د پخواني دولت د چارو ادارې مشر فضل محمود فضلي وايي، چې د هرې ورځې په تېرېدو سره د کابل مېشتو طالبانو سیاسي، اقتصادي او نظامي ځواکمنتیاوې زیاتېږي او د کندهار رسوخ ورسره کمېږي.
ښاغلی فضلي د طالبانو د مشر اختریز پیغام ته په غبرګون کې وایي، چې د پام وړ دغو بدلونونو هبت الله وارخطا کړی دی.
نوموړی زیاتوي، چې ملا هبت الله د ولسونو، قومونو او اقشارو ترمنځ یووالي پسې نه ګرځي او نه هم پرې باور لري.
ښاغلي فضلي د چهارشنبې په ورځ (د غبرګولي ۳۰مه) په خپلې اېکس پاڼه لیکلي، چې ملا هبت الله د اختر د لمانځه په وینا کې خپله وېره، وارخطایي او وسوسه پټه نه شوای کړای.
د نوموړي په خبره:« د هبت الله په وینا کې هغه سر تر پایه په یووالي او وحدت زیات ټینګار کاوه. ملا هبت الله چې د کوم وحدت هیله او ارمان لري، له دې څخه یې موخه یوازې د طالب جنګیالیو د مختلفو قوماندانانو او خپلو مذهبي ملایانو ترمنځ وحدت او یووالی دی.»
ملا هبت الله په خپل اختریز پیغام کې د طالبانو حکومت مشرانو ته وویل، چې د نظام د ساتلو لپاره باید خپلمنځي اختلافات پای ته ورسوي.
هغه په خپله وینا کې د طالبانو په حکومت کې پر یووالي ټينګار وکړ.
د پخواني دولت د چارو ادارې مشر وایي، چې مستبد نظامونه ماتېدونکي دي او زیات دوام نه کوي.
ښاغلی فضلي همداراز وایي، هغه استبدادي نظامونه چې دوام کوي، لږ تر لږه له اقتصادي پلوه پر ځان بسیا وي او د خپلو ملي سرچېنو د مدیریت وړتیاوې لري؛ خو طالبان سره له دې چې له اقتصادي بسیاینې بې برخې دي، ظرفیت هم نه لري.
فضلي د ملا هبت الله هغو خبرو ته هم اشاره کړې چې په خپله وینا کې یې ویلي و، چې په نوموړي پورې اړوند ملایان هره مشوره چې حکومتي مسوولینو ته ورکوي، هغه باید لکه د کاڼې کرښه ومني.
د پخواني دولت د چارو ادارې مشر وایي، چې پر دې خبرو د طالبانو د مشر د ټينګار اصلي لامل دا دی چې د کابل اداره د نوموړي اکثره اوامر بابېزه ګڼي او نه یې عملي کوي.
د طالبانو د مشر له اشارو داسې څرګندېږي، چې د دغې ډلې مشران تر خپل منځ ستر مخالفتونه لري او خبره تر دې بریده رسېدلې چې د دوی مشر ملا هبت الله یې د حکومت په ویجاړي اندېښنه څرګنده کړه.
ملا هبت الله په خپله وینا کې ټينګار وکړ، چې که طالب مشران له خپلو مخالفتونو لاس وانه خلي؛ نو د ده په خبره دښمن به یې ډېر ژر حکومت له منځه یوسي.
د طالبانو مشر ملا هبت الله داسې مهال د طالبانو حکومت تر منځ په خپلمنځي مخالفتونو اندېښنه څرګنده کړې، چې د دغې ډلې د قاضی القضات په ګډون د حج و اوقاف وزیر او یو شمېر نورو مشرانو په سعودي عربستان کې د یکشنبې په ورځ اختر ونمانځه او په افغانستان کې نورو طالبانو دوشنبې د اختر ورځ ونمانځله.
تر دې وړاندې هم داسې راپورونه خپاره شوي و، چې د دغې ډلې د کورنیو چارو وزارت د مشرانو او استخباراتو د مشر تر منځ د استخباراتو پر څوکیو خپلمنځي مخالفتونه رامنځته شوي وو، چې ان خبره تر خپلمنځي شخړې رسېدلې وه چې بیا بلې ډلې د دوی تر منځ په کابل کې له جګړې مخنیوی کړی و.
