانستان کې د شمېرو تحریف په تېرو څو لسیزو کې عامه مسله وه، ان نړۍوالې شمېرې هم د اعتبار وړ نه وې.
د شمېرو په میتودلوژۍ کې ډېر فکټورونه په نظر کې نیول کیږي او دا یو لوی علم دی، ځکه په اوسني معلوماتي نړۍ کې هر ملک چې معلوماتو ته زیات لاسرسی لري، هغه ملک د زیات قدرت خاوند هم دی.
راځو اصلي خبرې ته؛
د اکثرو افغانانو لویه ستونزه دا ده، چې هرې مسلې ته د ګټو او پروژې په سترګه ګوري.
اکثره افغانان هم ټانټې ماتوي او هم کړوپ کړوپ مزل کوي، ټانټې ماتول او کړوپ کړوپ مزل نه کیږي.
اکثره په سیاست کې پټ پټونې کوي، پټ پټونې په دې خاطر کوي که هر څه سم شول، نو دی قهرمان دی او که خراب شول نو بیا دی یې مسول نه دی.
د اکثرو افغانانو لویه ستونزه دا ده، چې هم یې ګرمي کیږي او هم یخني.
ټول سیاست کوي، خو په ټیم ورک عقیده نه لري.
افغانان په ګوندي سیاست باور نه لري، خو انفرادي سیاست هم پایښت نه لري.
له نورو څخه د باور تعهد اخلي، خو په خپل ځان باور نه لري.
نورو ته وایي چې متحد شئ، خو خپله له هیچا سره په لاره تللی نشي.
د غلطې محاسبې په اساس، غیر معقول رېسک مني خو معقول رېسک یا خطر اخېستو ته یې ملا ماته وي.
کله چې مونږ د جمهوري غوښتونکو خوځښت کار پیلولو، ډېرو دوستانو به راته ویل، چې مونږ ستاسي د فکر او نظرتایید کوو، له تاسو سره یو خو نومونه مو مه اخلئ.
زما ځواب دې دوستانو ته دا و، چې هر څه خیالي کیږي خو سیاست په خیالي توګه نشي کیدلی.
دلته راته یوه بله کیسه رایاد شوه.
په پېښور کې به اکثرو د هر تنظیم کارت اخیستی و.
یوه ورځ یو کس کوم تنظیم ته ننوت، نو امنیتي کس ورته ویلي و چې کارت دې راوښایه.
هغه ورته له جېب څخه د ټولو تنظیمونو کارتونه را اېستلي و چې زه خو یې نه پيژنم، هر یو یې چې ستا د تنظيم کارت وي، هغه ومنه چې حویلې ته ننوځم.
اوس هم ډېرو د هرې سیاسي ډلې کارتونه اخیتي او فکر کوي چې هر یو که پرمختګ وکړ، بیا به له هغې ډلې سره وي.
دلته هم د اپرچونیستي څخه کار اخېستل اخستل کیږي.
هر یو کس د یو سیاسي جریان مشر ځان بولي او ادعا کوي، چې په لسګونو نور جریانونه ورسره دي، خو بیا لس کسه هم په یوه لاره ورسره نه وي.
دوی فکرکوي، چې که زیات نومونه واخیستل شي نو زیات راشن به ورته ورکړل شي.
دې ورځو کې د خبري اژانسونو، رسنیو، حقوق بشر مدافعانو او نورو نومونه او نهادونه هم زیات یادیږي او هر یو د پروژې اخیستو په تمه وي، نه یې د دفتر مشر معلوم دی نه یې ځای او نه یې هویت، خو په مستعارو نومونو یې خبري اژانسونه جوړ کړي دي.
له بده مرغه د تېرو څو لسیزو د ناخوالو له امله د خیالي سیاست، خیالي فعالیت او د خیالي فکرونو فرهنګ د افغانانو په خټه کې اېښودل شوی دی.
فرهنګي بدلون اسانه کار نه دی، فرهنګي بدلون بیا فرهنګي بستر او تعهد ته اړتیا لري، چې تر اوسه د افغانانو په منځ کې نشته او یوازې جنګي او پروژوي فرهنګ د افغانان په منځ کې حاکم دی.
جنګي او پروژوي فرهنګ هیڅکله د دې ظرفیت نه لري، چې ابادي او سوکالي رامنځته کړي ځکه د جنګي ډلو موخه جنګ کول او ورانول دي.
جنګې ډلې نشي کولی چې حکومتولي ښه کړي، ځکه جنګ ورته اسانه او حکومت کول ورته ستونزمن دی.
همدا شان پروژوي حرکتونه پایښت نه لري او نشي کولی چې فکري بدلون رامنځته کړي، ځکه د دوی هدف فکري بدلون نه دی بلکې د پروژو اخیستل او د فساد له لارې ځان پړسول دي.
زما په اند هغوی چې د سیاسي او یا فرهنګي حرکتونو ادعا کوي، باید د خیالي او اروایي فکرونو څخه راووځي او سره متحد شي، تر څو په شریکه فکري او سیاسي کار وکړي.
فکري او سیاسي کار په انفرادي شکل نه کیږي.
فرهنګي او سیاسي بدلون که ناممکن نه وي، نو اسانه هم نه دی.
فرهنګي او سیاسي بدلون د یوې ورځې، یوې میاشتې او یو کال مبارزه نه ده. څوک که د فرهنګي او سیاسي مبارزې تکل لري، نو دا د ژوند تر پایه مبارزه ده او باید دې مبارزې ته ملا وتړي.
یادونه: افغانستان انټرنشنل - پښتو د یوې بې پرې رسنۍ په توګه د ټولو لیکوالو نظریاتو ته درناوي لري؛ خو د چا د نظر ملاتړ نه کوي.