د افغانستان پخواني ولسمشر محمد اشرف غني په هېواد کې وروستي سېلابونه د اقليمي بدلون د خطر يو زنګ بللی او وايي، چې د اوسني ناورين پر غم خوړولو سربېره اوږدمهاله عواقبو ته تیاری پکار دی.
د افغانستان پخواني ولسمشر محمد اشرف غني نن پر خپله اېکس پاڼه په هېواد کې د وروستيو سېلابونو له امله له زيانمنو کورنیو سره خپله خواږي شريکه کړې او په خپل پيغام کې يې ليکلي: « دا پېښې زموږ د ملي پيوستون، انساني او اسلامي خواخوږۍ يو ازمېښت دی، چې له غم ځپلو سره یې په سملاسي مرستو ثبوت وړاندې کېدای شي.»
ښاغلي غني د همدې کورنيو اړوند، چې مالي او ځاني زیانونه یې ليدلي زیاتوي: «د هغو کورنيو سره چې خپل عزيزان يې له لاسه ورکړي دي، خپله خواږي او ډاډګيرنه څرګندوم او هيله لرم، چې د ټپيانو او بې ځايه شويو خلکو دردونه کم شي او زموږ د ټولو په ګډو او صادقانه هلو ځلو به يې درملنه وشي.»
په افغانستان کې له نږدې یوې اونۍ راهیسې سېلابونه روان دي.
ملګري ملتونه وايي، یوازې په بغلان کې تر دوو سوو کسان د پروني سېلاب له امله مړه شوي دي.
طالبانو تر اوسه په افغانستان کې د وروستیو سېلابونو د قربانیانو کره شمېر نه ده اعلان کړې.
