سیمهییزو سرچېنو افغانستان انټرنشنل پښتو ته وویل، دغه ښوونځی د سویلي وزیرستان واڼه په سرګي کوټ سیمه کې بازار ته څېرمه د جوړېدو په حال کې و چې تېره شپه وسلهوالو په بمونو الوځولی او بنسټونه یې ورنړولي دي.
دغو سرچېنو دا هم وویل، له دغې پېښې وړاندې وسلهوالو په سیمه کې شپې پاڼې هم خپرې کړې وې او له خلکو یې غوښتي و چې په دغه سیمه کې دې د نجونو لپاره ښوونځي نه جوړېږي.
تر دې دوه اوونۍ وړاندې په شمالي وزیرستان کې هم د نجونو یو بل ښوونځی د وسلهوالو لهخوا په بمونو الوځول شوی و.
په خیبر پښتونخوا کې د نجونو د ښوونځيو پر وړاندې تاوتریخوالی تر دې وړاندې هم مخینه لري، په ۲۰۰۸ او ۲۰۰۹ کلونو کې په ملاکنډ او د خیبر پښتونخوا په نورو سیمو او دره ادم خېل کې هم ښوونځي په بمونو الوځول شوي وو.
ځايي خبریال رفعت الله ورکزی وایي، که هغه مهال وسلهوالو پر ښوونځیو بریدونه کول؛ نو په دغو سیمو کې د ځایي طالبان واکمني او راج چلېده او هغو چې ښوونځی سوځول نو چا یې د نیولو واک هم نه لاره.
د ښاغلي ورکزي په خبره، اوس چې وسلهوال طالبان په دغو سیمو کې واک هم نه لري او د ورانکارو کړنو وروسته محکمو ته نه راښکل کېږي، دغه کار د سیمې له خلکو سره اندېښنې زیاتې کړې دي.
ښاغلی ورکزی وايي، که حالت همدغه شان په سیمه کې روان پاتې شي؛ نو یو شمېر خلک به د خپلو اصلي مېنو څخه نورو سیمو ته کډه کولو ته اړ شي.
