د طالبانو ټولګټو چارو وزارت وايي، چې د سالنګ لویې لارې د بیا رغونې پاتې چارې به د هوا په ښه کېدو سره پیل کړي. د طالبانو تر واک لاندې ملي ټلویزیون د دوشنبې ورځ د (غبرګولي اومه) د یاد وزارت په حواله خبر ورکړی، چې د سالنګ لویې لارې د بیارغونې قرارداد له دریو شرکتونو سره نوی شوی.
د طالبانو ټولګټو چارو وزارت د روان کال په غوايي میاشت کې دېته ورته خبرپاڼه خپره کړې وه.
هغه مهال یاد وزارت ویلي وو، چې د هوا په ښه کېدو سره به د سالنګ لویې لارې د بیارغونې چارې پیل شي.
طالبانو تېر کال ویلي وو، چې د سالنګ لویه لاره یې رغولې ده.
لوړپوړو طالب چارواکو د سالنګ لاره د ۱۴۰۲ کال د لیندۍ میاشتې په ۲۹مه نېټه د یو لړ ځانګړو مراسمو په ترڅ کې پرانیسته.
له هغه وروسته يو شمېر افغانانو افغانستان انټرنشنل ته د يوې ويډيو په لېږلو سره وويل. چې طالبانو د سالنګ لويې لارې د بيارغونې چارې نه دې بشپړې کړې.
سالنګ د افغانستان یوه له مهمو لویو لارو څخه ده چې د هېواد څو شمالي ولایتونه له کابل سره نښلوي.
