د طالبانو تر کنټرول لاندې د ننګرهار امنیه قومانداني وايي، چې د جلال اباد ښار د اوومې امنيتي حوزې اړوند یې درې تنه نيولي دي، چې په دوه لارۍ ډوله موټرو کې يې اووه دېرش بوجۍ د ښځو وېښتان ځای پر ځای کړي وو.
د طالبانو د امنیه قوماندانۍ ویاند په خپرې شوې خبرپاڼې کې ویلي، چې په نيول شويو کسانو کې يو تن د موټرو څښتن چې د کباړو ګودام کاروبار هم کوي او پاتې دوه نور يي موټر چلوونکي دي.دا لومړی ځل دی، چې د وېښتو د قاچاق په تور په ننګرهار کې درې کسان نیول کیږي.
طالبانو د دې ډلې د صنعت او سوداګرۍ وزیر نورالدین عزیزي او د ازبکستان د ټرانسپورټ له وزیر الهام محکموف سره د لیدنې خبر ورکړی. د طالبانو د خبرپاڼې له مخې؛ ازبکستان په ۲۰۲۴ کال کې د افغاني توکو د ټرانزیټ په برخه کې د څه باندې ۴۰ میلیونه ډالرو تخفیف په اړه غور کړی دی.
د طالبانو د صنعت او سوداګرۍ وزارت د یکشنبې په ورځ په یوه خبرپاڼه کې لیکلي: ازبکستان د دواړو هېوادونو ترمنځ د سوداګریزو اړیکو پراختیا او پیاوړتیا ته چمتووالی ښودلی دی.
د دغې خبرپاڼې له مخې، نورالدین عزیزي ټینګار کړی، چې دواړه هېوادونه باید د اسیا او نورو هېوادونو د نویو بازارونو په اړه په ګډه کار وکړي.
طالبان وايي، په دې ناسته کې د سوداګریزو اړیکو د کنفرانس د جوړولو او په تاشکند ښار کې د افغاني تولیداتو د نندارتون د پرانېستلو په اړه خبرې وشوې.
د طالبانو د صنایعو او سوداګرۍ وزارت لیکلي چې له ازبک پلاوي سره په دوه اړخیزه ناسته کې د افغان – ټرانس اورګاډي پټلۍ، د حيرتان ښارګوټي د ۲۴ ساعته خدمت، د بار وړونکو موټرو د پېسو پر يووالي، د نفتو او ګازو په استخراج کې د پانګونې په اړه خبرې وشوې. سکتور او سوداګرو ته د ویزو ورکولو په اړه هم خبرې وشوې.
د افغانستان، پاکستان او ازبکستان ترمنځ د ټرانس-افغان اورګاډي د جوړولو پلان په ۲۰۱۸ کال کې وړاندې شو، چې یوه اقتصادي لویه لاره جوړه کړي، چې منځنۍ اسیا د پاکستان له بندرونو سره ونښلوي.
دغه ازبکستاني چارواکي افغانستان ته د خپل سفر په ترڅ کې د دې ډلې د بهرنیو چارو د وزیر او د ریس الوزرا د مرستیال په ګډون له یو شمېر طالب چارواکو سره وکتل.
په پاکستان کې یو شمېر امنیتي سرچینو افغانستان انټرنشنل ته ویلي، چې د ډېورنډ پر کرښه د طالبانو او پاکستاني پوله ساتو ځواکونو تر منځ نېږدې یو ساعت نښته شوې ده.
په پکتیا کې یو شمېر سیمه ییزو سرچینو افغانستان انټرنشنل - پښتو ته تایید کړې، چې د پکتیا د ځاځي اریوب ولسوالۍ د سپینې شګې په سیمه کې د طالبانو او پاکستان تر منځ جګړه شوې ده.
د ځايي خلکو په وینا، چې لا هم د توپونو خال - خال ډزې اورېدل کیږي او جګړه په بشپړ ډول نه ده ختمه شوې.
یو قومي مشر د نوم د نه ښودلو په شرط وویل، چې په مڼه جبه سیمه کې لا هم جګړه روانه ده.
هغه زیاته کړه: " لومړۍ نښته د پاکستان له خوا شروع شوه او ورپسې طالبانو هم شروع کړه".
تر اوسه طالبانو په رسمي ډول په دې اړه رسنیو ته څه نه دي ویلي.
تېره ورځ له اسلام اباد څخه سرچېنو افغانستان انټرنشنل ته تایید کړه، چې د دې هېواد هوایي ځواکونو د پنجشنبې په ورځ (د غويي ۲۰ مه) نېټه د پکتیکا په وړممۍ ولسوالۍ کې د تحریک طالبان پاکستان ځایونه په نښه کړل.
په ورته وخت کې سرچېنې وايي، چې پاکستاني توغندي په پکتیکا کې پر هدفونو لګېدلي دي.
د پاکستان ددغه برید په اړه تر اوسه طالبانو کوم غبرګون نه دی ښودلی.
د ملګرو ملتونو پراختیايي پروګرام اعلان وکړ، چې ډېر ژر به د افغانستان په سېلاب ځپلو سیمو کې د موقتي سرپنا او پخلنځي جوړول پیل کړي. دغه سازمان زیاته کړې، چې ملګري ملتونه د افغانستان د مهمو زیربناو بیارغونې ته ژمن دي.
د یکشنبې په ورځ (د غويي ۲۳مه) د دغه سازمان پرمختیايي پروګرام په ایکس ټولنیزه شبکه کې یو یادښت خپور کړی او لیکلي یې دي: "د ملګرو ملتونو پراختیايي پروګرام د افغانستان د خلکو په غم کې شریک دی.موږ د معیشت بیا رغولو او د ټولنې مهم زیربنا بیا رغولو ته ژمن یو."
د افغانستان په یو شمېر ولایتونو کې سختو سېلابونو خلکو ته ځاني او مالي زیانونه اړولي دي.
تر دې مخکې د ماشومانو د ژغورنې صندوق ویلي وو، چې د بغلان په پنځو ولسوالیو کې ۶۰۰ زره کسان سېلابونو اغېزمن کړي، چې ۳۱۰ زره یې ماشومان دي.
د ملګرو ملتونو د ماشومانو د وجهي صندوق (یونېسف) د راپور له مخې؛ ویجاړونکو سېلابونو په بغلان، تخار او بدخشان کې څه باندې درې زره کورونه ویجاړ کړي دي.
د طالبانو د کډوالو وزارت وايي، چې په هېواد کې وروستیو سېلابونو په بغلان ولایت کې ۲۶۶۵ د استوګنې کورونه نړولي دي.
د طالبانو د کورنیو چارو وزارت اعلان کړی، چې د درایم، بهارک، ارګو، کشم او فیض اباد ولسوالیو کې یې ۲۵۲ جریبه کرل شوي کوکنار له منځه وړي دي. دغې ډلې په سلګونو جنګیالي او پوځي تجهیزات درایم، ارګو او جرم ته استولي دي، چې د کوکنارو کروندې له منځه یوسي او د خلکو د اعتراضونو مخه ونیسي.
تېره اونۍ او نن د درایم او ارګو ولسوالیو خلکو پراخ لاریونونه وکړل او ویې ویل، چې طالبان د کوکنارو د کروندو د ویجاړولو په پلمه د خلکو کورونو ته ننوتي او شخصي حریم یې تر پښو لاندې کړی دی.
ځايي اوسیدونکو پر وینا؛ طالبانو په دغو دوو ولسوالیو کې د بدخشان لږ تر لږه دوه اوسېدونکي وژلي دي.
په تازه لاریونونو کې چې په تاوتریخوالي بدل شوي، درې کسان وژل شوي او له لسو زیات ټپیان شوي دي.
له بدخشان څخه سرچينې وايي، چې د ارګو په ولسوالۍ کې لاريون د طالبانو له غبرګون وروسته په تاوتريخوالي اوښتی او د طالبانو له لوري ۳ کسان وژل شوي او تر لسو زيات زخميان شوي دي. د زیدالله، عطاء الله او عبادالله په نومونو لاریون کوونکي وژل شوي دي.
له بدخشان څخه سرچينو افغانستان انټرنشنل ته د (غويي ۲۴مه) وویل، چې د «ارګو ولسوالۍ په برلاس شمر کلي» کې یو ځل بيا ځايي خلکو د طالبانو پر وړاندې لاريون کړی دی.
له سيمې څخه سرچينې زياتوي، چې طالبانو د لاریون د مخنيوي پر مهال له تاوتريخوالي کار اخیستی او پر لاریون کوونکو يې ډزې کړي.
د لومړنيو معلوماتو له مخې؛ د طالبانو په ډزو کې ۳ لاريون کوونکي وژل شوي او تر لسو زيات زخميان شوي.
سرچينه وايي، چې زخميان یې روغتيايي مرکزونو ته انتقال کړي دي.
د لاريون کوونکو په خبره؛ طالبانو يو شمېر لاريون کوونکي هم نیولي او بنديان کړي دي.
سرچينه زياتوي، چې معترضان یو ځل بيا د لاريون لپاره چمتوالی نيسي.
په ارګو ولسوالۍ کې د اعتراضونو بیا راپورته کېدل ښيي، چې طالبانو تر اوسه د خلکو غوښتنو ته د قناعت وړ ځواب نه دی ورکړی.
لاريون کوونکو په خپل پرېکړه ليک کې درې غوښتنې مطرح کړې: «له بدخشان څخه د غیر مقیم طالبانو شړل، د کوکنارو د کښت لپاره بديل برابرول او قاتلينو ته سزا ورکول.»
څو ورځي وړاندې د طالبانو د بدخشان د امنیه قوماندانۍ ویاند ويلي وو، چې د دغه ولایت په درایم ولسوالۍ کې د دوی ځواکونو د کوکنارو کروندې له منځه وړلې، چې خلک د ځینو کسانو په هڅونه د دوی پر وړاندې ودرېدل.
خو ځايي خلک وايي، چې د طالبانو له خوا د خلکو «شخصي حریم» ته د نه درناوي له امله یې مظاهرې پیل کړې دي.