د طالبانو تر کنټرول لاندې باختر اژانس خبر ورکړی، چې د قطر د سرې میاشتې لهخوا د کندهار ولایت په ډڼد ولسوالۍ کې یو روغتیايي مرکز جوړېږي. په راپور کې راغلي، چې دغه مرکز د ډنډ ولسوالۍ په کرز کلي کې د ۲۴۳ زره ډالرو په لګښت جوړېږي.
د دغه اژانس د راپور له مخې، نن سه شنبه (د غبرګولې لومړۍ نېټه) د دغه مرکز د جوړولو د بنسټ ډبره کېښودل شوه او د شپږو میاشتو په اوږدو کې به یې د جوړولو چارې بشپړې شي.په دغه راپور کې ویل شوي، چې د افغاني سرې میاشتې د سکرټر جنرال مرستیال عبداللطيف ثابت، د قطر د سرې میاشتې د استازي محمد صالح ابراهيم او په افغانستان کې د قطر د سرې میاشتې د مسوول احمد العثماني ترمنځ د کندهار د افغاني سرې میاشتې په سيمهييز دفتر کې یوه ناسته هم ترسره شوه.د باختر اژانس د راپور له مخې؛ د قطر د سرې مياشتې استازي محمد صالح ابراهيم په دغه ناسته کې ژمنه کړې، چې د کندهار ولایت په درېیمه ناحيه کې به هم یو نوی روغتیايي مرکز جوړ کړي.قطر هم د هغو ګوتو په شمېر هېوادونو کې یو دی، چې له طالبانو سره نږدې اړیکې پالي او له دغې ډلې سره یې له پخوا څخه خواخوږي لرله.
