د پاکستان د څېړنو او امنیتي مطالعاتو مرکز وايي، چې په پاکستان کې په تېرو درېیو میاشتو کې په تاوتریخوالو کې زیاتوالی راغلی او په ترهګریزو بریدونو او د ترهګرۍ په وړاندې عملیاتو کې ۳۸۰ کسان وژل شوي دي.
د دغه مرکز له خوا د دوشنبې په ورځ په خپور شوي راپور کې راغلي، چې په دغو پېښو او عملیاتو کې ۲۲۰ کسان ټپیان شوي دي.
د راپور له مخې؛ خیبر پښتونخوا او بلوچستان ایالتونه د تاوتریخوالي د مرکز په توګه پېژندل شوي.
له دغې مرګ ژوبلې ۹۲ سلنه یې په خیبر پښتونخوا کې شوې او ۸۷ سلنه ترهګریز بریدونه بیا په بلوچستان کې شوي دي.
د دغه راپور له مخې؛ په پنجاب کې د تېر کال په پرتله د تاوتریخوالي کچه ۱۳ سلنه او په خیبر پښتونخوا کې ۳۱ سلنه ډېره شوې ده.
د پاکستان د څېړنو او امنیتي مطالعاتو مرکز د راپور له مخې؛ ملکي تلفات، د ټولو تلفاتو ۶۲ سلنه جوړوي او په بلوچستان او خیبر پښتونخوا کې په ډېر شمېر پېښو کې د قومیت او مذهب پر بنسټ کارګران او نور خلک په نښه شوي دي.
په دغه راپور کې راغلي، چې د پولیسو او اردو د چارواکو په ګډون امنیتي کسان هم په پرله پسې ډول په نښه شوي دي.
د ترهګرۍ دولتي ملاتړ په پاکستان کې دننه په بې ثباتۍ کې مرسته کړې ده.
پاکستان په دې تورن دی، چې د خپلو ستراتیژیکو ګټو د پراختیا لپاره له ترهګرو ډلو څخه د نیابتي ډلو په توګه کار اخلي او دا کار په ځانګړې توګه د هند او افغانستان پر وړاندې ترسره کوي.
