د ملګرو ملتونو امنیت شورا د جمعې په ورځ د افغانستان د وضعیت په اړه ناسته لري. د یوناما مشره روزا اوتونبایوا به د ملګرو ملتونو امنیت شورا دغې ناستې ته د افغانستان د وضعیت په اړه معلومات ورکړي.
دغه ناسته به د جمعې په ورځ (د چنګاښ په لومړۍ نېټه) د نیویارک په وخت د سهار په ۱۰ بجو او د کابل په ځايي وخت په ۶:۳۰ بجو پیل شي.
تر دې وړاندې تېره ورځ د ملګرو ملتونو ځانګړي راپور ورکوونکي هم د افغانستان په اړه د دغه سازمان د بشري حقونو شورا ناستې ته د خپل راپور جزییات وړاندې کړل.
په دغه ناسته کې د ملګرو ملتونو غړو هېوادونو هم په افغانستان کې د ښځو بشري وضعیت د اندېښنې وړ وباله او له طالبانو یې وغوښتل، چې د دوی پر زدهکړو او کار لګېدلي ټول بندیزونه دې لرې کړي.
د ملګرو ملتونو د امنیت شورا له دغې ناستې شاوخوا لس ورځې وروسته به د دغه سازمان په کوربهتوب د دوحې ناسته هم پیل شيي.
د دوحې ناسته د (چنګاښ میاشتې په ۱۰مه او ۱۱مه نېټه) جوړېږي.
په دغه ناسته کې د مدني ټولنو استازو ته بلنه نه ده ورکړل شوې؛ خو طالبان په دغه ناسته کې ګډون کوي.
