د کرېکټ نړۍوال جام سیالۍ؛ د دغو سیالیو په دویم پړاو کې نن افغانستان د هند پر وړاندې لوبېږي

د کرېکټ نړۍوال شل اوریز جام سیالیو پر دوام؛ افغانستان د دغو سیالیو د دویم پړاو په خپله لومړۍ لوبه کې د هند پر وړاندې د لوبو ډګر ته ښکته کېږي. دغه لوبه نن ماښام د افغانستان په وخت ۷ بجې په باربادوس لوبغالي کې ترسره کېږي.

د دغه جام دویم پړاو سیالي تېر ماښام د امریکا او سوېلي افرېقا په لوبې پیل شوه، چې سوېلي افریقا دغه لوبه د ۱۸ منډو په توپیر وګټله.
همدارنګه د افغان لوبډلې دویمه لوبه د جون په ۲۳مه له اسټرالیا او درېیمه لوبه یې د جون په ۲۵مه له بنګله دېش سره ده.
په دغه پړاو کې د افغانستان، وېسټ انډیز، هندوستان، امریکا، بنګله دېش، اسټرالیا، انګلند او د سوېلي افریقا لوبډلې شاملې دي.
افغانستان په دغه پړاو کې د هند، اسټرالیا او بنګله دېش سره په یوې ډله کې راغلی او له همدغو درېیو لوبډلو سره لوبې لري.
له دغه پړاوه به یوازې څلور لوبډلې نیمه پایلوبې ته لار ومومي.