له ننګرهال څخه سرچیني وايي، چې د تورخم - جلال اباد پر لویې لارې د باریکاب په سیمه کې پر لاریونوالو طالبانو ډزې کړې، چې په پایله کې یې د یوې مېرمنې په ګډون درې کسان وژل شوي او څلور نور ټپیان دي.
د سیمې د خلکو په وینا؛ د دوی اعتراضونو ته د طالبانو د کانال رییس مولوی غلام الرحمان په تاوتریخوالي ځواب ویلی.
د سیمې یو اوسیدونکي چې د خپل نوم له اخیستو یې ډډه کړې ویلي، چې پخوا به خلک د امریکایانو له خوا وژل کېدل او اوس یې طالبان وژني.
طالبانو د دغې سیمې اوسېدونکو ته ویلي، چې خپل کورونه پرېږدي او سیمه طالبانو ته پرېږدي؛ ځکه دا ځمکه د دولت اړوند ده، خو د سیمې خلک وايي چې دا ځمکې یې اخیستي او طالبان یې په زور ترې نیسي.
له سیمې څخه افغانستان انټرنشنل ته رسیدلې ویډیوګانې ښيي، چې د جلالاباد لویه لاره د دغو اعتراضونو په پایله کې تړل شوې او په سیمه کې د ډزو غږونه اورېدل کیږي.
طالبانو لا د دغو اعتراضونو په اړه څه نه دي ویلي.
تېره جمعه هم په بدخشان کې له طالبانو سره د ولسي خلکو اعتراض په تاوتریخوالي واوښت چې په پایله کې یو ولسي وګړی په درایم او بل په ارګو ولسوالۍ کې ووژل شو.