د طالبانو ملاتړی قوماندان حمید خراسانی څلورم واده کوي
د طالبانو د بدري عملیاتي قطعې قوماندان حمید خراساني افغانستان انټرنشنل ته تایید کړه، چې د څلورم واده مراسم به يې د راتلونکې پنجشنبې په ورځ په کابل ښار کې ترسره شي.
د طالبانو د بدري عملیاتي قطعې قوماندان حمید خراساني افغانستان انټرنشنل ته تایید کړه، چې د څلورم واده مراسم به يې د راتلونکې پنجشنبې په ورځ په کابل ښار کې ترسره شي.
د طالبانو د دغه جنجالي قوماندان د واده د بلنې يو کارت افغانستان انټرنشنل ته رسېدلی او ټاکل شوې، چې د همدې اونۍ د پنجشنبې په ورځ به د نوموړي قومندان د واده مراسم ترسره شي.
حمید خراساني افغانستان انټرنشنل ته تایید کړه، چې دا یې څلورم واده.
د طالبانو په ډله کې څو وادونه یوه عامه خبره ده.
وروسته له هغه چې دغې ډلې په ۱۴۰۰ کال د زمري په میاشت کې د افغانستان واک تر لاسه کړ، د طالبانو ډېرو غړو دویم او درېیم ودونه کړي دي.
دا په داسې حال کې ده، چې تر دې مخکې د طالبانو مشر هبت الله اخوندزاده هم په یوه فرمان کې د دغې ډلې غړي له څو ودونو له کولو منع کړي وو.
په هغه وخت کې ویل شوي وو، چې د طالبانو د مشرانو څو وادونه «د دښمنانو د نیوکو لامل کیږي.»
اسلامي جمعیت ګوند، امرالله صالح، ریچارډ بېنټ او په کابل کې د ترکیې سفارت د هرات ولایت په امام زمان جومات کې پر لمونځ کوونکو وسله وال برید غندلی دی.
اسلامي جمعیت ګوند د سې شنبې په ورځ (د غویي ۱۱مه) پر خپل اېکس لیکلي؛ دا برید د دې ښکارندویي کوي، چې افغانستان د ترهګرو په امن ځاله بدله شوې دی.
اسلامي جمعیت دغه راز ویلي، چې پر افغانستان د طالبانو د حاکمیت دوام د دې لامل شوی، چې په هېواد کې ترهګریز فعالیتونه زیات شي.
دا په داسې حال کې ده، چې د افغانستان د تېر جمهوري دولت د ولسمشر لومړي مرستیال امرالله صالح بیا د هرات ولایت د برید په غبرګون ویلي؛ دا وروستی برید نه دی، چې پرې ماتم ونیول شي؛ خو پر وړاندې یې قیام کېدای شي.
نوموړی وایي: "طالب د شیعه ګانو مشروعیت، حیثیت او منزلت په نښه کړی او داعش ډلې یې جسم."
له دې سره؛ د افغانستان لپاره د ملګرو ملتونو د بشري حقونو ځانګړي راپور ورکوونکي هم په خپل اېکس کې د هرات ولایت په ګذرې ولسوالۍ کې پر لمونځ کوونکو یاد ترهګریز برید غندلی دی.
ریچارډ بېنټ ویلي، چې ټول افغانان په ارامۍ کې د عبادت کولو حق لري او باید له ډار پرته د سولې لپاره دعا وکړي.
په کابل کې د ترکیې سفارت هم د یوې اعلامیې په خپرولو سره دغه پېښه غندلې ده.
په اعلامیه کې راغلي: "په خواشینۍ سره مو خبر ترلاسه کړ، چې د هرات ولایت په ګذرې ولسوالۍ کې د امام زمان پر جومات د برید له امله ګڼ شمېر بې ګناه ملکي وګړي وژل شوي، مونږ په هر ډول ترهګرۍ لعنت وایو."
تر دې وړاندې یوناما، پخواني ولسمشر حامد کرزي او د ملي روغې جوړې شورا پخواني مشر عبدالله عبدالله هم د هرات ولایت د شیعه مذهبو پر جومات برید غندلی دی.
دغه پېښه تېره شپه د هرات ولایت د ګذرې ولسوالۍ په اندېشه ښارګوټې کې د امام زمان جومات پر لمونځ کوونکو د موټر سایکل سپرو د ډزو له امله رامنځته شوه، چې په پایله کې یې د ښځو او ماشومانو په ګډون ۷ تنو ته مرګ ژوبله واوښته.
د یادولو ده، چې تر اوسه هیڅ کومې ډلې د دغه برید مسوولیت پر غاړه نه دی اخیستې.
د نيوزيلنډ کرېکټ بورډ خبر ورکړ، چې دوی به د سپپټمبر په مياشت کې د افغان لوبډلې سره ټېسټ لوبه کوي. نيوزيلنډ وروسته تر هغه د افغانستان سره د لوبو کولو خبر ورکړ، چې اسټرليا د افغانستان سره د ۲۰ اوريز لوبو لوبلړۍ لغوه اعلان کړه.
د نيوزيلنډ کرېکټ بورډ وياند ريچارډ بوک د سې شنبې په يوې خبري کنفرانس کې وويل، چې د «بورډ او لوبغاړو اتحاديې» له مشورو وروسته یې د افغانستان سره د لوبې پرېکړه کړې.
ريچارډ زياتوي: « زموږ ګډ نظر دا و، چې د افغان لوبډلې سره د لوبو پرېکون په افغانستان کې هېڅ بدلون نه راولي.»
نوموړي ويلي، چې د خبرو او تفاهم لارې باید خلاصي وساتل شي او د بدلون لپاره ملاتړ ته دوام ورکول شي.
د نيوزيلنډ کرېکټ بورډ د افغانستان سره د سپټمبر په مياشت کې د ټېسټ لوبې د مشخص ځای په اړه جزیيات ورنه کړل.
دا په داسي حال کې ده، چې د کرېکټ په نړۍوال شل اوريز جام کې افغان لوبډله په لومړۍ لوبه کې هم له نيوزيلنډ سره مخ ده.
نيوزيلنډ د افغان لوبډلې سره پر داسې مهال د لوبې کولو خبر ورکوي، چې له ۲۰۲۱ کال راهیسي کله چې طالبان په افغانستان کې واک ته ورسېدل اسټرليا درې ځله د افغان لوبډلې سره لوبې لغوه اعلان کړې.
نړۍوال کرېکټ څارونکو په خپلو تبصرو کې د افغانستان د کرېکټ حالت په وروستيو کلونو کې د شهرت د زياتوالي تر کچې بللی او اندېښنه یې ښودلې، چې طالبان په دغه هېواد کې ورزش ته د ښځو پر تګ بنديز لګولی.
د طالبانو سترې محکمې د سې شنبې په ورځ (د غويي ۱۱مه) اعلان وکړ، چې په خوست ولایت کې یې درې تنه په عام محضر کې د درغلیو او نامشروع جنسي اړیکو په تور په درو وهلي دي. دغې محکمې ویلي، چې درې واړه تورن کسان د طالبانو د سیمه ییزو چارواکو په حضور کې د ۳۹ درو وهل شوي دي.
د محکمې د خبرپاڼې له مخې؛ له دغو کسانو څخه یو یې په دوه کاله بند او دوه نور یې په شپږ میاشتې بند محکوم شول.
د طالبانو ستره محکمه وايي، چې د دغو کسانو د سزا حکم د خوست ولايت د ښاري ابتداييه محکمې د عامه امنيت رياست د پرېکړې پر بنسټ نافذ شوى دى.
دې محکمې یوه اونۍ وړاندې په خوست ولایت کې پنځه تنه د غلا او "اخلاقي فساد" په تور په ۳۹ درو محکوم کړل.
په دې وروستیو کې د ملګرو ملتونو د بشري حقونو شورا د افغانستان د بشري حقونو ریکارډ ته کتنه کړې او په دې کتنه کې د طالبانو د ډلې له خوا د جسمي مجازاتو د تطبیق په اړه اندېښنه څرګنده شوې ده.
په دې غونډه کې د نړۍوالې ټولنې یو شمېر استازو له طالبانو وغوښتل، چې ژر تر ژره په افغانستان کې د جسمي مجازاتو او اعدام لړۍ ودروي.
د طالبانو ډلې تر دې مخکې هم څو - څو ځله ټینګار کړی، چې د «شریعت د احکامو» پر بنسټ خلکو ته سزا ورکوي.
د طالبانو تر کنټرول لاندې د مخدره توکو د لوی ریاست یوې سرچینې افغانستان انټرنشنل - پښتو ته وویل، چې د لیکوال او شاعر عزت الله ځواب صحي وضعیت له تېرې یوې اونۍ را په دې خور خراب شوی او دوه ځله یې له خولې وینې راغلې دي.
دغې سرچینې د نوم د نه ښودلو په شرط ویلي، چې عزت الله ځواب دوه ورځې وړاندې له خولې وینې ګرځولې دي او یوه سترګه یې شدیده ژوبله شوې ده.
سرچینه زیاتوي: "له بیګا راهیسي د هغه وضعیت لا ډېر خراب شوی، د سترګې زخمونه یې لا ژور شوي او له بېګا راهیسې یې دوه ځلې بیا د وینو استفراق کړی دی".
د سرچینې په خبره؛ نوموړی دا مهال د کابل په قصبه کې د کورنیو چارو وزارت اړوند یې توقیف خانې کې زنداني دی، چې په شدید ډول شکنجه شوی دی.
یاده سرچینه وايي، چې ځواب له خپلې کورنۍ سره له تېرو څلورو میاشتو را په دې خوا نه دي لیدلي.
په ورته وخت کې د عزت الله ځواب یو نېږدې دوست د نوم د نه ښودلو په شرط افغانستان انټرنشنل - پښتو ته ویلي، چې دوی هم د نوموړي له نازک صحي وضعیت څخه خبر شوي او څو ځله یې له طالب چارواکو وغوښتل چې نوموړی روغتون ته بوځي؛ خو طالبانو یې غوښتنه نه ده منلې.
نوموړي زیاته کړه: "دا خو په زوره د یوه انسان وژل دي، هره ورځ یې وهې، شکنجه کوې او بیا حتا ډاکتر ته یې هم نه بیايې، دا کوم انصاف او اسلام دی؟"
هڅه مو وکړه، چې د عزت الله ځواب د کورنۍ له غړو سره اړیکه وکړو؛ خو هغوی په دې اړه له څه ویلو ډډه وکړه.
عزت الله ځواب مخکې له دې، چې د طالبانو له خوا زنداني شي له رواني ستونزو کړېده او په دوامداره توګه یې درمل کارول؛ خو د طالبانو له خوا پرې درمل هم بند شوي دي.
د مینې مجلې د بنسټګر او مسوول مدیر عزتالله ځواب زوی د تېر کال د سلواغې په ۵مه ویلي وو؛ پلار یې له کابله ننګرهار ته پر لار څو ساعته ورک و؛ خو وروسته یې له یوې بلې شمېرې په ټېلیفوني خبرو کې ورته وویل، چې طالبانو نیولی دی.
عزت الله ځواب د خپلو طنزیه او منتقدانه شعرونو له امله په پښتني ټولنه کې مشهور دی.
د عزت الله ځواب زوی عطاالله ځواب خپل فیسبوک کې لیکلي، چې پلار یې د مینې مجلې د نوې ګڼې د چاپ د ډیزان لپاره جلال اباد ته روان و، چې د څو ساعتونو لپاره نادرکه شو.
عزتالله ځواب د ننګرهار ولايت اوسیدونکی دی؛ خو د جمهوریت له پرځېدو وروسته کابل ته کډه شوی دی او د مینې مجلې پر چاپ سربېره مازیګر کتابپلورنځی هم لري.
مینه مجله چې تر ډېره ادبي او هنري مطالب پکې خپرېږي په ځوانانو کې ډېر محبوبیت لري.
دا مجله په ۱۳۸۱ کال کې پیل شوې او د جمهوریت پر مهال د اقتصادي ستونزو له امله د څه وخت لپاره تړل شوې او بیا پیل شوه.
عزت الله ځواب پر مینه مجله سربېره شاعري هم کوي، چې تر ډېره پکې د ټولنې منفي اړخونو ته ګوتې نیسي.
نوموړي د تېر جمهوريت پر مهال په لیکنو او د شعر په ژبه پر حکومت هم سختې نیوکې کولې او بندي شوی هم و.
تر اوسه پورې لا طالبانو په دې اړه څه نه دي ويلي.
د افغانستان او سريلانکا د کرېکټ الف لوبډلو ترمنځ د پنځوس اوره سیالیو دویمه لوبه سريلانکا په ۸ ويکټو وګټله. د دې سياليو لومړۍ لوبه هم سريلانکا د اتو منډو په توپير له افغانستانه ګټلې وه.
د افغانستان او سريلانکا د کرېکټ الف لوبډلو ترمنځ د ۵ يو ورځنيو لوبو لړۍ د دوهمې سیالۍ پچه افغان لوبډلې وګټله او لومړۍ يې د توپوهنې پرېکړه وکړه.
افغان لوبډلې د خپلو ټولو لوبغاړو په سوځېدو په ۲۷.۲ اورنو کې سريلانکا لوبډلې ته ۱۲۱ منډې هدف وټاکه.
د افغان لوبډلې په توپوهونکو کې قيس احمد په ۴۹ توپونو ۴۶ او فرمان الله بیا په ۴۹ توپونو ۳۷ تر نورو ډېرې مندې جوړې کړې.
د سريلانکا کرېکټ الف لوبډلې دغه هدف په ۱۵.۲ اور کې د دوو لوبغاړو په سوځېدو پوره کړ او دغه لوبه یې د ۸ ويکټو په توپير وګټل.
په افغان توپ اچونکو کې محمد سليم او قيس احمد یو یو سرلانکايي لوبغاړي وسوځول.
د دې سیالیو دريمه لوبه به د راتلونکې جمعې په ورځ د سريلانکا په کوربتوب وشي.