د ملګرو ملتونو سرمنشي د شانګهای د همکارۍ سازمان په سرمشریزه کې وویل، چې ملګري ملتونه چمتو دي چې په ټوله نړۍ کې له ترهګرۍ سره د مبارزې په برخه کې د شانګهای د همکارۍ له سازمان سره مرسته وکړي.
د روسیې د دولتي رسنیو د راپورونو له مخې، انتونیو ګوترش وویل، د هېوادونو لپاره دا مهمه ده چې د دې مخه دې ونیسي چې افغانستان د «ترهګرۍ په ځاله» بدل شي.
ګوترش په دې ناسته کې د سولې د تامین او په افغانستان کې د داسې یو ټول شموله حکومت د رامنځته کېدو غوښتونکی شو چې بشري حقونو ته درناوی وکړي.
انتونیو ګوترش وویل، چې په سوډان کې، د کانګو دیموکراتیک جمهوریت څخه تر سومالیا، له میانمار څخه تر هایتي او افغانستان کې سولې ته اړتیا ده.
ملګرو ملتونو راپور ورکړ، چې ښاغلي ګوترش په دې ناسته کې د نړۍ بېلابېلو برخو کې جګړې ته په اشارې سره وویل: «موږ په سختو شرایطو کې سره ناسته کوو.»
انتونیو ګوترش د هېوادونو مشرانو ته په خطاب کې زیاته کړه، چې هدف باید سوله وي چې دوامدار پرمختګ او بشري حقونو ته درناوی یې اړین شرط دی.
روسي رسنیو د ښاغلي ګوترش له قوله راپور ورکړی، چې د شانګهای د همکارۍ سازمان د منځني ختیځ، اوکراین، افریقا او افغانستان په ګډون د نړۍ په بېلابېلو سیمو کې د اړتیا وړ سولې ته د رسیدو لپاره اړین ظرفیت لري.
د شانګهای د همکارۍ سازمان سرمشریزه د چهارشنبې په ورځ (چنګاښ ۱۳مه) «د څو اړخیزو خبرو اترو پیاوړتیا – د سولې او دوامدار پرمختګ لپاره هڅې» تر شعار لاندې د دوو ورځو لپاره پیل شوه.
په دې ناسته کې د روسیې، قزاقستان، هند، ایران، چین، قرغزستان، پاکستان، تاجکستان، ازبکستان، بلاروس، منګولیا، اذربایجان، قطر، متحده عربي اماراتو، ترکیې او ترکمنستان هېوادونو مشرانو او استازو ګډون کړی.
دا خبرتیا په ټولنیزو رسنیو کې خپره شوې او یوې سیمه ییزې سرچینې د هغې ریښتینولي تایید کړې. دغې سرچینې افغانستان انټرنېشنل ته ویلي، چې په دایکنډي کې طالبانو څو ځلې ښځو ته د حجاب د نه اغوستلو له امله خبرداري ورکړي او ګواښونه یې کړي دي.
د طالبانو امر بالمعروف په خبرتیا کې راغلي چې ښځې بايد له کوره د وتلو پر مهال «عربي او اسلامي حجاب» واغوندي تر هغې چې کور ته راځي، او «هېڅ ښځه حق نه لري چې خپل حجاب په بازار، ښوونيزو مرکزونو او عامه ځایونه کې لرې کړي.»
په دایکنډي کې ښځو ته د طالبانو وروستی وخت د چنګاښ په ۱۵ پای ته رسیږي.
طالبانو خبرداری ورکړی، چې که کومې ښځې د دوی امر ونه مانه، نو «سزا به ورکړي او زنداني به شي.»
تر دې مخکې طالبانو په دايکنډي کې له ملایانو او ديني عالمانو غوښتي وو چې پر ښځو د طالبانو د خوښې وړ حجاب په اغوستلو کې همکاري وکړي.
