د ترکیې د کورنیو چارو وزارت د یکشنبې په ورځ اعلان وکړ، چې ۳۸ تنه یې له داعش ډلې سره د همکارۍ او غړیتوب په تور نیولي دي. د ترکیې د کورنیو چارو وزیر وویل، چې دغه کسان په شپږو ښارونو کې د ګډو عملیاتو په ترڅ کې نیول شوي دي.
په سیمه کې د داعش د ګواښونو له زیاتېدو وروسته ترکیې د داعش د مشکوکو کسانو د پېژندلو او نیولو لپاره عملیات زیات کړي دي.
د ترکیې د کورنیو چارو وزارت د یکشنبې په ورځ (د غوايي ۹مه) اعلان وکړ، چې د دغه هېواد د ځواکونو د ګډو عملیاتو په ترڅ کې په ادانا، ایدین، چورم، غازي انتیپ، قیصری او مرسین کې لسګونه کسان له داعش ډلې سره د همکارۍ په شک نیول شوي دي.
د دغه هېواد د کورنیو چارو وزیر علي یارلي کایا ویلي، چې په دې عملیاتو کې یوه زیاته اندازه اسعار، لیرا او ډیجیټل اسناد نیول شوي دي.
ښاغلي یارلي کایا ټینګار وکړ. چې د ترهګرو بریدونو د مخنیوي او په هېواد کې د سولې د تامین لپاره د هېواد د ځواکونو مبارزه دوام لري.
په وروستیو میاشتو کې ترکیې لسګونه کسان د داعش ډلې د غړیتوب په تور نیولي دي.
